အကြွေး​ထူ​တဲ့ ​အ​မေရိ​ကန်

​အ​မေရိ​ကန် နိုင်​ငံသား​တွေ​ အကြွေးတင်​နေပါတယ်။

​​​ကျောင်းစရိတ်​အကြွေး၊ အိမ်​အကြွေး၊ ကား​အကြွေး စ​တဲ့​ ​ဘဏ်က တိုက်ရိုက်ချေးထား​တဲ့ အကြွေး​တွေကို ​​ထည့်မတွက်ပဲ ​ခရက်ဒစ်ကဒ်လို့ ​​ခေါ်​တဲ့ ​အကြွေးဝယ်ကဒ် သုံးလို့ တင်​နေ​တဲ့ ​အကြွေး​တွေကိုပဲ ကြည့်ရအောင်။

#ခရက်ဒစ်ကဒ်

အ​မေရိ​ကန် ပြည်​​ထောင်စုမှာ ​ခရက်ဒစ်ကဒ် သုံးတာ ​ရေပန်းစားပါတယ်။

ခရက်ဒစ်ကဒ် လျှောက်ဖို့ကလည်း မခက်လှပါဘူး။ ​ဘဏ်မှာ ​ဘဏ်ကဒ် လျှောက်သလိုပါပဲ။ ပုံ​မှန်ရ​နေ​တဲ့ လစာဝင်​ငွေ ​လမ်း​​ကြောင်း အထောက်​အထား ပြ​နေရင် လျှောက်လို့ရပါတယ်။ လစာ​နဲ့ ​အခြားကိုယ်ရေး​အချက်​အလက်​တွေ​​ပေါ်မူတည်ပြီး ကဒ်က​နေ ​ငွေဘယ်လောက် ကြိုသုံးခွင့်ရှိလဲဆိုတာကို ​အကန့်​အသတ်​နဲ့ သတ်မှတ်ထားပါတယ်။

ဈေးဝယ်​တဲ့​အခါ၊ စားသောက်​တဲ့​အခါ၊ ခရီးထွက်​တဲ့​အခါ၊ ​ဝန်​ဆောင်မှု တစ်ခုခု​အတွက် ​ငွေပေးဖို့ လို​တဲ့​အခါ ​ငွေသား စက္ကူကို မပေးပဲ ခရက်ဒစ်ကဒ်ကို သုံးလို့ရပါတယ်။ ​​ငွေပေး​ချေဖို့ ခရက်ဒစ်ကဒ်လေး ထိုးပေးလိုက်ရင် ပေးရမယ့် ​ငွေပမာဏကို ကဒ်ထဲက​နေ ဖြတ်သွားမယ်။ ​အကြွေးစာရင်းထဲ မှတ်သွားတယ်​​ပေါ့။ တစ်လ​အကြာမှာ သုံးထားသမျှ ​အကြွေးကို ခရက်ဒစ်ကဒ် ကုမ္ပဏီကို ​ငွေ​ပြန်လွှဲပေးရပါတယ်။ ​အချိန်မီ လွှဲပေးနိုင်ရင် ​အတိုးမပေးရ​ပါဘူး။ ​

#အကြွေးထူတဲ့အမေရိကန်

ကဒ်လေး​နဲ့ ဝယ်ရတာဆို​​တော့ ဘယ်လောက်သုံးလို့ သုံးမိမှန်းမသိပဲ လကုန်​​တော့မှ သုံးမိတာ​တွေများသွားလို့ လစာ​နဲ့ မလောက်​​တော့ပဲ ​​​ငွေအ​ပြည့်​ ပြန်မပေးနိုင်လို့ အကြွေး​ကျန်တာမျိုး​တွေ ရှိတတ်ပါတယ်။

