ဒီနေ့တော့ ကလေးမယူခင် ကြိုတင်ပြင်ဆင်သင့်တာတွေကို ပြောပြပါရစေ။
(၁) #ဆေးစစ်ပါ
ကလေးမယူခင် လင်မယားနှစ်ယောက် ဆေးစစ်ဖို့လိုပါတယ်။ ကလေးမှာ မျိုးရိုးဗီဇအလျောက် ရောဂါတွေ ဖြစ်လာနိုင်ခြေရှိမရှိ ကြိုတင်ဆေးစစ်ရမှာပါ။ မိဘနှစ်ပါးက ကျန်းမာပါတယ်၊ ဒါကြောင့် ကလေးလည်း ကျန်းမာမှာပါလို့ လှေနံဓားထစ် ယူဆထားလို့မရပါဘူး။
မိဘတွေမှာ အငုပ်ဗီဇအရ ရောဂါလက္ခဏာမပြတဲ့ ရောဂါအခံတွေ ရှိနေနိုင်ပါတယ်။ ဥပမာ ကျန်းမာရေးကောင်းနေတဲ့ မိဘနှစ်ယောက်လုံးမှာ ရောဂါလက္ခဏာမပြတဲ့ သွေးအားနည်းရောဂါ အခံရှိနေခဲ့ရင် မွေးလာတဲ့သားသမီးတွေမှာ သွေးအားနည်းရောဂါအပြင်းစားဖြစ်ပြီး တစ်သက်လုံး မကြာခဏ သွေးသွင်းပေးရတာတွေ၊ ရိုးတွင်းခြင်ဆီ လဲပေးရတာတွေ ဖြစ်တတ်ပါတယ်။
ဒီတော့ ကံကို ပုံမချပါနဲ့။ ကိုယ်ဝန်မယူခင် ဉာဏ်နဲ့ ယှဉ်ပြီး ဆေးအရင်စစ်ပါ။ ကိုယ့်ရဲ့အသက်အရွယ်၊ ရှိတဲ့ ရောဂါအခံနဲ့ ကိုယ်ဝန်ဆောင်ဖို့ သင့်မသင့် စစ်ဆေးပါ။ ဆေးရုံဆေးခန်းတွေမှာ ကိုယ်ဝန်မယူခင်၊ လက်မထပ်ခင် လင်မယားနှစ်ယောက် စစ်သင့်တဲ့ ဆေးစစ်တာတွေ လုပ်ချင်လို့ပါလို့ပြောရင် ဆရာဝန်တွေ သိပါတယ်။ ဆေးစစ်ဖို့ ဘယ်လောက်ကုန်ကျမလဲ စုံစမ်းပြီး ငွေစုထားပါ။ ငွေကုန်ကြေးကျ အရမ်းကြီး မများလှပါဘူး။
ဒီလို ဆေးစစ်တာဟာ ဗေဒင်တွက်တာထက် ပိုအရေးကြီးပါတယ်။
(၂) #ကလေးမွေးစရိတ်
ခွဲမွေးရမှာလား၊ ပုံမှန်မွေးမှာလား၊ ဆေးရုံဆေးခန်းမှာ မွေးမှာလား၊ အိမ်မှာမွေးမှာလား စတာတွေအပေါ် မူတည်ပြီး ကလေးမွေးစရိတ် အနည်းအများ ကွာသွားတတ်ပါတယ်။ စရိတ်စကတွေကို ခန့်မှန်းတွက်ချက်ပြီး ကြိုတင်ငွေစုထားဖို့ လိုပါတယ်။ (အချို့ ကုမ္ပဏီတွေကတော့ ဝန်ထမ်းမိသားစုအတွက် မီးဖွားစရိတ် ထောက်ပံ့တာတွေ ရှိပါတယ်။)
ကိုယ်ဝန်ယူတုန်းကတော့ လွယ်လွယ်တွေး လွယ်လွယ်ယူလိုက်ပြီး လိုအပ်မှ သူများဆီက လျှောက်ချေးနေရရင်၊ အသနားခံ လက်ဖြန့်တောင်းနေရရင် မဟန်ပါဘူး။ ရှက်စရာကောင်းပါတယ်။
