အချို့က အိမ်ငှါးနေကြပါတယ်။ အချို့က အိမ်ဝယ်ပြီး နေကြပါတယ်။
အိမ်ငှါးနေတာနဲ့ အိမ်ဝယ်နေတာ ဘယ်ဟာ ပိုကိုက်သလဲလို့မေးရင်တော့ တိကျတဲ့အဖြေ မရှိပါဘူး။ အခြေအနေပေါ် မူတည်ပါတယ်။
ရှင်းပြပါရစေ။
လူတစ်ယောက် တိုက်ခန်း ငှါးနေတယ်။ ငှါးခ တစ်လ တစ်သိန်းပေးရတယ်။ အဲဒီတိုက်ခန်းကို ဝယ်ရင် သိန်း ၁၀၀ ပေးရမယ် ဆိုပါစို့။
#ဥပမာ (၁) သူ့မှာ ဝယ်ဖို့ ငွေ သိန်း ၁၀၀ လည်းရှိတယ်။ ဒါပေမဲ့ အဲဒီ သိန်း ၁၀၀ ကို တစ်လ နှစ်သိန်း ပုံမှန် အမြတ်ရနေတဲ့ လုပ်ငန်းထဲ ထည့်ထားတယ်။ ဒါဆို ဒီလူ ငှါးနေတာ ပိုကိုက်ပါတယ်။ ငွေ သိန်းတစ်ရာရင်းပြီး အိမ်ငှါးခပေးပြီးတာတောင် တစ်လ တစ်သိန်း ငွေပိုထွက်နေပြီ။ တိုက်ခန်းကိုသာဝယ်လိုက်ရင် တစ်လ တစ်သိန်း ငွေပို ထွက်မလာတော့ဘူး။
#ဥပမာ (၂) သူ့မှာလည်း ဝယ်ဖို့ ငွေ သိန်း ၁၀၀ ရှိတယ်။ အဲဒီငွေကို ဘာစီးပွားရေးမှ မလုပ်အားလို့ ဘဏ်မှာ စာရင်းသေ အပ်ထားတာ တစ်နှစ် အတိုး၁၀ သိန်း ရနေတယ် ဆိုပါစို့။ အိမ်ငှါးခ တစ်နှစ် ၁၂ သိန်း၊ ဘဏ်က ပြန်ရတာက တစ်နှစ် ၁၀ သိန်း။ တစ်နှစ် ၂ သိန်း စိုက်နေရပြီ။ ဒီလူကတော့ အိမ်ဝယ်သင့်ပါတယ်။ အိမ်ဝယ်လိုက်ရင် တစ်နှစ် ၂ သိန်း မစိုက်ရတော့ဘူး။ နောက်ပြီးတော့ အများအားဖြင့် တိုက်ခန်းက ဘဏ်မှာ အပ်ထားတဲ့ ငွေထက် ငွေကြေးဖောင်းပွမှုကို ကာကွယ်ပေးနိုင်ပါတယ်။
#ဥပမာ (၃) သူ့မှာ ဝယ်ဖို့ ငွေ သိန်း ၅၀ ပဲရှိတယ်။ အဲဒီငွေကို ဘဏ်မှာစာရင်းသေထည့်ထားတာ တစ်နှစ် ၅ သိန်း ရနေတယ် ဆိုပါစို့။ ဝယ်မယ်ဆို ဘဏ်က သိန်း ၅၀ ထပ်ချေးရပါမယ်။ တစ်နှစ် အတိုး ၆ သိန်းခွဲ ပေးရမယ်။ တိုက်ခန်းဝယ်လိုက်ရင် ဘဏ်ကို ပေးရမယ့် အတိုး ၆ သိန်းခွဲရယ်၊ ဆုံးရှုံးမယ့် စာရင်းသေ ဘဏ်တိုး ၅ သိန်းရယ်ဆိုတော့ စုစုပေါင်း ၁၁ သိန်းခွဲ။ အိမ်ငှါးခပေးနေရတဲ့ တစ်နှစ် ၁၂ သိန်းထက် ပိုကိုက်ပါတယ်။ ဘဏ်ချေးငွေကို ပြန်ဆပ်နိုင်လောက်တဲ့ ပုံမှန်ဝင်ငွေရှိတဲ့သူဆို ဝယ်သင့်ပါတယ်။ ချေးသင့်ပါတယ်။