ဒါဆိုရင် ခရက်ဒစ်ကဒ် ကုမ္ပဏီ​တွေ​ရဲ့ ဂွင်ထဲ ဝင်သွားပါပြီ။ ကျန်​နေ​တဲ့ ​အကြွေးကို ​အတိုးကြီးကြီး​တွေသတ်မှတ်ပြီး ​အကြွေးမှတ်​​တော့တာပါပဲ။ အတိုး​​ပေါ်​အတိုးဆင့်​တဲ့​အပြင် ဘာကြေး ညာကြေး​တွေပါ​ထည့်​​ပေါင်းပြီး နာနာ​​ထောင်းပါပြီ။

အ​မေရိ​ကန် ပြည်​​ထောင်စုမှာ ဒီလို ခရက်ဒစ်ကဒ် ​အကြွေး​တွေကို လစဥ်ပုံ​မှန်​ ပြန်မပေးနိုင်လို့ ​အတိုးကြီး​တွေမိပြီး ကြွေး​သံသရာထဲ နစ်​နေသူ​တွေရှိပါတယ်။

လစဥ် ​အချိန်မီ ​ပြန်ပေး​နေ​တဲ့ ​အကြွေး​တွေကို ​​ထည့်မတွက်ပဲ လ​​ကျော်သွားလို့ ​အတိုးပေး​နေရ​တဲ့ ​အကြွေး​တွေကိုပဲ​ တွက်ကြည့်ရအောင်။ ပျမ်းမျှ​အားဖြင့် ​အ​မေရိကန် မိသားစုတစ်စုမှာ ​ခရက်ဒစ်ကဒ် အကြွေး မြန်မာ​ငွေ​နဲ့တွက်ရင် သိန်းတစ်ရာလောက် ရှိပါသ​တဲ့။ အိမ်​​ထောင်စုတစ်စုဟာ တစ်နှစ်မှာ မြန်မာ​ငွေ ၁၇ သိန်းလောက် ​ခရက်ဒစ်ကဒ်အတိုး ပေး​နေရပါသ​တဲ့။ ဒါ​​တောင် သူတို့နိုင်​ငံက ​အတိုးက သိပ်မကြီးလို့ပါ။

ဟိုနိုင်​ငံမှာ ဝင်​ငွေများတာပဲ၊ ဒီလောက်​အကြွေးက​​တော့ ပါမွှားပါလို့ ကပ်​ပြောလို့​​တော့ ရပါတယ်။ ဒါ​ပေ​မဲ့ ဒီလောက်​ငွေက ပါမွှားဆို ​အတိုးမပေးရခင် ​အချိန်မီ ​ပြန်သွင်းနိုင်မှာ​​ပေါ့။ ခုက ​ငွေမလည်လို့ ကြွေးတင်​ပြီး ​အတိုးပေးနေရတာပါ။ ခရက်ဒစ်ကဒ် သုံး​တဲ့သူ​တွေထဲက ၃၇% ဟာ လကုန်မှာ ​ငွေ​အ​ကျေ​ပြန် မပေးနိုင်ကြပါဘူး​တဲ့။

#အကြွေး

​အကြွေး​နဲ့ စားသောက်တာ၊ ​အကြွေး​နဲ့ ပစ္စည်း​တွေဝယ်တာ၊ ​အကြွေး​နဲ့ ခရီးထွက်တာ စ​တဲ့ ​ငွေမရခင် ကြိုသုံးထားတာတွေကို ​အားမပေးပါဘူး။ ​(လုပ်ငန်းလုပ်ဖို့ သင့်တင့်​တဲ့​အတိုးနှုန်း​နဲ့ ချေးယူတယ်၊ ​ရလာ​တဲ့ အကျိုး​အမြတ်က ​အတိုးပေးရတာထက် များတယ်ဆိုရင်​​တော့ ခြွင်းချက်ပါ။)

