ကျွန်တော့်အနေနဲ့ အိမ်ထောင်ရေးအကြောင်း သိပ်ပြီး ရေးလေ့ရေးထ မရှိပါဘူး။ ကျွန်တော် မကျွမ်းကျင်တဲ့အပိုင်း ဖြစ်နေလို့ပါ။ ဒါပေမဲ့ ငွေရေးကြေးရေးကိစ္စပြောတဲ့အခါ အိမ်ထောင်ရေးကလည်း အရေးကြီးတဲ့အခန်းကဏ္ဍက ပါဝင်တာမို့ လူမေးများတဲ့ မေးခွန်းလေးအတွက် ကြိုးစားပြီး ဖြေပေးလိုက်ပါတယ်ခင်ဗျာ။
"အိမ်ထောင်စောစောပြုတာ ငွေသခင်ဖြစ်ဖို့ နှောင့်နှေးစေသလား" ဆိုတဲ့ မေးခွန်းလေးကို ဖြေရရင်တော့ လူပေါ်မူတည်တယ်လို့ပဲပြောပါရစေ။
ချစ်ခြင်းမေတ္တာတွေ သူချစ်ကိုယ်ချစ်တွေ လျှောက်ပြောနေရင် စာက ဆုံးမှာမဟုတ်တဲ့အတွက် ခဏဖယ်ထားပြီး ငွေရေးကြေးရေးအကြောင်းပဲ ပြောပါရစေ။
အိမ်ထောင်ပြုတဲ့အခါ လူရွေးမှန်ရင် ငွေသခင်ပန်းတိုင်ကို ပိုပြီးအမြန် ရောက်စေမှာဖြစ်ပြီး လူရွေးမှားရင်တော့ ဆင်းရဲတွင်းထဲ နစ်သွားစေနိုင်ပါတယ်။
လင်ရောမယားပါ မောင်တစ်ထမ်းမယ်တစ်ရွက် ငွေရှာနိုင်ပြီး ချွေတာစုဆောင်း ရင်းနှီးမြှုပ်နှံကြရင်တော့ နှစ်ယောက်အားက တစ်ယောက်အားထက် ပိုပြီး တာသွားပါတယ်။ ဒါ့အပြင် တစ်ယောက်က မေ့လျော့ပေါ့ဆပြီး သုံးဖြုန်းလက်ဖွာမိရင် နောက်တစ်ယောက်က သတိပေးတားမြစ်လို့ရမယ်။
နှစ်ယောက်မှာ တစ်ယောက်က ငွေရေးကြေးရေးအကြောင်းနားလည်ပြီး တစ်ယောက်ကတော့ စည်းမရှိကမ်းမရှိ သုံးဖြုန်းနေတတ်ရင် ပြဿနာပါပဲ။ ငွေကြေးစည်းကမ်းရှိတဲ့သူက စည်းကမ်းမရှိတဲ့သူအပေါ် ဩဇာညောင်းရင် တော်ပါသေးရဲ့။ ဒီလိုမှမဟုတ်ရင် အိမ်ထောင်ရေးသောက ရောက်ရပါတော့မယ်။ ကတောက်ကဆ အချင်းများရပါတော့မယ်။ (ဓာတ်ပုံထဲမှာ ပြောထားတဲ့ အဆိုစကားလိုမျိုးပေါ့။)
နှစ်ယောက်လုံးက ဝင်ငွေနဲ့ ထွက်ငွေကို မချင့်ချိန်တတ်ပဲ သုံးဖြုန်းနေကြရင်တော့ သေပြီဆရာ။ ခွေးဖြစ်တော့မှာ။ အကြွေးထောင်ချောက် ဗီဒီယိုလေးထဲကလို ဖြစ်သွားနိုင်ပါတယ်။
ဒီတော့ လက်မထပ်ခင် တစ်ယောက်နဲ့ တစ်ယောက် ပွင့်ပွင့်လင်းလင်း ဆွေးနွေးရမှာက ဝင်ငွေစာရင်း၊ အသုံးစရိတ်စာရင်း၊ ပိုင်ဆိုင်မှု နဲ့ အကြွေးတွေကိုပါ။ (ဒါ့အပြင် တစ်ယောက်နဲ့တစ်ယောက် စရိုက်၊ ဝါသနာ၊ ရည်မှန်းချက် စတာတွေကိုလည်း သိထားဖို့လိုပါတယ်။)
