ကျူးလစ် ​အရူး​​တော်ပုံ

၁၆၃၀ ခုနှစ်များဆီက နယ်သာ​လန်နိုင်​​ငံမှာ ဖြစ်​ခဲ့​တဲ့ ကျူးလစ် ​အရူး​​တော်ပုံ ​အ​​ကြောင်း ​ဝေမျှချင်ပါတယ်။

အဲဒီကာလ​တွေတုန်းက ဥ​ရောပမှာ ​ကျူးလစ်ပန်း​တွေ အရမ်း ရှားပါးလှပါတယ်။ အာရှတိုက်က​နေ တင်သွင်းရတာပါ။ ထုံး​စံ​အတိုင်း ရှားပါး​တဲ့ ပစ္စည်းဟာ ဈေးကြီးတယ်​​ပေါ့။

​အထက်တန်းစား ​ငွေရှင်ကြေးရှင်​တွေက​​တော့ ဂုဏ်ရှိဖို့ ​အတွက် ကျူးလစ်ပန်း​တွေဝယ်ကြပါတယ်။ ​

ဒီခေတ်မှာ ကိုယ်ချစ်ရ​တဲ့သူ​တွေကို​ရော ကိုယ့်ကိုယ်ကိုပါ ​အ​​ကြောင်း​အမျိုးမျိုးရှာပြီး နောက်ဆုံး​​ပေါ် ကား ​အ​​ကောင်းစား​တွေ၊ ဈေးကြီးနာရီ​တွေ လက်​ဆောင် ဝယ်ပေးကြတယ် ဟုတ်။ ကြွားကြတာ​​ပေါ့။

သူတို့ကိုသာ ၁၆၀၀ ခုနှစ် ပတ်ဝန်းကျင်မှာ ဥ​ရောပမှာ မွေး​ခဲ့မယ်ဆို ​ဈေးကြီးလှ​​ပေ့ဆို​တဲ့ ကျူးလစ်ပန်းလေး​တွေကို အချင်းချင်း လက်​ဆောင်ပေးကြမယ် ထင်ပါ​ရဲ့။ လူဆိုတာကလည်း သူများ​အထင်ကြီးဖို့ဆို ​ငွေဘယ်လောက်ကုန်ကုန်​လေ။ ​(အဖြုန်း​တွေဆိုတာကို သတိပြုပါ။ တစ်ကယ် ဖြုန်းနိုင်​တဲ့ သူ​တွေကို ​အားကျပြီး ဝမရှိပဲ ဝိလုပ်၊ ဟန်လုပ် ဖြုန်းပြရင် ဘဝပျက်တတ်​​ကြောင်း ကြုံတုန်း ကြားညှပ်​ပြောပါရ​စေ။)

ကျူးလစ်ပန်းတိုင်း​​တော့ ဈေးကြီးတာ မဟုတ်ပါဘူး။ ရှားပါးလှပါ​​ပေ့၊ ​အဆင်းသွင်ပြင်လှပါ​​ပေ့ ဆို​တဲ့ ပန်း​တွေက​​တော့ ဈေးကြီးပါတယ်။

ဒီလို​နဲ့ ကျူးလစ်ပန်း​တွေ​ရဲ့ ​​ဈေး​တွေ တစ်​ရိပ်ရိပ် တက်လာပါတယ်။ တစ်ခုခု ဝယ်လို​အား​​ကောင်းလာပြီ၊ ​​ဝယ်ရောင်းလုပ်လို့ မြတ်​နေပြီဆိုရင် ဈေးကစား​တဲ့ သူ​တွေ ဝင်လာတာ ထုံး​စံပါပဲ။ ဈေးကစား​တဲ့ ​လောဘသား​တွေ ဝင်လာပြီဆို ဒါဟာ ပူ​​ဖောင်းဖြစ်​​တော့မယ်၊ ပူ​​ဖောင်းပေါက်ရင် လူ​တွေ ​ခံရ​​တော့မယ်ဆို​တဲ့ သ​ဘောပါပဲ။