သူများနိုင်​ငံမှာ ခရက်ဒစ်ကဒ်သုံးကြလို့ ခေတ်မီသူတိုင်း ​ခရက်ဒစ်ကဒ်သုံး ​အကြွေးယူကြသည်ဆိုပြီး သွား ​အတုခိုးလို့ မရပါဘူး။

ချမ်းသာ​တဲ့ နိုင်​​ငံ​တွေမှာ​​တောင် မဆင်မခြင် ​ငွေကြိုသုံးတတ်​တဲ့သူ​တွေဟာ အကြွေး​တွေ ​အတိုး​တွေ​​ကြောင့် ဒုက္ခရောက်​နေကြရပါတယ်။ ဆင်း​ရဲ​တဲ့နိုင်​ငံက ကျွန်​​​​တော်တို့ဆို ပိုဆင်ခြင်ရမှာ​​ပေါ့ ခင်ဗျာ။

တိုးတက်​တဲ့ နိုင်​ငံ​တွေက​နေ ​​ကောင်းတာလေး​တွေကို ​အတုယူပါ။ မ​​ကောင်း​တဲ့ ​ငွေချေးသုံး​တဲ့​အကျင့်ကို​​တော့ သွားပြီး ​အတုမယူပါ​နဲ့။ ​အလုပ်​အကိုင်ရှားပါး၊ ဝင်​ငွေနည်းပြီး ​အတိုးကြီး​တဲ့ ဒီနိုင်​ငံမှာ ကြွေး​သံသရာထဲ နစ်သွားရင် ရူး​​သွားနိုင်ပါတယ်။

#ခရက်ဒစ်ကဒ်ရဲ့ကောင်းကွက်လေးတွေ

ကျွန်​​တော်​​ရော နိုင်​ငံခြားမှာ​နေတုန်းက ခရက်ဒစ်ကဒ် မသုံးဘူးလား။ သုံးပါတယ် ခင်ဗျ။ ​ခုလည်း နိုင်​ငံခြား ခရီး​တွေ ထွက်ရင် သုံးပါတယ်။

ငွေချေးသုံးချင်လို့၊ ​​ငွေလည်အောင် တစ်လစာလောက် ကြိုသုံးချင်လို့ သုံးတာ လုံးဝ မဟုတ်ပါဘူး ခင်ဗျာ။ ​သုံး​တဲ့ ပမာဏဟာ ကိုယ် တတ်နိုင်​တဲ့ ပမာဏကိုပဲ ချင့်ချိန်သုံးတာပါ။ သုံးလိုက်​တဲ့ ပမာဏ​အတွက် ​ငွေလက်ငင်း​ချေဖို့ ​ဘဏ်ထဲမှာ ​ငွေ လုံလုံလောက်လောက် ရှိပြီးသားပါ။

ဒါဆိုဘာလို့​များ ခရက်ဒစ်ကဒ်ကို သုံး​နေသေး​လဲဆို​​တော့ ခရက်ဒစ်ကဒ်သုံးခြင်း​ရဲ့ ​အကျိုးကျေးဇူး​တွေ ရှိ​နေလို့ပါ။ ​

အချို့ဆိုင်​တွေက ခရက်ဒစ်ကဒ်သုံးရင် ဈေးလျှော့ပေးတာမျိုး​တွေ ရှိတယ်။ ခရက်ဒစ်ကဒ်​ ကုမ္ပဏီက ကဒ်သုံး​တဲ့ သူ​တွေကို သုံး​တဲ့​အ​​ပေါ်မူတည်ပြီး လက်​ဆောင်​တွေ၊ ​ငွေ​တွေ ​ပြန်ပေးတာမျိုး​တွေ ရှိတယ်။ ​အချို့ ခရက်ဒစ်ကဒ်​​တွေဆို ကဒ်​​နဲ့ ​လေယာဉ်လက်မှတ်ဝယ်ရင် ခရီးသွား ​အသက် အာမ​ခံကို ​အလကား ​ထည့်ပေးတာမျိုး၊ နောက်ပိုင်း ​​ခရီး သွားတာများရင် လေယာဉ်လက်မှတ်​ အလကားပေးတာမျိုးတွေပါ ရှိပါတယ်။ ပြီး​​တော့ ကဒ်​လေး​နဲ့ပေးတာ ​ငွေကိုင်သုံးတာထက် စမတ်ပိုကျပြီး ​အလုပ်ရှုပ် သက်သာပါတယ်။

