ရွှေဈေးတွေ တရိပ်ရိပ်တက်နေပါတယ်။ ကမ္ဘာ့ရွှေဈေးက အမြင့်ဆုံးနားမှာမို့ မြန်မာ့ရွှေဈေးလည်း လိုက်တက်ပါတယ်။
#ရွှေစျေးဘာကြောင့်တက်
ကမ္ဘာ့ရွှေဈေး ဘာလို့တက်လဲဆိုတော့ အမေရိကန်နိုင်ငံအပါအဝင် ကမ္ဘာတလွှားမှာ ကိုဗစ်ကြောင့် ကြပ်တည်းနေတဲ့ လုပ်ငန်းရှင်တွေ၊ ပြည်သူတွေကို ငွေစက္ကူတွေ ရိုက်ထုတ်ပြီး ကူညီနေလို့ပါ။ ငွေစက္ကူရိုက်ထုတ်တယ်ဆိုတာ နားလည်လွယ်အောင်သာ ပြောရတာပါ။ ဒီဘက်ခေတ်မှာတော့ ငွေစက္ကူအသစ် ရိုက်နှိပ်စရာမလိုပဲ ဘဏ်စနစ်ကွန်ပျူတာစာရင်းအင်းတွေထဲမှာ ကိန်းဂဏန်းလေးတွေ တိုးပေးလိုက်တာပါ။
အစိုးရက ချက်လက်မှတ်လေး ထုတ်ပေးလိုက်ရင် လူအများစုက ချက်လက်မှတ်က ငွေကို သူတို့ ဘဏ်အကောင့်ထဲကို တိုက်ရိုက် လွှဲထည့်လိုက်တာကိုး။ ငွေစက္ကူသစ်တွေ ရိုက်ထုတ်ပြီး ပေးစရာ မလိုတော့ဘူးပေါ့။
ဒီလို ငွေစက္ကူတွေ ရိုက်ထုတ်တဲ့အခါ ငွေကြေးဖောင်းပွမှုတွေဖြစ်လာပါတယ်။
ငွေကြေးဖောင်းပွမှုရှိလာတဲ့အခါ ရွှေဈေးတက်လေ့ရှိပါတယ်။
ဒါ့အပြင် ကိုဗစ်ကာလ မရေရာတဲ့ စီးပွားရေးအခြေအနေတွေ၊ အမေရိကန်နဲ့ တရုတ်ကြား တင်းမာမှုတွေကြားမှာ ငွေကိုင်ထားတဲ့သူတွေက စီးပွားရေးလည်းမလုပ်ရဲ၊ အခြား ဆုံးရှုံးနိုင်ခြေများတဲ့ ရင်းနှီးမြှုပ်နှံမှုတွေထဲလည်း ငွေမထည့်ရဲ၊ ဘဏ်တိုးနည်းလို့ ဘဏ်မှာလည်း မအပ်ချင်ပဲ "စိတ်ချရတယ်၊ ဈေးတက်နိုင်ခြေရှိတယ်" လို့ ယူဆကြတဲ့ ရွှေကို ပြေးဝယ်တတ်ကြပါတယ်။ ဒီလို ပြေးဝယ်ကြတဲ့အခါ ဝယ်လိုအားများလာတဲ့အတွက် ရွှေဈေးတက်ပါတယ်။
ဝယ်လိုအားများလာပေမဲ့ ကိုဗစ်ကာလ ရွှေတူးဖော်ရေးလုပ်ငန်းတွေ နှောင့်နှေးတာကြောင့် ရွှေအဝယ်လိုက်သလောက် ရောင်းဖို့ ရှားနေပါတယ်။ ဒီတော့ ဈေးပိုတက်ပါတယ်။
ရွှေဈေးတက်တဲ့အခါ စောင့်ကြည့်နေတဲ့သူတွေက "ဟော ရွှေဈေးတွေ တစ်ရိပ်ရိပ်တက်နေတယ်။ အမြတ်ရအောင် ပြေးဝယ်လိုက်ဦးမှ" ဆိုပြီး ပြေးဝယ်ကြလို့ ရွှေဈေးက ပိုတက်လာပါတယ်။ ဒီလိုနဲ့ တရိပ်ရိပ်တက်လာတဲ့ ရွှေဈေးဟာ ဘာဆက်ဖြစ်မလဲဆိုတာ စိတ်ဝင်စားစရာပါ။