ကျူးလစ်ပန်း​တွေက တာရှည်မ​ခံ​​တော့ တာရှည်​ခံ​တဲ့ ကျူးလစ်ဥလေး​တွေကို ဝယ်​​ရောင်းလုပ်ကြပါတယ်။ (ကြက်သွန်နီဥလေး​တွေ​နဲ့ ခပ်ဆင်ဆင်တူ​ပါတယ်။) ဥကို ပျိုး​​ထောင်​တဲ့ ​အချိန်ကျမှ ​ပန်းပင်ထွက်လာတာ​​ပေါ့။

ဒီလို​နဲ့ ဈေးကစားကြ​​တော့ ဈေးကြီး​တဲ့ ကျူးလစ်ဥ​တွေ​​ရော၊ ​အခြား ဈေးမကြီးတကြီး ကျူးလစ်ဥ​တွေပါ ဈေး​တွေ ပိုမြောက်လာပါတယ်။ ခုဝယ်ခု​​ရောင်း ခုမြတ် ဖြစ်လာပါတယ်။ ​မြန်မာနိုင်​ငံမှာ အိမ်​ခြံ​​မြေ​နဲ့ ကား​တွေကို ဈေးကစားကြတုန်းကလည်း ဒီလို ခပ်ဆင်ဆင်ပါပဲ။ ပဲဈေးကွက်၊ ကြက်သွန်ဈေးကွက်တို့မှာလည်း ဖြစ်​ခဲ့ဖူးပါ​ရဲ့။

ဒီလို​နဲ့ ဈေး​တွေ တက်လာလိုက်တာ ​​အချို့ရှားပါး ကျူးလစ်မျိုးဥ​တွေဆိုရင် တစ်ဥကို အိမ်တစ်လုံး ​တန်ဖိုးလောက်ထိ ဈေးတက်သွားပါသ​တဲ့။ ဒီလို​နဲ့ ဈေး​တွေမြင့်လာ​​ရာက ၁၆၃၇ ခုနှစ် မနက် တစ်မနက်မှာ ကျူးလစ်ဥ ဈေး​တွေ ရုတ်တရက် ဝုန်းဆို ထိုးကျသွားပါ​​တော့တယ်။ ဈေး​အဆမ​တန်ကြီးလာ​တဲ့ ကျူးလစ်ဥ​တွေကို ဝယ်ချင်​တဲ့သူ​တွေမရှိ​​တော့လို့ ရ​တဲ့ ဈေး​နဲ့ ထိုး​​ရောင်းကြလို့ပါ။ ​

ဒီလို​​နဲ့ ကျူးလစ် ​အရူး​​တော်ပုံလို့​​ခေါ်​တဲ့ ကျူးလစ်ပူ​​ဖောင်းကြီး ရုတ်တရက် ပေါက်သွားပါ​​တော့တယ်။ ကျူးလစ်ဥ​တွေ ဝယ်ကိုင်ထား​တဲ့သူ​တွေ ​အရှုံးကြီးရှုံး​​တော့တာ​​ပေါ့။ ​မြန်မာနိုင်​ငံမှာ ​ဖုန်းဈေး၊ ကားဈေး​တွေထိုးကျတုန်းက ​ခံလိုက်ရသလို​​ပေါ့။ (ကွဲပြားမှု​​တော့ ​အနည်းငယ်ရှိပါတယ်။)

အချို့​​သော ဝတ္ထုဆရာ​တွေက​​တော့ ဒီကျူးလစ် ​အရူး​​တော်ပုံ​​ကြောင့် လူ​​ပေါင်းများစွာ ဒုက္ခရောက်ပြီး သတ်သေကုန်ကြ​​ကြောင်း တစ်ဆိတ်ကို တစ်အိတ်လုပ် ပုံကြီး​ချဲ့​ခဲ့ကြပါတယ်။ နယ်သာ​လန် တစ်နိုင်​ငံလုံး ​အတိုင်း​အတာ​နဲ့ စီးပွားရေးထိုးကျသွားတာမျိုး မရှိ​ခဲ့​ပေ​မဲ့ ယူတတ်ရင် သင်ခန်းစာ​တွေ ​အများကြီးရမယ်ဆိုတာ ငြင်းမရပါဘူး။

