ပျင်းလိုက်တာ

​မြန်မာနိုင်​ငံမှာ​​ ရင်းနှီးမြှုပ်​နှံတယ် လို့ ​ပြောပြီး ​​လောင်းကစား လုပ်​နေ​တဲ့သူ​တွေ ​​တော်​​တော်များပါတယ်။ 

"​ရင်းနှီးမြှုပ်​နှံတာ၊ ငွေကို ခိုင်းထားတာ ​အကျိုးမပေးပါဘူး။ ​အဆင်မ​ပြေပါဘူး။ ​ငွေ​တွေပဲ ဆုံးသွားတယ်" ဒီလို​ပြော​တဲ့သူ​တွေ ဒု​နဲ့ဒေး။ 

​ငွေ​တွေ​​တော့ စုမိပါ​ရဲ့။  ရင်းနှီးမြှုပ်​နှံရမယ်ဆိုတာ​​​​လည်း သိပါ​ရဲ့။ ဒါ​ပေ​မဲ့ ရင်းနှီးမြှုပ်​နှံတာကို ​အဓိပ္ပာယ် အကောက်လွဲ ​နေကြ​​တော့ ​ငွေ ​အဆုံး​အရှုံးများတာ​​ပေါ့။ 

"ရင်းနှီးမြှုပ်​နှံထားတယ်​လေ။ ​အသိတစ်ယောက် မျက်ကလူး​ဆံပြာ​နဲ့ ​ငွေလာချေးတယ်။ ​အတိုး တစ်လကို ၂၅% ပေးမယ်​တဲ့။ ၄ လကြာရင် ​အရင်း​ကျေပြီ။ ​ရင်းနှီးမြှုပ်​နှံမှု အထိုင်​ငွေပဲ​လေ။ ရှိတာလေး ထုတ်ချေးလိုက်တယ်။" 

သာဓု သာဓု သာဓု ပါ ခင်ဗျာ။ ​​ငွေမပေးခင် ရေစက်လေးပါ ​ချမပေးလိုက်ဘူးလား။ 

​​အတိုးကြီးကြီး​နဲ့ ချေးလိုက်ပြီးရင် ဆုံးတာများပါတယ်။ မျက်ကလူး​ဆံပြာ ဖြစ်​နေ​တဲ့သူ​လေ။ ​အကြွေးလည်ပင်းနစ်​နေလို့ လာချေးတာ။ ကိုယ့်ကို ​ပြန်ပေးဖို့ ​အတိုး​​တောင် ​အခြားက သွားချေးရဦးမှာ။ ချေးလို့ရရင် လာပေးလိမ့်မယ်။ မရရင် ဆုံးပြီ။ သူများ​တွေလို ထမိန် စွန်​​တောင်ဆွဲ ဓားကြိမ်းကြိမ်းပြီး ​ပြန်​​တောင်းရဲလို့လား။ 

"​လေယာဉ်ကွင်း/စက်မှုဇုံ ဆောက်​​တော့မှာ​လေ။ အဲဒီနားက ​မြေ​တွေ ဈေးတက်​​တော့မှာ။ အဲဒါ ရင်းနှီးမြှုပ်​နှံဖို့ သွားပြေးဝယ်ထားတယ်​လေ။" 

​သေချာ မေးကြည့်​​တော့မှ ဝယ်ထားတာက လယ်​မြေကို ပိုင်း​​ရောင်းထားတာ​တွေ။ လယ်စိုက်ဖို့ကလွဲပြီး ဘာစီးပွားမှ လုပ်ခွင့်မရှိ​တဲ့ ​​မြေ။ ဝယ်ထား​တဲ့ ဈေးက သာ​မန် လူ​နေ ဂ​ရံ​မြေ​တွေထက် ဈေး​​တော်တာ​မှန်​ပေ​မဲ့ လယ်ကွက်ဈေးထက် ​အဆမ​တန် ဈေးတင်​​ရောင်း​တဲ့ ​မြေ​တွေ။ လေယာဉ်ကွင်း/စက်မှုဇုံ မလုပ်ဖြစ်ရင် ခွက်ခွက်လန်အောင် ရှုံးပြီ။ လုပ်ဖြစ်တယ်ဆိုရင်​​တောင် ​အစိုးရက အဲဒီ​နေရာ​တွေကို ​မြေ​ပြန်သိမ်းပြီး လယ်ယာ​မြေ ပေါက်ဈေး​အတိုင်း ​ပြန်လျော်ပေးမယ်ဆို ကိုယ်ရှုံးပြီ။ ​အစိုးရက မသိမ်းဘူးဆိုရင်​​တောင် လယ်​​မြေကို လယ်ပဲစိုက်ရမယ်ဆိုလည်း ရှုံးပြီ။ ရှုံးဖို့ ​အကွက်​တွေများတယ်။ 

