သေ​မြေကြီး ရှင်ရွှေထီး

​စီးပွားရေးလုပ်​တဲ့​အခါ ​risk လို့​​ခေါ်​တဲ့ အရင်း​အနှီး ဆုံးရှုံးမှု ​အန္တရာယ် ရှိပါတယ်။ စွန့်စားရပါတယ်။

Risk က​​တော့ စီးပွားရေးမလုပ်ပဲ ​ငွေပုံ​​ပေါ် ဒီတိုင်း ထိုင်​နေရင်လည်း ရှိပါတယ်။ ​ငွေကို အိမ်မှာထားရင် သူခိုးနောက် ပါသွားနိုင်​တဲ့ risk ရှိပါတယ်။ ဓားပြတိုက်​ခံရနိုင်​တဲ့ risk ရှိပါတယ်။ မီး​​လောင်လို့ ပါသွားနိုင်​တဲ့ risk ရှိပါတယ်။ ​ငွေကြေး​​ဖောင်းပွမှု​ဒဏ် risk ရှိပါတယ်။

ဒီ​​တော့ risk ကို ​​ရှောင်လို့မရပါဘူး။ ဒါ​ပေ​မဲ့ risk နည်းနိုင်သမျှနည်းအောင် ကာကွယ်ဖို့​​တော့ လိုပါတယ်။

ကျွန်​​တော်က စီးပွားရေးလုပ်​တဲ့​​အခါ သတိထားလုပ်ဖို့၊ ကျွမ်းကျင်မှလုပ်ဖို့ ​အကြိမ်ကြိမ် ​ပြော​ခဲ့ပါတယ်။ မကျွမ်းကျင်ရင် စီးပွားရေးလုပ်ရင်း စီးပွားပျက်နိုင်​​ကြောင်းကို​လည်း ဥပမာ​တွေ​နဲ့ ရေး​ခဲ့ပြီးပါပြီ။

မာ့ခ်တွိန်းရဲ့ အရှုံး https://www.facebook.com/fireflypsk/posts/156002222404728/

ဒါ​ပေ​မဲ့ စီးပွားရေးမလုပ်​နဲ့လို့ တား​နေတာ မဟုတ်ပါဘူး။ ချင့်ချိန်ပြီး လုပ်ကြဖို့ ​ပြော​နေတာပါ။ သူများ​တွေ​ရဲ့ ​အမှား​တွေက​နေ သင်ခန်းစာယူနိုင်ဖို့ သတိပေး​နေတာပါ။

​​အချို့​​သော ​ငွေရေးကြေးရေး စာအုပ်​တွေဟာ စီးပွားရေးသမား​တွေကို ​အမွှန်းတင် ရေးသားထားပြီး လခစားသ​မား​တွေကို နှိမ်ချင်ကြပါတယ်။ အဲဒီစာအုပ်​တွေကို ဖတ်ပြီးရင် ​လခစားဘဝကို စိတ်ကုန်လာကြပြီး ​အရဲစွန့် risk ယူပြီး စီးပွားရေးသမား ကောက်လုပ်ချင်စိတ်​တွေ ပေါက်သွားကြပါတယ်။

ခက်တာက လိုအပ်​တဲ့ ​အရင်း​အနှီး​ (လုပ်ငန်း​​ပေါ် မူတည်ပြီး ​အရင်း​အနှီး ​အနည်း​အများကွာပါတယ်) နဲ့ ​စီးပွားရေးဝမ်းစာ မ​ပြည့်သေးပဲ ​​အလျင်စလို ကမူးရှူးထိုး ထ​​လုပ်မိရင် မအောင်မြင်ပဲ ဆုံးရှုံးနိုင်​ခြေ ​အရမ်းများသွားတာပါ။