အချို့ အသုံးစရိတ်တွေဟာ လက်ရှိမှာ မိဘက ထောက်ပံ့နေတာမို့ မသိသာလှပေမဲ့ အိမ်ထောင်ပြုပြီးလို့ ကိုယ့်ခြေထောက်ပေါ်ကိုယ် ရပ်တည်ရတဲ့အခါ ဝန်ထုပ်ဝန်ပိုးတွေ ဖြစ်လာနိုင်ပါတယ်။
ဒါတွေကို ပွင့်ပွင့်လင်းလင်း ပြောပြကြပြီးပြီဆိုရင်တော့ လက်ထပ်ပြီးတဲ့အချိန်အတွက် ကြိုတင်တွက်ချက်ရတော့မှာပါ။
လက်ထပ်ပြီးတဲ့အချိန်မှာ ဝင်နိုင်တဲ့ လစဥ် ဝင်ငွေကို ခန့်မှန်း တွက်ချက်ပါ။ ဒီဘက်ခေတ် အမျိုးသမီးတွေဟာ အိမ်ထောင်ပြုပြီးလည်း အလုပ်ဆက်လုပ်ကြတာများပေမဲ့ အချို့အမျိုးသမီးတွေကတော့ လက်ထပ်ပြီးရင် အလုပ်ထွက်ချင်ကြပါတယ်။ ဒါကို သေချာဆွေးနွေးသဘောတူဖို့ လိုပါတယ်။ နှစ်ဦးပေါင်းပြီး စီးပွားရေးလုပ်မယ်ဆိုရင်လည်း ကြိုတင် ပြင်ဆင်ထားပါ။ စီးပွားရေး စီမံကိန်းဆွဲထားပါ။
အိမ်ထောင်သည် ဘဝအတွက် လစဥ် ထွက်ငွေကို ခန့်မှန်း တွက်ချက်ပါ။ အရင်က တစ်ယောက် တစ်နေရာစီ အိမ်ငှါးနေတာဆိုရင် လက်ထပ်ပြီး နှစ်ယောက်ပေါင်း အိမ်ငှါးနေတာ၊ အစားအသောက်ကို နှစ်ယောက်စာ ပေါင်းချက်တာက အများအားဖြင့် ပိုပြီး အကုန်အကျ သက်သာလေ့ရှိတယ်။ အရင်ကလို တစ်ယောက်နဲ့တစ်ယောက် ချိန်းတွေ့ဖို့ လမ်းစရိတ်စားစရိတ်တွေ အကုန်အကျနည်းသွားပါမယ်။ မီတာခတွေ ဖုန်းဘေတွေ သက်သာသွားတတ်ပါတယ်။
ဒါပေမဲ့ အရင်က မိဘအိမ်မှာ ကိုယ်စီနေကြတာ၊ လက်ထပ်ပြီးမှ တစ်အိုးတစ်အိမ်ခွဲနေကြမှာ၊ အိမ်ပိုင်လည်း မရှိဘူးဆိုရင်တော့ ငှါးနေဖို့ အကုန်အကျပိုများလာမှာပါ။ သီးသန့် မိသားစုတစ်စုအနေနဲ့ သာရေးနာရေး ကုန်ကျစရိတ်တွေလည်း ပိုများလာနိုင်တာကို သတိပြုပါ။ မိဘနဲ့ခွဲနေတော့မယ်ဆိုရင် မိဘကို ထောက်ပံ့စရိတ်တွေလည်း သီးသန့် ထားဖို့လိုပါပြီ။
ဒီလို အိမ်ထောင်သည်ဘဝအတွက် ဝင်ငွေနဲ့ ထွက်ငွေကို ခန့်မှန်းတွက်ချက်ထားတဲ့အခါ လက်မထပ်ရခင်ထက် ပိုပြီး စုမိလာမလား၊ စုမိငွေလျော့သွားမလား၊ ဝင်ငွေနဲ့ ထွက်ငွေမမျှ ဖြစ်သွားမလားဆိုတာကို ကြိုတွက်ကြည့်လို့ ရပါပြီ။ ဗေဒင်သွားတွက်ကြည့်နေမဲ့အစား ဒါမျိုးတွက်ကြည့်သင့်တာပါ။