ကလေးမလိုချင်ပဲ မတော်တဆ ရသွားတယ်လို့ မပြောကြပါနဲ့။ သားဆက်ခြားနည်းတွေကို လေ့လာကြပါ။ ဒီဘက်ခေတ်မှာ လိုင်းပေါ်မှာ ဒါတွေကိုသင်ပေးနေတာတွေ ရှိနေပါပြီ။ အသိဉာဏ်ရှိတဲ့ လူတွေပဲ။ ခွေးတွေ ကြောင်တွေမှ မဟုတ်ကြတာ ခင်ဗျာ။
(၃) #ကလေးတစ်ယောက်ရဲ့စရိတ်
ကလေးမီးဖွားလို့ ကုန်တဲ့ ကုန်ကျစရိတ်ဟာ ကလေးတစ်ယောက်ကို အရွယ်ရောက်တဲ့အထိ ပြုစုပျိုးထောင်ပေးဖို့ ကုန်ကျတဲ့ စရိတ်နဲ့ ယှဉ်ရင် ပါမွှားလေးပါ။
နို့မှုန့်ဖိုး၊ ကစားစရာဖိုး၊ ကျန်းမာရေး၊ ပညာရေး၊ စားဝတ်နေရေး စသဖြင့် ကလေးတစ်ယောက်ရဲ့ ကုန်ကျစရိတ်တွေက မနည်းပါဘူး။
မိခင်ကိုယ်ဝန်ဆောင်စဉ်ကာလမှာ မိခင်အလုပ်မလုပ်နိုင်တဲ့အတွက် ဝင်ငွေလည်း နည်းသွားတတ်ပါတယ်။ မွေးပြီးတဲ့အခါမှာလည်း ကလေးအတွက် အချိန်ပေးရပါတယ်။ စောင့်ရှောက်ဖို့ တစ်ယောက်မဟုတ်တစ်ယောက် ဘေးမှာ အမြဲရှိနေရပါတယ်။ မိခင် ကိုယ်တိုင် အလုပ်မလုပ်ပဲ ထိန်းမလား၊ ဆွေမျိုး တစ်ယောက်ယောက်ကို အကူခေါ်ရမလား၊ ကလေးထိန်း ငှါးရမလား စသဖြင့် စဥ်းစားစရာတွေ အများကြီးပါ။
ဒီတော့ ဝင်ငွေ နည်းသွားနိုင်တဲ့အပြင် ထွက်ငွေလည်း ပိုများလာနိုင်ပါတယ်။ ဒါတွေအတွက် ဝင်ငွေနဲ့ လောက်ရဲ့လား ကြိုတင် တွက်ချက်ထားရပါမယ်။
ဒီစရိတ်တွေကို ထည့်တွက်ပြီး ဝင်ငွေနဲ့ ထွက်ငွေ လောက်တယ်ဆိုမှ ကလေးယူသင့်တာပါ။
(၄) #ကလေးတွေကိုလူ့ဘဝထဲခေါ်ပြီးဒုက္ခမပေးပါနဲ့
"ဒီလိုတွေ တွေးပြီး ကြောက်နေရင် ကလေးတောင် ယူဖြစ်မှာ မဟုတ်ဘူး။ ကလေးလိုချင်ရင် ယူသာ ယူချလိုက်။ သူ့အလိုလို အဆင်ပြေသွားလိမ့်မယ်" လို့ တွေးတဲ့သူတွေ မြန်မာနိုင်ငံမှာ အတော်များပါတယ်။
သားသမီးတွေအတွက် ဘာမဆို ရင်ဆိုင်ရဲ ရင်ဆီးခံရဲတဲ့ သတ္တိတွေနဲ့ မိဘမေတ္တာတရားကို လေးစားပါတယ်။ ဒါပေမဲ့ "နောင်ခါလာ နောင်ခါဈေး" စိတ်သဘောထားကိုတော့ မနှစ်ခြိုက်ပါဘူး။ ရေရှည်မတွေးပဲ ဒီလိုလုပ်မိလို့ ဒုက္ခရောက်နေကြရတဲ့ မိသားစုတွေကို တွေ့ဖူးပေါင်း များနေလို့ပါ။