ဒီလို ခရက်ဒစ်ကဒ်​နဲ့ ဝယ်ထား​တဲ့ မှတ်တမ်း​တွေ၊ ခရက်ဒစ်ကဒ် ကုမ္ပဏီကို ​အချိန်မီ ​ငွေ​ပြန်သွင်းမသွင်း မှတ်တမ်း​တွေဟာ ​အရမ်း​အရေးပါလှပါတယ်။ အိမ်​တွေဘာ​တွေကို ချေး​ငွေ​နဲ့ဝယ်ချင်ရင် အဲဒီ ခရက်ဒစ်ကဒ် မှတ်တမ်း​တွေကို ​ပြန်ကြည့်ပြီး ​ဘဏ်က ကိုယ့်ကို ​ငွေချေးသင့် မချေးသင့်စဥ်းစားပါတယ်။ ခရက်ဒစ် မှတ်တမ်းလုံးဝ မရှိ​တဲ့သူတို့၊ ​ငွေကို ​မှန်​မှန် ​ပြန်မသွင်းထား​တဲ့သူတို့ဆို ​ဘဏ်က​နေ ​ငွေချေးဖို့ ခက်ခဲပါတယ်။

ဒီ​​တော့ ခရက်ဒစ်ကဒ်ကို သုံးပါတယ်။ ဒါ​ပေ​မဲ့ ချေးချင်လို့ သုံးတာမဟုတ်ပဲ ခရက်ဒစ်ကဒ်က ပေး​တဲ့ ​အကျိုးကျေးဇူး​တွေကို လိုချင်လို့ပါ။ ​ကိုယ့်ဘဏ်ထဲမှာ ရှိ​တဲ့​ငွေထက် ပိုမသုံးပါဘူး။ ​လကုန်မှာ ရမယ့် လစာကို ကြိုပြီး သုံးထားတာမျိုးလည်း မလုပ်ပါဘူး။ တစ်လသုံးတာကို ​အချိန်မ​​စေ့ခင် ​ပြန်ပေးပါတယ်။ ဒီ​​တော့ ခရက်ဒစ်ကဒ် ကုမ္ပဏီ​တွေက ကျွန်​​တော့်ဆီက နှစ်စဥ်ကြေး ဘယ်​​တော့မှ မကောက်ပါဘူး။

ဒီလိုမျိုး စည်းကမ်းရှိရှိ သုံးရင်​​တော့ ​အကျိုးရှိပါတယ်။ ဒီ​​​​တော့ ဒါမျိုးကို ချေးသုံးတယ်လို့ မသတ်မှတ်ပါဘူး။

တကယ် လိုအပ်တာ​တွေ မဟုတ်​တဲ့ လိုချင်တာ​တွေကို လစဥ်ပေး စနစ်၊ ​အကြွေးစနစ်​နဲ့ ဝယ်တာမျိုးကို ​​ရှောင်ပါ။ လိုအပ်တယ်ဆိုရင်​​တောင် ကြွေးမတင်အောင် ကြိုတင် ​ငွေစုပါ။

ငွေကို မရသေးခင် ကြိုပြီး မသုံးမိပါ​စေ​နဲ့။

ဆက်​လက်​၍ ဖတ်​ရန်
ပိုးစုန်းကြူး ငွေးကြေးဆိုင်ရာ ဗဟုသုတ 

Credit: 
Firefly ပိုးစုန်ကြီး Personal Blog Page မှကူးယူထားသည်