#ရွှေဝယ်သင့်သလား
လက်ရှိမှာ ကျွန်တော့်ကို ရွှေဝယ်သင့်သလားလို့မေးလာရင် ဖြေရခက်ပါတယ်။
ကျွန်တော် ရွှေအကြောင်းရေးထားတဲ့ ဆောင်းပါးတွေ ရှိပါတယ်။ ကျွန်တော်ဟာ ရွှေကျွမ်းကျင်သူတော့မဟုတ်ပါဘူး။ ကိုယ့်ငွေကို ရွှေထဲ ထည့်မမြှုပ်ခင် သိသင့်သိထိုက်တာတွေကို နည်းနည်းပါးပါးသိထားတဲ့ အပြင်လူတစ်ယောက်ပါပဲ။
ကျွန်တော်ကတော့ လက်ရှိပေါက်ဈေးမှာ ရွှေမဝယ်ပါဘူး။ အရင်က ဝယ်ထားတဲ့ ရွှေတွေကိုလည်း ပြန်ရောင်းဖို့ အစီအစဥ်မရှိသေးပါဘူး။
ဈေးတက်နေတဲ့အချိန် ဝယ်ချင်စိတ်မရှိလို့ပါ။ ရောင်းဖို့အတွက်လည်း ငွေမလိုလို့ပါ။
ရွှေဈေးတွေ ပြန်ကျတဲ့အချိန်၊ ကမ္ဘာပေါ်က လူအများစု ကြောက်စိတ်ဝင်ပြီး ထုတ်ရောင်းတဲ့အချိန်ရောက်မှ ဝယ်မှာပါ။ ရွှေဈေးတွေ ပြန်မကျပဲ မတရားထိုးတက်သွားခဲ့ရင်တောင် လက်ရှိ ၁၃ သိန်းကျော်ဈေးနဲ့ မဝယ်လိုက်မိလေခြင်းဆိုပြီး ယူကြုံးမရ ဝမ်းနည်းမယ့်သူတွေထဲမှာ ကျွန်တော်မပါပါဘူး။ လောဘသတ်ထားပါတယ်။
လစဥ် ပုံမှန် ဝယ်စုနေကြသူတွေအတွက်တော့ ပုံမှန်ဝယ်နေကျအတိုင်း ဝယ်စုပါ။ မမှားပါဘူး။
ဒါပေမဲ့ ရွှေဈေးတွေ တက်နေလို့ လောဘတက်ပြီး ရှိတဲ့ငွေတွေကို ဘဏ်ကထုတ်ပြီး ရွှေဝယ်လိုက်ချင်တယ်ဆိုတဲ့သူတွေကိုတော့ သတိပေးချင်ပါတယ်။ မလုပ်ပါနဲ့။ ဒါလောင်းကစားဆန်သွားပြီ။
၂၀၁၉ စက်တင်ဘာလလောက်က ဘဏ်တွေ လှုပ်လှုပ် လှုပ်လှုပ်ဖြစ်တော့ ဘဏ်ကငွေတွေ ပြေးထုတ်ပြီး ရွှေပြေးဝယ်ကြတဲ့သူတွေ ရှိပါတယ်။
၂၀၁၉ စက်တင်ဘာလပိုင်းက ဈေးအတက်ပိုင်း (၁၂ သိန်းခွဲ ဈေး) မှာ ဝယ်ခဲ့တဲ့သူတွေ ကျွန်တော်နဲ့ လာတိုင်ပင်ကြပါတယ်။ "ဈေးကြီးမိပြီး ဝယ်မိသွားပြီ။ ဈေးတွေကလည်း တရိပ်ရိပ်ပြန်ကျနေပြီ။ နေ့တိုင်း အရှုံးပေါ်နေတယ်။ ဘာဆက်လုပ်သင့်လဲ" လို့ အကြံတောင်းလာတဲ့သူတွေ ရှိခဲ့ပါတယ်။ ဈေးတွေ ဆက်ကျနေတဲ့အခါ အရှုံးပေါ်လို့ ညဘက် အိပ်မပျော်နိုင်တဲ့သူတွေ ရှိပါတယ်။