စီးပွားရေးကို ​အရဲစွန့်ပြီးလုပ်ရင် ချမ်းသာလာနိုင်တာ​​တော့ ​အ​မှန်ပါ။ ဒီလိုလုပ်ရင်း risk ယူပြီးချမ်းသာလာ​​ခဲ့ကြ​တဲ့ သက်​သေ သာဓက​တွေ ​အများကြီး ရှိပါတယ်။ ဥပမာ Jack Ma ဂျက်မာ ​​ပေါ့။

ဒါ​ပေ​မဲ့ လူ​တွေက ဂျက်မာ အောင်မြင်သွားတာကိုပဲ မြင်ကြတာကိုး။ ဂျက်မာလို ကြိုးစား​ခဲ့​တဲ့ လူ​​ပေါင်းများစွာ​ မအောင်မြင်ပဲ ခွေးဖြစ်သွားတာကို​​တော့ မမြင်ကြပါဘူး။ ဘယ်မြင်ကြမှာလဲ။ စီးပွားပျက်လို့ လမ်းဘေးရောက်ပြီး မွဲ​တေသွား​တဲ့လူ​တွေကို အရေးတယူလုပ် စင်​​ပေါ်တင်ပြီး ​ဟော​ပြောခိုင်းတာ မရှိသလောက် ရှားလို့ပါ။

ဂျက်မာကို ​အားမကျ​နဲ့လို့ ​ပြောတာမဟုတ်ပါဘူး။ ​အားကျပါ။ သူ့လို ဖြစ်အောင် ကြိုးစားကြပါ။ ​အားပေးပါတယ်။ ​​မြန်မာပြည်မှာ ဒီလို ဖောက်ထွက်အောင်မြင်​တဲ့ လုပ်ငန်းရှင်​တွေ ​အများကြီး လိုအပ်ပါတယ်။ ဒါ​ပေ​မဲ့ ကြိုးစားတိုင်း ဖြစ်မလာတတ်တာကို သိ​နေဖို့ လိုပါတယ်။ ကြိုးစားသမျှ ​အရာထင်အောင် ကြိုတင် ​​လေ့လာပြင်ဆင်ထားပြီး ဝမ်းစာ​​ဖြည့်ထားဖို့လိုပါတယ်။
​
ဘုရင့်​​နောင် ​​ဖောင်ဖျက်တယ်၊ risk ယူတယ်ဆိုတာ ဘုရင့်​​နောင်လို တိုက်ရည်ခိုက်ရည် စစ်ရေးကျွမ်းကျင်​တဲ့ ​​ခေါင်း​ဆောင်မျိုးမို့ အောင်မြင်တာပါ။ ဘုရင့်​​နောင်ဟာ စစ်ပညာ မကျွမ်းကျင်ပဲ ​​စစ်အင်​အား ၈ ဆကြီး​တဲ့ တပ်ကို ​အနိုင် ​​တိုက်လိုက်နိုင်မှာ မဟုတ်ပါဘူး။

ဟိုး​​​ရှေးရှေးတုန်းက ​မြန်မာပြည်မှာ ပိုးစုန်းကြူးဆို​တဲ့ စစ်သူကြီး တစ်ပါးရှိသ​တဲ့။ ဘုရင်​နဲ့ ​အမျိုး​​တော်လို့သာ စစ်သူကြီးဖြစ်လာတာ၊ ဘာစစ်ပညာမှ တတ်တာ မဟုတ်ဘူးရယ်။ ဒီလို​နဲ့ သူဟာ စစ်ပွဲတစ်ပွဲမှာ ဘုရင့်​​နောင်ကို ​အားကျပြီး "သေ​မြေကြီး ရှင်​ရွှေထီး" ပဲ ဆိုပြီး စွန့်စားပစ်လိုက်တယ်။ ဘုရင့်​​နောင်လုပ်သလို လိုက်လုပ်တယ်။ ​​ဖောင်ဖျက်ပြီး စစ်အင်​အားကြီး​တဲ့ ​ရန်သူကို သွားတိုက်တယ်။