#ဥပမာ (၄) သူ့မှာ ဝယ်ဖို့ ငွေ တစ်ပြားမှ မရှိဘူး။ ဝယ်မယ်ဆို ဘဏ်က ချေးဖို့လည်း မလွယ်ဘူး။ ဒါပေမဲ့ တစ်လ ၂ ကျပ်တိုးနဲ့ "သက်သက်သာသာ" ချေးပေးမယ့်သူရှိတယ်။ အပြင်မှာ ၅ ကျပ်တိုး ၁၀ တိုးတွေကြား ၂ ကျပ်တိုးဆိုတော့ ဂေါ်တာပေါ့။ သိန်း ၁၀၀ ဆိုတော့ တစ်လ ၂ သိန်း အတိုးပေးရမယ်။ အိမ်ငှါးနေရင် တစ်လ တစ်သိန်းပဲကုန်မှာ။ ခုက အတိုးတင် တစ်လ ၂ သိန်း ဖြစ်နေပြီ။ ဒီလိုဆို မဝယ်သင့်သေးပါဘူး။ ငွေအရင်စုပါဦး။
ဒီတော့ အိမ်ဝယ်သင့်မဝယ်သင့်၊ ငွေချေးပြီး ဝယ်သင့်မသင့် ဆိုတာက ပုံသေပြောလို့မရပဲ အရှုံးအမြတ်ကို သေချာတွက်ကြည့်ပြီးမှ ပြောလို့ရတာမျိုးပါ။ စဥ်းစား ဆင်ခြင်တတ်ကြပါစေ။
ကျွန်တော် ပေးထားတဲ့ ဥပမာက ရိုးရှင်းလွန်းပါတယ်။ အပြင်မှာ အိမ်ဝယ်မယ်ဆို တွက်ကိန်းတွေက ဒီ့ထက်မက ရှုပ်ထွေးနိုင်ပါတယ်။ တန်ဖိုး သင့်မသင့်၊ ဗိုက်နာဈေးနဲ့ ရမရ၊ ဈေးကွက် အလားအလာ၊ အရှုပ်အရှင်း ရှိမရှိ၊ ပိုင်ဆိုင်မှု ခိုင်မာမမာ၊ အိမ်ရဲ့ သက်တမ်း၊ ရှိနေတဲ့ အိမ်ကို ရောင်းပြီး အသစ်ဝယ်တာမျိုး၊ ကားရောင်း၊ လယ်ရောင်းပြီး တိုက်ခန်းဝယ်တာမျိုး၊ သိန်း ၂၀၀ တန်မှာ ငှါးနေရာကနေ သိန်း ၁၀၀ တန်ကို ဝယ်ဖို့ စီစဥ်တာမျိုး၊ ဝယ်ပြီး ပြန်ငှါးစားတာမျိုး စသဖြင့် အခြေအနေ အမျိုးမျိုးရှိနေနိုင်ပါတယ်။
ပြီးတော့ တွက်ရလွယ်အောင် သိန်း ၁၀၀ တန် တိုက်ခန်းကို တစ်လ ငှါးခ တစ်သိန်းနဲ့ တွက်ပေးထားပေမဲ့ ကာလဒေသပေါ်မူတည်ပြီး ငှါးခ နည်းတာများတာ ကွာနိုင်ပါတယ်။ သိန်း ၁၀၀ တန် တိုက်ခန်းလည်း ရှာရခက်ပါတယ်။ ရောင်းဈေး ငှါးခ အတိအကျကို ပြောချင်တာမဟုတ်ပဲ စဥ်းစားပုံစဥ်းစားနည်း တွက်နည်းလေးကို မီးမောင်းထိုးပြရုံပါ။ ဘာပဲပြောပြော ကျွန်တော်ပေးတဲ့ ချင့်ချိန်တွက်နည်း ဥပမာဟာ တစ်ထောင့်တစ်နေရာက အသုံးဝင်မယ်ထင်လို့ ရေးတင်လိုက်ရပါတယ်။
ဆက်လက်၍ ဖတ်ရန်
ပိုးစုန်းကြူး ငွေးကြေးဆိုင်ရာ ဗဟုသုတ
Credit:
Firefly ပိုးစုန်ကြီး Personal Blog Page မှကူးယူထားသည်
No comments:
Post a Comment