မွေးတုန်းက မွေးထားပြီး ကလေးက ကလေးသဘာဝ ဂျီကျတဲ့အခါ (အပြင်ကနေ ပါလာတဲ့ ဒေါသတွေ စိတ်ဖိစီးမှုတွေနဲ့ အတိုးချပြီး) သားသမီးကို အပြင်းအထန် ရိုက်နှက် နှိပ်စက်ဆုံးမတာတွေကိုလည်း မမြင်ချင်ပါဘူး။
(၅) #နှစ်ဆပိုကြိုးစားပေးပါ
ကလေးမယူနဲ့လို့ ပြောနေတာ မဟုတ်ပါဘူး။ ကလေးယူချင်တဲ့စိတ်ကို တွန်းအားအဖြစ်သုံးပြီး နှစ်ဆကြိုးစားငွေစုပြီးမှ ကလေးယူပါ။ ကိုယ် မပြေလည်သေးပဲ သားသမီးတွေကို လူ့လောကထဲက ဆင်းရဲတွင်းထဲကို ခေါ်သွင်းတာမျိုးကို အားမပေးချင်ပါဘူး။ ငရဲတမျှ ဒုက္ခဆင်းရဲတွေဟာ လူ့ပြည်မှာလည်း ရှိပါတယ်။ ရခဲလှတဲ့ လူ့ဘဝဆိုရင်တောင် ကလေးငယ်တွေ ဖူလုံတဲ့ဘဝ ချမ်းသာတဲ့ဘဝကို ရကြပါစေ။
ဒါတွေ မသိခဲ့လို့ မစဥ်းစားပဲ ကလေးယူခဲ့ပြီးပြီဆိုရင်လည်း ခုချိန်ကစပြီး ကလေးတွေအတွက် နှစ်ဆ ပိုကြိုးစားပေးကြပါ။
သူများကလေးတွေ ကျောင်းတက်နေချိန်မှာ လမ်းဘေးမှာ တောင်းစားနေရတဲ့ ကလေးသူငယ်လေးတွေ၊ ပန်းရောင်းနေရတဲ့ ကလေးသူငယ်လေးတွေကို တွေ့ရတာ ရင်ထဲ မချိစရာပါ။ အချို့ဆို ဒုက္ခဆင်းရဲတွေ အတိပြီးတဲ့ ဘဝမှာ ရုန်းရင်းကန်ရင်းနဲ့ ရခဲလှပါတယ်လို့ ဆိုကြတဲ့ လူ့ဘဝရဲ့ အနှစ်သာရတွေကို ဘာမှန်းတောင် မသိလိုက်ကြပဲ တစ်ဘဝ အချည်းနှီး ကုန်ဆုံးသွားကြရရှာပါတယ်။
သားသမီးတွေကို ကောင်းစားစေချင်တဲ့ ချစ်ခြင်းမေတ္တာစိတ်က မိဘတွေတိုင်းမှာ ရှိပြီးသားပါ။ အဲဒီ ချစ်ခြင်းမေတ္တာကို ဉာဏ်ပညာနဲ့ ဝီရိယ ပေါင်းလိုက်တဲ့အခါ သားသမီးတွေအတွက် သာယာလှပတဲ့ ဘဝကို ဖန်တီးပေးနိုင်ကြပါတယ်။ ကံကို ပုံမချပါနဲ့။ ဉာဏ်နဲ့ ဝီရိယကို သုံးပြီး ကြိုတင်ပြင်ဆင်ကြပါ ခင်ဗျာ။
ဆက်လက်၍ ဖတ်ရန်
ပိုးစုန်းကြူး ငွေးကြေးဆိုင်ရာ ဗဟုသုတ
Credit:
Firefly ပိုးစုန်ကြီး Personal Blog Page မှကူးယူထားသည်
No comments:
Post a Comment