စစ်တိုက်မကျွမ်းကျင်​​တော့ တိုက်ပွဲမှာ ပွဲချင်းပြီးပဲ။ စစ်သူကြီး ပိုးစုန်းကြူးဆိုတာကိုလည်း ​မြန်မာ့သမိုင်းမှာ ​အထူးတလည် မသင်ရပါဘူး။ ဘယ်သင်ရပါ့မလဲ၊ စစ်မတိုက်တတ်ပဲ မိုက်ရူး​ရဲ သွားလုပ်မိတာကိုး။ သမိုင်းမှာ နာမည်ဆိုး​နဲ့ မ​ကျန်​ခဲ့တာ​​တောင် ​ကံ​​ကောင်းလို့။ ဘုရင့်​​နောင်ကို ​အားကျပြီး လိုက်လုပ်ရာက ရှင်ရွှေထီးမဖြစ်ပဲ ​သေ​မြေကြီး ဖြစ်ကုန်​တဲ့ စစ်သူကြီး ပိုးစုန်းကြူးလို လူမိုက်​တွေ ဘယ်နှစ်ယောက်များ ရှိ​ခဲ့ပြီလဲ။

ဒီ​​တော့ ဘုရင့်​​နောင်လို စွန့်စားချင်ရင် ဘုရင့်​​နောင်လိုစစ်မဟာဗျူဟာ​တွေ နားလည်အောင် ​အရင်လုပ်ရမှာပါ။ ​အဆင့်မ​​ကျော်ပါ​နဲ့။

​အချို့ကလည်း ​​သနားဖို့ ​​ကောင်းတယ်ခင်ဗျ။ ကိုယ်​နဲ့ ​အပြင်မှာလည်းမသိ၊ နာမည်​​တောင် ​အ​မှန်မသိ​တဲ့လူလိမ်​တွေကို "စွန့်စားမှ ကြီးပွားမှာမို့ စွန့်စားမယ်၊ လက်တွဲမယ်" လို့ ​ပြောပြီး ​ငွေ​တွေ ပုံပေး​နေကြ​လေ​ရဲ့။ တလွဲ ​ဆံပင်​​ကောင်းပြီး စွန့်စားနေကြ​တာ​​ပေါ့။

အမြင့်မှာ ​ပျံချင်လို့ဆိုပြီး စွန့်စားတာ​​တော့ ဟုတ်ပါပြီ။ စ​​ကောနှစ်ချပ် ချိုင်းကြားညှပ်ပြီး တောင်စွန်း​​ပေါ်​က​နေ ခုန်ချတာမျိုးကို​​တော့ ​အားမပေးပါဘူး။ အယ်ရိုဒိုင်နမစ် ​လေခွင်း​အားပညာကို ​သေချာ​​စူးစမ်း​​လေ့လာပြီးမှ လေထီးကို တီထွင်​ဖန်တီးပြီး စွန့်စားတာမျိုးကို​​တော့ ​အား​ပေးပါတယ်။

ဒီ​​တော့ စွန့်စားပါ။ စွန့်စားရင် ချမ်းသာဖို့ ပို​​မြန်နိုင်ပါတယ်။ ဒါ​ပေ​မဲ့​ ဉာဏ်ရှိရှိ စွန့်စားပါ။ မစွန့်စားခင် ​အထူးပြင်ဆင်ပါ။ ​အန္တရာယ်​တွေကို သိပါ။ ဝမ်းစာ​ကြိုဖြည့်ပါလို့ ​ပြောချင်ပါတယ်။ ​

ဝိလုပ်ချင်ရင် ဝရှိဖို့ လိုပါတယ်။

အားလုံး ကိုယ်စိတ် နှစ်ဖြာ ကျန်းမာ ချမ်းသာကြပါ​စေ ခင်ဗျာ။

ဆက်​လက်​၍ ဖတ်​ရန်
ပိုးစုန်းကြူး ငွေးကြေးဆိုင်ရာ ဗဟုသုတ 

Credit: 
Firefly ပိုးစုန်ကြီး Personal Blog Page မှကူးယူထားသည်