"ရှိ​တဲ့​ငွေလေး ပွားချင်တာ​ရယ်၊ နည်းနည်းစီစုရင်း ​ငွေ တစ်လုံးတည်းရချင်တာ​ရယ်​​ကြောင့် စုမဲထဲ ​ထည့်လိုက်တယ်​လေ။" 

ဟုတ်​ကဲ့ ထွက်ပြေးသွား​တဲ့ မဲဒိုင်​တွေ မနည်းဘူးခင်ဗျ။ "ဒီဒိုင်ကပြေးတာပါ၊ နောက်ဒိုင်က​​တော့ မပြေးလောက်ပါဘူး" ဆို​တဲ့ ​အတွေးမျိုးဝင်လာရင် ကိုယ့်ပါးကိုယ် ဘယ်ပြန်ညာ​ပြန် ​​ညောင်း​တဲ့ထိ ရိုက်ပေးပါ။ ​​ညောင်းလာရင် ဘေးကလူ​တွေကို ​ထပ်ရိုက်ခိုင်းပါ။ (စိတ်ချရ​တဲ့ စုမဲ​တွေ ရှိ​​တော့ရှိတယ် ရှားပါတယ်။)  

စုမွဲ https://www.facebook.com/fireflypsk/posts/156783225659961/

"​အမြတ်​ငွေ တစ်လ ၂၀%၊ ၅၀% လောက်ပေးမယ်ဆို​တဲ့ အင်တာနက်က​နေ​​​တွေ့​တဲ့ ဘာလုပ်ငန်းလုပ်မှန်း ဂဃနဏ မသိရ​တဲ့ လူ​တွေဆီမှာ ရင်းနှီးမြှုပ်​နှံထားတယ်​လေ။" 

လိမ်​နေတာဆိုတာ ​သေချာသလောက်ရှိ​နေပြီ။ ​အချို့က နှစ်ရှည်လများလိမ်စားတာ။ မလုပ်ပါ​နဲ့လို့​ သတိပေးတာ​​တောင် "လိမ်​နေတာ သက်​သေရှိမှ ​ပြောပါ" ဆို​​တော့ "ဟုတ်​ကဲ့ ​ရေစက်လေးသာ ချလိုက်ပါခင်ဗျာ" ပေါ့။ Trading, Forex, Cryptocurrency, Bitcoin, Game စ​တဲ့ နာမည်​တွေ လှိုင်လှိုင်သုံးပြီး လိမ်စား​နေကြတာ။ ​အ,​တဲ့သူ​တွေ ​ခံကြရဦးမယ်။  

ဒီလိုမျိုး​တွေ ရင်းနှီးမြှုပ်​နှံကြ​​တော့ ​ငွေ ဆုံးရှုံးကြရတာလည်း မဆန်းပါဘူး။ ရင်းနှီးမြှုပ်​နှံ​နေတာမှ မဟုတ်တာ။ မ​ရေရာ မတတ်ကျွမ်း​တဲ့​နေရာ​တွေမှာ ​​လောင်းကစား လုပ်​နေကြတာ​လေ။ "လူမိုက်​နဲ့​ငွေ ​အတူမ​နေ" ဆိုတာကို သတိမူပါ။ 

တစ်ကယ့်တစ်ကယ် ​အစစ်​အ​မှန် ရင်းနှီးမြှုပ်​နှံမှုမျိုး​တွေကို​​တော့ ကျွန်​​တော်တို့ ​​အများစုက မကြိုက်ကြဘူးခင်ဗျ။ ဥပမာ ပိုင်ဆိုင်မှုခိုင်မာ​တဲ့ ဆိုင်ခန်း တိုက်ခန်း ငှါးစားမယ်။ ​ငှါးခ ​အမြတ်​နဲ့တွက်ရင် အရင်း​ကျေဖို့ ၁၀ နှစ်​​ကျော်ကြာမယ်။ "ဟာ ကြာလိုက်တာ​​နော်" လို့ ​ပြော​မဲ့ သူ​တွေက များပါတယ်။ ​ငွေတိုးပေးစားသလိုမျိုး၊ ​အလိမ်​တွေကို ​ငွေအပ်ထားသလိုမျိုး၊ ချက်ချင်းဝယ် ချက်ချင်းမြတ် ပူ​​ဖောင်း ဖြစ်​နေ​တဲ့ကာလမှာလိုမျိုး မြတ်တာမျိုးကိုပဲ စိတ်ဝင်စားကြတာ​လေ။ 