ဝင်ငွေထက် ထွက်ငွေက များနေတဲ့ ဘဝမျိုးဆိုရင်တော့ ငရဲတွင်းထဲကို ခုန်ဆင်းနေတာပါပဲ။ တစ်ယောက်မျက်နှာကို တစ်ယောက်ကြည့်ပြီး ပျော်နေနိုင်ရင်လည်း ခဏပါပဲ။ ထမင်းရည် တူတူသောက်ရင်း အာဟာရမပြည့်ဝရင် ဆေးရုံရောက်ရဦးမယ်။
ဒီတော့ လက်မထပ်ခင်ကတည်းက ဝင်ငွေထွက်ငွေစာရင်းကို ကြိုတင်ခန့်မှန်းတွက်ကြည့်ပြီး ဝင်ငွေထက် ထွက်ငွေက များနေသေးရင် မယူပါနဲ့ဦး။ ဝင်ငွေတိုးဖို့ ကြိုးစားပြီးမှ၊ အခြေခိုင်မှ ယူပါ။ ဒါက အသက်အရွယ်နဲ့ မဆိုင်ပဲ ကိုယ့်ဘဝအခြေအနေနဲ့ပဲ ဆိုင်တဲ့အတွက် ဘယ်အသက်အရွယ်ရောက်မှ အိမ်ထောင်ပြုပါလို့တော့ မပြောလိုပါဘူး။
မင်္ဂလာဆောင်တဲ့အခါမှာလည်း ချွေတာဖို့ လိုပါတယ်။ မိဘက ချမ်းသာလို့၊ သုံးနိုင်ဖြုန်းနိုင်တဲ့ အဆင့်မှာမို့ သူတို့စရိတ်နဲ့ ဆောင်ပေးတယ်ဆိုရင်တော့ ထားပါ။ ကိုယ့်ငွေနဲ့ ကိုယ် မင်္ဂလာဆောင်တာဆိုရင်တော့ ဇာမချဲ့ချင်ကြပါနဲ့။ အကြွေးတင်ခံပြီး မင်္ဂလာဆောင်တယ်၊ ဟန်းနီးမွန်းထွက်တယ်ဆိုတာ လူမိုက်တွေ လုပ်တဲ့အလုပ်ပါ။
အပေါ်က ပြောတဲ့ ကုန်ကျစရိတ်တွေထဲမှာ ကလေးမွေးတဲ့အကြောင်း ထည့်မပြောရသေးပါဘူး။ ကလေးမယူခင် တွက်ချက်ပြင်ဆင်စရာတွေကို စာတစ်ပုဒ်ရေးပါဦးမယ်။ ကြိုတင် မတွက်ချက်မပြင်ဆင်ပဲ ကလေးယူမိရင် နောင်တရတတ်ပါတယ်။
ဒါကတော့ အိမ်ထောင်ရေးနဲ့ ပတ်သက်ပြီး ငွေရေးကြေးရေး မျက်လုံးနဲ့ ကြည့်တဲ့အမြင်ပါ။ ဒါပေမဲ့ အခြားမျက်လုံးတွေနဲ့လည်း ကြည့်ဖို့လိုပါတယ်။ ငွေမျက်နှာတစ်ခုတည်းကိုကြည့်ပြီး အိမ်ထောင်ပြုတာကလည်း အစွန်းရောက်လွန်းပါတယ်။ နှလုံးသားနဲ့ရော ဦးနှောက်နဲ့ပါ မျှမျှတတစဥ်းစားရမှာပါ။
ဒါနဲ့ ဓာတ်ပုံထဲမှာပါတဲ့ စာကြောင်းလေးကို အတည်မယူပါနဲ့။ အိမ်ထောင်သည်တွေကို အပျော်အပြက် စတာပါ။ (ရန်ဖြစ်ထားတဲ့ အချိန်တော့ မှန်ချင်မှန်မှာပေါ့။ လင်နဲ့မယား လျှာနဲ့သွားဆိုတော့လည်း ခက်သားလား။) အိမ်ထောင်ရေး သာယာလို့ စိတ်ချမ်းသာရတဲ့သူတွေလည်း အများကြီးပါခင်ဗျာ။
လူသားအားလုံး ဉာဏ်ပညာနဲ့ ချစ်ခြင်းမေတ္တာရှိကြပါစေ။
ဆက်လက်၍ ဖတ်ရန်
ပိုးစုန်းကြူး ငွေးကြေးဆိုင်ရာ ဗဟုသုတ
Credit:
Firefly ပိုးစုန်ကြီး Personal Blog Page မှကူးယူထားသည်
No comments:
Post a Comment