လက်ရှိမှာ ဘစ်ကွိုင်​​နဲ့ ​အခြား ခရစ်တို ဒစ်ဂျစ်တယ် ​ငွေကြေး​တွေဟာ ကျူးလစ်ဥ​တွေလိုပါပဲ။ ​ဈေးတက်​နေတုန်းမှာ၊ ဈေး​အတက်​အကျဖြစ်​နေတုန်းမှာ ​ဈေးကစား ချင်သူ​တွေ​အတွက် ငွေရှာရ လွယ်သလို ဖြစ်​နေ​​တတ်ပါတယ်။ တစ်​​နေ့ ဈေး​တွေ ဝုန်းကနဲ ထိုးကျရင် မျက်ရည်​နဲ့ မျက်ခွက် ဖြစ်ကြရဦးမှာပါ။

ဈေးကစား​တဲ့ ​​လောဘရူး​တွေရှိ​နေသမျှ ​အရူး​​တော်ပုံ​တွေ ဆက်ဖြစ်​နေဦးမှာပါပဲ။ ၁၆၃၇ ကျူးလစ် ပူ​​ဖောင်း၊ ​​၁၇၂၀ တောင်ပင်လယ် ကုမ္ပဏီ ပူ​​ဖောင်း၊ ၁၉၂၉ စ​​တော့ဈေးကွက် ပူ​​ဖောင်း၊ ၁၉၉၀ ဂျ​ပန် အိမ်​ခြံ​​မြေ​နဲ့ စ​​တော့ဈေးကွက် ပူ​​ဖောင်း၊ ၂၀၀၀ အ​မေရိ​ကန် အင်တာနက် ​​ဒေါ့ကွန်း ပူ​​ဖောင်း၊ ​၂၀၀၈ အ​မေရိ​ကန် အိမ်​ခြံ​​မြေ ပူ​​ဖောင်း စသဖြင့် သမိုင်းတစ်လျှောက် ပူ​​ဖောင်း ​အမျိုးမျိုး​​ကြောင့် ဘဝပျက်​ခဲ့ရ​တဲ့ သူ​တွေများပါပြီ။

ဒါ​​တောင် ​အမှတ်မရှိပဲ ဆက်ပြီး ဈေးကစားချင်ကြတုန်းလား။ ဒေါက်တာ သန်းထွန်းက ​ပြော​ခဲ့ပါတယ်။  "သမိုင်းသင်တာ မအအောင်" တဲ့။ ကားလ်မောက်စ်က​ပြော​ခဲ့ပါတယ် "သမိုင်းက ​အ​ဖန်​ဖန် ​ပြန် ဖြစ်​​လေ့ရှိတယ်" ​တဲ့။

​နောက်တစ်​​ကျော့ ​ပြန်လာ​​တော့​မယ့် ဈေးကစား ပူ​​ဖောင်း​တွေကြားမှာ ​တုံးလွန်း အ,လွန်းရင် ငွေ​တွေ ရှုံးရဦးမယ်။ ဒီလို မဖြစ်ရအောင် ရေးပြ​တဲ့ သမိုင်း တစ်ပိုင်းတစ်စလေးပါ ခင်ဗျာ။

​အရူး​​တော်ပုံ​တွေကို ​​ရှောင်ကြပါ။

ဆက်​လက်​၍ ဖတ်​ရန် 
ပိုးစုန်းကြူး ငွေးကြေးဆိုင်ရာ ဗဟုသုတ 

Credit: 
Firefly ပိုးစုန်ကြီး Personal Blog Page မှကူးယူထားသည်