တစ်နှစ်ကို ​ငွေကြေး​​ဖောင်းပွမှုကို ကာမိပြီး ၅% တို့ ၁၀% တို့လောက်ပဲ မြတ်​တဲ့ ရင်းနှီးမြှုပ်​နှံမှုမျိုးဆို ရင်မခုန်ကြဘူးခင်ဗျ။ ​ဘဏ်တိုးလောက်​​တောင် မရဘူးဆိုပဲ။ 

ဘဏ်တိုးနဲ့ ​လောက်ပြီလား 

ဒီ​​​​တော့ ရှင်းရှင်းပဲ​ပြောပါရ​စေ။ ရင်ခုန်ချင်ရင် ​​လောင်းကစားလုပ်ပါ။ ရင်​အေးချင်ရင် ​အမြတ်နည်း​ပေ​မဲ့ ​အမြတ်​သေချာပြီး တစ်ကယ် စိတ်ချရ​တဲ့ ရင်းနှီးမြှုပ်​နှံမှုမျိုး ရှာပြီးလုပ်ပါ။ ​ငွေ​ထည့်ထားပြီး စိတ်ပူရလွန်းလို့ ညဘက် အိပ်​​မ​​ပျော်​မဲ့ လုပ်ငန်းမျိုးမှာ ​ငွေမ​​ထည့်ပါ​နဲ့။ 

ရင်းနှီးမြှုပ်​နှံတယ်ဆိုတာ ပျင်းစရာ​​ကောင်း​နေရပါမယ် ခင်ဗျ။ ညဘက်​မှာ စိတ်ချလက်​ချ အိပ်​ပျော်ရပါမယ်။ 

​ပြောစကားတစ်ခုကြားဖူးပါတယ်။ "ရင်းနှီးမြှုပ်​နှံတယ်ဆိုတာ ​နံ​ရံဆေးသုတ်ပြီးရင် ​​စောင့်ကြည့်​နေရသလိုမျိုး၊ မြက်ပင်​တွေ ရှည်လာတာကို ​​စောင့်ကြည့်​နေရသလိုမျိုး ပျင်းစရာ ​​ကောင်းသင့်ပါတယ်" တဲ့။ ​

အိမ် နံ​ရံဆေးက ချက်ချင်း မခြောက်ပါဘူး။ ​အချိန်တစ်ခုပေးရင် ကျိန်း​သေခြောက်တယ်။ ပူစရာ မလိုဘူး။ စိတ်မရှည်ပဲ သွားသွားကိုင်ကြည့်​နေရင် လက်ကို ဆေး​ပေမယ်။ ​နံ​ရံ ဆေးပျက်မယ်။ 

မြက်ပင်​တွေလည်း တစ်​​နေ့ ရှည်လာမှာ သိတယ်။ ချက်ချင်းကြီး ဖြစ်လာမှာ မဟုတ်ဘူး။ ကိုယ်လုပ်ချင်ရာကို သွားလုပ်​နေ။ ​အချိန်​​တန်ရင် မြက်​တွေ ရှည်လာလိမ့်မယ်။ ထိုင်​​စောင့်ကြည့်​နေရတာ ပျင်းစရာ ကြီး။ 

ကျွန်​​တော်လည်း မြက်ပင်​တွေ ထိုင်ကြည့်ရတာ ပျင်းလွန်းလို့ စာထိုင်ရေး​နေပါတယ်။ 

အားလုံး ကိုယ်စိတ် နှစ်ဖြာ ကျန်းမာ ချမ်းသာကြပါ​စေ ခင်ဗျာ။ 

ဆက်​လက်​၍ ဖတ်​ရန်
ပိုးစုန်းကြူး ငွေးကြေးဆိုင်ရာ ဗဟုသုတ 

Credit: 
Firefly ပိုးစုန်ကြီး Personal Blog Page မှကူးယူထားသည်