အိပ်မက်ထဲမှာပေါ့ ခင်ဗျာ။
ဗာရာဏသီပြည်ကြီး သာယာဝပြောနေပါတယ်။
ဗာရာဏသီ ဆိုက်ဘာ ပုလိပ် (Varanasi Cyber Police) ဆိုတဲ့ VCP ဆိုက်ဘာရဲတပ်ဖွဲ့ဟာ လိုင်းပေါ်မှာ လိမ်လည်လှည့်ဖျားနေတဲ့သူတွေကို ထိထိရောက်ရောက် နှိမ်နင်းနေပါသတဲ့။
VCP ဆိုက်ဘာရဲတပ်ဖွဲ့ ကနေ ပြည်သူတွေကို အလိမ်မခံရအောင် ဖေ့စ်ဘွတ်ခ် အစရှိတဲ့ လူမှုကွန်ရက်တွေကနေ ပညာပေးတွေ ပို့ချပါတယ်။ ပြည်သူတွေကလည်း မော်ဒယ် မင်းသမီး ဗာရာဝင့်ကျော်တို့ရဲ့ ဓာတ်ပုံတွေထက် ဆိုက်ဘာရဲတပ်ဖွဲ့ ကနေ အသိပညာပေးတာတွေကို ပိုပြီး စိတ်ဝင်တစား အားပေးကြလေရဲ့။
ဒီတော့ ဗာရာဏသီပြည်ကြီးမှာ လိုင်းပေါ်ကနေ အလိမ်ခံရတဲ့သူတွေ အတော်ရှားသွားပါသတဲ့။
ဟိုးအရင်ကတော့ ဒီလိုမဟုတ်ပါဘူးတဲ့။ လိုင်းပေါ်မှာ လူလိမ်တွေ ခြေချင်းလိမ်နေခဲ့တာပေါ့။ လိမ်နေမှန်း သိလို့ သိတဲ့လူတွေက တားရင် လူလိမ်တွေက သူခိုး လူပြန်ဟစ်ကြတယ်။ ခြိမ်းလားခြောက်လား လုပ်ပါတယ်။ လူတွေကလည်း လူလိမ်တွေကို ယုံရက်ကြတယ်။
အလိမ်ခံရပြီးရင် ရဲတိုင်လည်း ဘာမှ သိပ်မထူးပါဘူးတဲ့။ တရားခံ မိတာ ရှားပါတယ်။ ဘဏ်အကောင့်တွေသုံးပြီး လိမ်တဲ့အခါမှာလည်း ဘဏ်တွေက တာဝန်ယူ ကူညီဖြေရှင်းပေးတာမျိုး ရှားပါတယ်။
လိမ်နေမှန်းသိလို့ အချိန်မနှောင်းခင် ရဲသွားတိုင်ရင်လည်း ရဲက ထိထိရောက်ရောက် အရေးယူတာမျိုး ရှားပါသတဲ့။
ဒီလိုနဲ့ ပြောင်းလဲချိန်တန်လာတဲ့အခါ နိုင်ငံ့ ရဲသွေးစစ်သည် ရဲဇာနည် ခေါင်းဆောင်တစ်ယောက်က အမြော်အမြင်ကြီးကြီးနဲ့ VCP ဆိုက်ဘာရဲတပ်ဖွဲ့ကို ဦးဆောင်ဖွဲ့စည်းပြီး အားကြိုးမာန်တက် စတင်လှုပ်ရှားပါတော့တယ်။
ပထမဆုံး VCP ဆိုက်ဘာရဲတပ်ဖွဲ့ ရှိကြောင်း ဗာရာဏသီ ပြည်သူတွေအားလုံးသိအောင် ကြေညာတယ်။ လူလိမ်အဖွဲ့တွေကို တိုင်ချင်ရင် လိုင်းပေါ်ကနေ လွယ်လွယ်ကူကူ သတင်းပို့လို့ ရအောင် စီစဥ်ပေးထားတယ်။
အလိမ် သတင်းရပြီဆိုတာနဲ့ VCP ဆိုက်ဘာရဲတပ်ဖွဲ့ထဲက ဆိုက်ဘာဥပဒေတွေကို ကျွမ်းကျင်တဲ့ ရဲတွေက တိုင်ကြားချက်ပေါ် အခြေခံပြီး အလိမ်ဟုတ်မဟုတ်၊ တရားဥပဒေကို ချိုးဖောက်နေမနေ အချိန်တိုအတွင်း စုံစမ်းဆုံးဖြတ်တယ်။ ပြီးတာနဲ့ လူလိမ်တွေကို ဆက်သွယ်ပြီး သတိပေးချက်ထုတ်ပြန်တယ်။ ဒီအဖွဲ့ဟာ လူလိမ်ဖြစ်ကြောင်း၊ ဥပဒေနဲ့ မလွတ်ကင်းတာတွေ လုပ်နေကြောင်း ပြည်သူတွေကို အသိပေးတယ်။ သက်ဆိုင်ရာ လူမှုကွန်ရက်တွေ၊ ဘဏ်တွေနဲ့ ချိတ်ဆက်ပူးပေါင်းပြီး လူလိမ်တွေရဲ့ အကောင့်တွေ၊ ပေ့ချ်တွေ၊ ဆိုက်တွေ၊ ဘဏ်အကောင့်တွေကို အချိန်တိုအတွင်း ပိတ်ပစ်တယ်။
သတိပေးချက်ထုတ်ပြန်တာကိုတောင် ဂရုမစိုက်ပဲ ဆက်လိမ်တဲ့လူလိမ်တွေကို ဥပဒေအတိုင်း မှန်မှန်ကန်ကန် ပြင်းပြင်းထန်ထန် အပြစ်ပေးတယ်။
လူတွေကလည်း အလိမ်မခံရအောင် VCP ရဲ့ သတင်းထုတ်ပြန်ချက်တွေကို စောင့်ဖတ်တယ်။ ပြည်သူတွေကလည်း လူလိမ်လို့ ထင်ရတဲ့ အကောင့်တွေ ပေ့ချ်တွေကို တာဝန်သိသိ သတင်းပို့ပေးကြတယ်။
လိမ်နေတာ ဟုတ်မဟုတ် မသေချာရင်လည်း VCP ဆိုက်ဘာရဲတပ်ဖွဲ့ကို မေးမြန်းပြီး အလိမ်ဟုတ်မဟုတ် စုံစမ်းလို့ရပါတယ်။ စိတ်ရှည်လက်ရှည် ပြန်လည်ဖြေကြား ကူညီပေးပါသတဲ့။ အလိုအလျောက် ပြန်ဖြေစက် ဘော့တွေနဲ့ စီစဥ်ပေးထားတော့ ဆိုက်ဘာရဲတွေလည်း မလိုအပ်ပဲ အလုပ်မရှုပ်ပါဘူး။
ဒီလိုနဲ့ ဗာရာဏသီပြည်မှာ ဆိုက်ဘာရဲ နဲ့ ပြည်သူ အားလုံး ပူးပေါင်းလက်တွဲကြတော့ လိုင်းပေါ်မှာ လူလိမ်တွေ ရှားပါးသွားပါတော့သတဲ့။
ကောင်းလေစွ။
ဟုတ်ကဲ့ အိပ်မက်ထဲက ဗာရာဏသီပါ။
ဆက်လက်၍ ဖတ်ရန်
ပိုးစုန်းကြူး ငွေးကြေးဆိုင်ရာ ဗဟုသုတ
Credit:
Firefly ပိုးစုန်ကြီး Personal Blog Page မှကူးယူထားသည်
No comments:
Post a Comment