စိတ်ရှည်ရှည်ထားပြီး စောင့်ဆိုင်းဖို့၊ ရွှေဈေးဟာ နောက် ၅ နှစ်အတွင်းမှာ အနည်းဆုံး တစ်ကြိမ်တော့ ၁၃ သိန်းကျော်ဦးမှာဖြစ်ကြောင်း အားပေးခဲ့ပါတယ်။ (၅ နှစ်ကာလဆိုတော့ ခန့်မှန်းရလွယ်ပါတယ်။ မနက်ဖြန်နဲ့ ရှေ့အပတ်ကို ခန့်မှန်းရလောက်အောင်တော့ ကျွန်တော် မတတ်ကျွမ်းပါဘူး။)
ခုတော့ ၅ နှစ်တောင် မစောင့်ရပဲ ၁ နှစ်အတွင်း ရွှေဈေး ၁၃ သိန်းကျော်ဖြစ်လာခဲ့ပါတယ်။ ကျွန်တော်ပေးတဲ့အကြံအတိုင်း စိတ်ရှည်ရှည်ထားပြီး စောင့်တဲ့သူတွေတော့ အမြတ်ရသွားကြပါတယ်။ ဒီကြားထဲမှာ စိတ်မရှည်တော့လို့ ဖြစ်ဖြစ်၊ ဈေးထပ်ကျမှာ ကြောက်လွန်းလို့ ဖြစ်ဖြစ်၊ ငွေလိုလို့ပဲဖြစ်ဖြစ် ရောင်းလိုက်ရတဲ့သူတွေကတော့ ရှုံးပါတယ်။
ဒီတော့ ရွှေဈေးကို ဈေးအမြင့်ဆုံးမှာ ဝယ်မိရင် ဈေးပြန်ကျသွားတဲ့အခါ စိတ်ဆင်းရဲရတတ်ပါတယ်။ စိတ်ရှည်ရှည်နဲ့ ပြန်စောင့်ရတတ်ပါတယ်။
ရေတိုမှာ ရွှေဈေးတက်မလားကျမလား ပြောရခက်ပါတယ်။ တက်နိုင်သလို ကျနိုင်ပါတယ်။ ဒီတော့ ရှိသမျှ ငွေတွေကို ပုံအောပြီး ရွှေဝယ်လိုက်တာမျိုးကို ရှောင်ပါ။ ငွေရှိရင်၊ ဘာစီးပွားရေးမှ မလုပ်ရဲသေးရင် ရွှေ၊ ဒေါ်လာ၊ အိမ်ခြံမြေ၊ ဘဏ် စသဖြင့် ခွဲပြီး စုထားပါ။
ရွှေ ဝယ်ချင်ရင်တောင် တစ်ရက်တည်းမှာ တစ်ကြိမ်တည်း ပုံအောပြီး ဝယ်လိုက်တာမျိုးကို ရှောင်ပါ။ တစ်ပတ်ခြား၊ တစ်လခြား၊ နှစ်လခြား စသဖြင့် ခွဲပြီး ဖြည်းဖြည်းချင်းဝယ်သင့်တာပါ။
နောက်ဆို ရွှေဈေးတွေ မတရားတက်နေတဲ့အချိန်ရောက်မှ ရွှေဝယ်ဖို့ သတိရတာမျိုး၊ သူများ ဝေလေလေမှ ကိုယ်ဝေလေလေ လုပ်တာမျိုး ရှောင်ပါခင်ဗျာ။ ရွှေဈေးတွေ အေးနေတဲ့အချိန်မှာ ဝယ်ဖို့ သတိရကြပါ။
ဆက်လက်၍ ဖတ်ရန်
ပိုးစုန်းကြူး ငွေးကြေးဆိုင်ရာ ဗဟုသုတ
Credit:
Firefly ပိုးစုန်ကြီး Personal Blog Page မှကူးယူထားသည်
No comments:
Post a Comment