ကွမ်းစကား

ဆရာကြီး ဦးသု​​မောင်က​​ "ကွမ်းစကား" ဆိုပြီး ​​စာတွေ ​ရေး​ခဲ့ပါတယ်။ အရည်လည်းမရ ​အဖတ်လည်းမရ၊ ဒါ​ပေ​မဲ့ တစ်စုံတစ်ရာ ​အရသာကိုပေး​တဲ့ ကွမ်းယာလိုပဲ သူရေး​တဲ့ စာတွေဟာလည်း ​အရည်လည်းမရ ​အဖတ်လည်းမရ​ပေ​မဲ့ ဖတ်လို့​​ကောင်း​​တဲ့ သ​ဘောမို့ ဒီလို ​​ခေါင်းစဥ် ပေး​ခဲ့တာပါ​တဲ့။ ​

ကျွန်​​တော် ဒီ​​နေ့ရေးမယ့် ​ကွမ်းစ​ကားက​​တော့ ​​အရသာ ရှိမယ် မထင်ဘူးခင်ဗျ။ ​ကွမ်းသမား​တွေ ​အတွက် ဝါးမိရင် သွားနာ၊ မျိုချရခက်​၊ ထုံးပေါက်သလို ​ခံရခက်တဲ့ စာတစ်ပုဒ် ဖြစ်ပါလိမ့်မယ်။

ကဲ စ ဝါးလိုက် ကြရအောင်။ ဗမာဆေး အာမွှေး နွယ်ချို ထုံးများများ​နဲ့ တစ်ထုပ် မြန်​မြန်လေး။

စီးပွားရေးဘက်ကကြည့်ရင် ​ကွမ်းစားတာ ​ကိုယ့်​အတွက် ငွေ​အပို ကုန်ပါတယ်။ ကွမ်းဝါး​​နေရင် ဗိုက်မဆာလို့ ​သွားရည်စာဖိုး ငွေ မကုန်ဘူးလို့ ​ပြော​ပေ​မဲ့ ဟုတ်မဟုတ် ​​တော့ ​​သေချာ ပြန်တွက်ကြည့်ကြပါဦး။ ကွမ်းစားလို့ ထမင်းတစ်နပ် လျှော့စားဖြစ်သွားလား၊ အာဟာရ ဖြစ်သွားလား​​ ဆိုတာကိုပါ။

လက်ရှိမှာ​ ငွေပိုကုန်ရုံတင်မက လုပ်ငန်း​ အခွင့်​အရေး​တွေလည်း ဆုံးရှုံးနိုင်ပါတယ်။ သွား​တွေ ကွမ်းချိုးတက်​နေလို့ ​အလုပ် မခန့်ချင်​တဲ့ ​အလုပ်ရှင်​တွေ ရှိမှာပါ။ ​အထူးသဖြင့် လူ​အများ​နဲ့ ထိ​​တွေ့ဆက်​ဆံ ​​ဝန်​ဆောင်မှုပေးရ​တဲ့ လုပ်ငန်း​တွေမှာ တစ်ကိုယ်ရည်သန့်ရှင်းမှု၊ ​ခံတွင်း စင်ကြယ် သန့်ရှင်းမှု လိုအပ်ပါတယ်။ ​လာလျှောက်​တဲ့ လူနှစ်ယောက်မှာ အရည်​အချင်း ​အားလုံးတူရင် ​အလုပ်ရှင်​တွေက​​ ကွမ်းမစား​တဲ့ သူကို ရွေးကြမယ် ထင်ပါတယ်။ နောက်ပိုင်းမှာ​​တော့ ကွမ်းစားသူများ​အတွက် လုပ်ငန်းခွင်မှာ တန်းတူ​အခွင့်​အရေး ရရှိရေး ဘာညာ လှုပ်ရှားမှု​တွေ လုပ်လာရင်​​တော့ မသိပါဘူး။

ကွမ်း​ရဲ့ ဆိုးကျိုးဟာ ဒီလောက်​နဲ့ ရပ်မသွား​ပြန်ပါဘူး။ သွား​တွေ ပျက်စီးတယ်။ ညိုညစ်ပြီး မည်းလာမယ်။ သွားနာမယ်၊ သွားဖုံးနာမယ်။ ပါးစပ်ကင်ဆာ၊ လျှာကင်ဆာ၊ သွားဖုံး ကင်ဆာ၊ လည်​​ချောင်းကင်ဆာ​တွေ ဖြစ်နိုင်တယ်။ ကွမ်းစားများလို့ လျှာကင်ဆာဖြစ်ပြီး ​သေသွား​တဲ့သူကို တွေ့ဖူးပါတယ်။

​ရောဂါ​တွေ ဖြစ်လာရင် ဆေးကုဖို့ ​ငွေကုန်​​တော့မယ်။ ကွမ်းသမား​တွေ​ ​အ​နေနဲ့ မိ​အေး ​နှစ်ခါနာ​​တောင် မကပါဘူး၊ အခါခါနာ ဖြစ်ရပါတယ်။

"ခု​​တော့ စားလိုက်ဦးမယ်။ ​​နောင်ဖြစ်မှ ​ခံလိုက်မယ်" လို့ မတွေးပါ​နဲ့။ ​​နောင်ဖြစ်​တဲ့​အခါ ဆေးကုဖို့ ကိုယ့်မှာ ​ငွေမရှိရင် ​သောကရောက်ရမယ့် သူ​တွေက ကိုယ့်ဘေးက ​ဇနီးမယား သမီးသား​တွေပါ။ ကိုယ် လျှာ သရမ်းမိလို့ ​ရောဂါဖြစ်​တဲ့​အခါ နွမ်းပါး​တဲ့ သားသမီး​တွေကို ဝန်ထုပ်​ဝန်ပိုး ဖြစ်​​​စေရင် မ​ဟန်ပါဘူး။ ​"မကုပေး​နဲ့ ရတယ်" လို့ ​ပြော​ရတာ လွယ်ပေ​မဲ့ ကိုယ့်ကိုချစ်​တဲ့ သားသမီး ဆွေမျိုး​တွေ​အတွက်တော့ စိတ်​ဒုက္ခ ခံစားရရှာမှာပါ။

ကွမ်းစား​တဲ့သူ​တွေ ​အတွက်ပဲ ဆိုးကျိုးရှိတာလား ဆို​​တော့ မဟုတ်​ပြန်ပါဘူး။ ဘေးပတ်ဝန်းကျင် ​အတွက်လည်း မ​​ကောင်း​ပါဘူး။ စည်းကမ်း​မဲ့ ထွေး​နေ​တဲ့ ကွမ်း​တံတွေး​တွေက​နေ ​ရောဂါကူးတာ​တွေ ဖြစ်နိုင်ပါတယ်။ ​

နိုင်​ငံ​အတွက်လည်း ​ငွေ​အပို ကုန်ပါတယ်။ လမ်း​တွေ ​အဆောက်အဦး​တွေမှာ ​ပေ​နေ​တဲ့ ကွမ်း​တံတွေးတွေကို ရှင်းလင်း ဆေး​ကြောရတာ ​ငွေ​အကုန်​အကျ ရှိပါတယ်။ ဘယ်သူ့ ပိုက်​ဆံ​တွေ ကုန်လဲဆို​​တော့ ပြည်သူ့ပိုက်​ဆံ​တွေပါ။ ​​အကုန်​ခံပြီး သန့်ရှင်းရေးမလုပ်ထား​တဲ့​နေရာ​တွေမှာ​​တော့ ​အော်ဂလီ​ဆန်ချင်စရာ ညစ်ပတ်​ပေ​ရေပြီး မြို့ရွာ​​ရဲ့ ပုံရိပ်ကို ထိခိုက်​စေပါတယ်။ ညစ်ပတ်လို့ ခရီးသွား ဧည့်သည်​တွေ လာမလည်ကြရင် နိုင်​ငံ​အတွက် ဝင်​ငွေ ဆုံးရှုံးမှု​တွေ ရှိပါတယ်။

ကား​​ပေါ်က​နေ လှမ်း​လှမ်းထွေး​နေကြတာ၊ လမ်းသွားရင်း လမ်းဘေးထွေး​​နေကြတာ​တွေဟာ အရမ်းအောက်တန်းကျ​တဲ့ ​အပြု​အမူ​တွေပါ။ ​အနည်းဆုံး ကိုယ်ယူလာ​တဲ့ အိတ်ထဲကို စနစ်တကျထွေးသင့်ပါတယ်။ ​

လက်ရှိမှာလည်း ​ငွေလည်းကုန်၊ ​အလုပ်​အကိုင် ​အခွင့်​အရေးလည်း လျော့ကျ၊ ကျန်းမာရေးကိုလည်း ထိခိုက်​စေ၊ ပတ်ဝန်းကျင်​နဲ့ နိုင်​ငံကိုလည်း ဆိုးကျိုးပေး​နေ​တဲ့ ကွမ်းကို ​ဖြတ်ကြပါစို့လား ခင်ဗျာ။ ​​ပြောင်းလဲ ချိန်​တန်ပြီ၊ ​​ပြောင်းလဲသင့်တယ် ဆို​တဲ့ ​အထဲမှာ ဒါလည်း ပါ ပါတယ်။

ကွမ်းယာလုပ်ငန်း​နဲ့ စီးပွားလုပ်​နေ​တဲ့ သူ​တွေလည်း ကွမ်းစား​တဲ့ သူ​တွေ တစ်​ဖြည်း​ဖြည်း လျော့နည်းလာတာ​နဲ့​အမျှ ​အခြားစီးပွားရေး လုပ်ငန်း​တွေကို ​​ပြောင်းဖို့ ​အချိန်ရမှာပါ။ ​​

တိုးတက်​ ချမ်းသာနေ​တဲ့ နိုင်​ငံ​တွေမှာ ကွမ်းယာလုပ်ငန်းမရှိပါဘူး။ ဒီနိုင်​ငံမှာ ကွမ်းယာလုပ်ငန်း တိမ်​ကောသွားလို့ လူ​တွေ ထမင်း ငတ်သွားကြမယ်လို့ မထင်ပါဘူး ခင်ဗျာ။ ကွမ်း​​တော့ ငတ်သွားကြမှာပါ။ အဲဒါ​​တော့ ငတ်ပါ​စေ​​ပေါ့။

အားလုံး ကိုယ်စိတ် နှစ်ဖြာ ကျန်းမာ ချမ်းသာကြပါ​စေ ခင်ဗျာ။

ဆက်​လက်​၍ ဖတ်​ရန်
ပိုးစုန်းကြူး ငွေးကြေးဆိုင်ရာ ဗဟုသုတ 

Credit: 
Firefly ပိုးစုန်ကြီး Personal Blog Page မှကူးယူထားသည်