ငွေသခင်ဖြစ်ဖို့ ဆေး

​ငွေသခင်ဖြစ်ဖို့ ဆေးရှိပါတယ်။ ​သောက်ရ၊ လိမ်းရ​တဲ့ ဆေး​​တော့ မဟုတ်ဘူး ခင်ဗျ။

SAIL လို့ ​​ခေါ်ပါတယ်။ ​ဆေး(လ်) ​​လို့ ​အ​သံထွက်ရမှာပေါ့။ ရွက်လွှင့်ခြင်းလို့ ​အဓိပ္ပါယ်ရ​တဲ့ SAIL မှာ ​အက္ခရာ တစ်လုံးစီတိုင်းက ​အဓိပ္ပါယ်ရှိ​နေ​ပြန်ပါတယ်။

S - Savings (စု​​ဆောင်း​ငွေ)
A - Assurance (အာမ​ခံ)
I - Investment (ရင်းနှီးမြှုပ်​နှံမှု)
L - Life Goals (ဘဝရည်မှန်းချက်များ)

————————————
S - Savings (စု​​ဆောင်း​ငွေ)
————————————

စု​​ဆောင်းထား​တဲ့ ​ငွေဟာ ရွက်သင်္ဘော​ရဲ့ ကိုယ်ထည်​နဲ့ တူပါတယ်။ သေးငယ်လွန်းရင် မုန်တိုင်း​ဒဏ်ကို ​ခံနိုင်မှာ မဟုတ်ပါဘူး။ ​ရေယိုပေါက်​တွေရှိ​နေရင်​​တော့ ​ရေရှည်မှာ မတွေးရဲစရာ​​ပေါ့။

​အ​ရေး​​​ပေါ် ​ရန်ပုံ​ငွေ​အ​နေ​နဲ့ ​​ငွေသားကို အသုံးစရိတ်​ရဲ့ ၃ လစာ​နဲ့ ၆ လစာကြား ​အနည်းဆုံး စု​​ဆောင်းထားရမှာပါ။ ဒါမရှိရင် လှိုင်း​ထန်​တဲ့ ​​နေ့​တွေမှာ ဒုက္ခရောက်တတ်ပါတယ်။

လက်ရှိမှာ ကိုဗစ်ဗိုင်းရပ်စ်် ကပ်ဆိုး​​ကြောင့် စီးပွားရေးကျဆင်း​နေလို့ ကမ္ဘာ​​ပေါ်မှာ ​အလုပ်လက်​မဲ့ ဖြစ်ကုန်​တဲ့ လူ​တွေ ​အများ​အပြား ရှိ​နေပါတယ်။ ​​ရှေ့လျှောက် ဒီနှစ်​အတွင်းမှာ ပိုများလာဖို့ရှိပါတယ်။ ဝမ်းနည်းစရာပါ။ ​​ရောင်နီသာ​တဲ့ ​​နေ့သစ်​ကို မရောက်ခင် ​နေဝင်ညကို ဖြတ်သန်းရဦးမယ့် ကာလပါ။ စု​​ဆောင်းထား​တဲ့ ​အရေး​​​ပေါ် ​ရန်ပုံ​ငွေသာ မရှိရင် ပြဿနာပါပဲ။

———————————
A - Assurance (အာမ​ခံ)
———————————

အာမ​ခံ က​​တော့ ရွက်သင်္ဘော​​ပေါ်က ​အသက်ကယ် ​ဗောကွင်း​နဲ့ တူပါတယ်။

အသက်ကယ် ​ဗောကွင်းဟာ မုန်တိုင်း​ထန် သင်္ဘောမှောက်​တဲ့​အချိန် ပင်လယ်ထဲမှာ ​ရေမနစ်ရအောင် ကူညီပေးနိုင်သလို ​အသက် အာမ​ခံ၊ မီး အာမ​ခံ၊ ကျန်းမာရေး အာမ​ခံ​ စတာတွေ ​​လုပ်ထားတာဟာလည်း ဘဝမှာ မမျှော်လင့်​တဲ့ အ​ခြေ​အ​နေ​တွေ၊ ဆုံးရှုံးမှု​တွေနဲ့​​ တွေ့ရ​တဲ့​အခါ ​အထောက်​အကူ ပြုမှာပါ။

——————————————
I - Investment (ရင်းနှီးမြှုပ်​နှံမှု)
——————————————

ရင်းနှီးမြှုပ်​နှံမှုဟာ ရွက်သင်္ဘော​ရဲ့ ပင်တိုင် ရွက်မကြီး​နဲ့ တူပါတယ်။ ရွက်မ ကြီးမားခိုင်ခန့်ရင် ရည်မှန်းချက်ပန်းတိုင်ဆီကို ​မြန်​မြန်ရောက်ဖို့ ကူညီမှာပါ။

—————————————————
L - Life Goals (ဘဝရည်မှန်းချက်များ)
—————————————————

ရွက်သင်္ဘော​ရဲ့ ကိုယ်ထည်​နဲ့တူ​တဲ့ စု​​ဆောင်း​ငွေ၊ အသက်ကယ် ​ဗောကွင်း​နဲ့တူ​တဲ့ အာမ​ခံ ​နဲ့ ပင်တိုင် ရွက်မကြီး​နဲ့ တူ​တဲ့ ရင်းနှီးမြှုပ်​နှံမှု​တွေ ရှိထားပြီဆိုရင်​​တော့ ဘဝရည်မှန်းချက်ပန်းတိုင်​တွေ​ဆီ ရည်မှန်းပြီး ရွက်လွှင့်လို့ ရပါပြီ။

ရည်မှန်းချက်ပန်းတိုင်​တွေ ​​အမျိုးမျိုးရှိနိုင်ပါတယ်။ မင်္ဂလာ​ဆောင်ဖို့၊ ခရီးထွက်ဖို့၊ ကလေးပညာရေး၊ မိဘ ကျန်းမာရေး၊ အိမ်ဝယ်ဖို့၊ ​အငြိမ်းစားယူဖို့ စသဖြင့်​​ပေါ့။

ပန်းတိုင်​အတွက်​အချိန်ဘယ်လောက်ယူမယ်၊ တစ်လ ဘယ်လောက်စုမယ် စသဖြင့် စီ​မံတွက်ချက်ထားရမှာပါ။

————————————
​ဟန်ချက်ညီ​​တဲ့ ရွက်သင်္ဘော
————————————

ရွက်သင်္ဘောဟာ ​ဟန်ချက်ညီ​​ သင့်တင့်မျှတ​နေဖို့ လိုပါတယ်။

ပင်တိုင် ရွက်မကြီး​ (ရင်းနှီးမြှုပ်​နှံမှု) က သေးလွန်း​နေရင်လည်း ခရီးသိပ်မတွင်နိုင်ပါဘူး။ ​ရင်းနှီးမြှုပ်​နှံမှုမရှိရင် (သို့) နည်း​နေရင် ငွေကြေး​​ဖောင်းပွမှု​တွေ​​ကြောင့် စုမိ​တဲ့​ငွေလေး​တွေ ​တန်ဖိုးနည်းသွားတတ်ပါတယ်။

ပင်တိုင် ရွက်မကြီး​ (ရင်းနှီးမြှုပ်​နှံမှု) ကြီးလွန်းပြီး ရွက်သင်္ဘော​ရဲ့ ကိုယ်ထည် (စု​​ဆောင်း​ငွေ) သေးလွန်းရင်လည်း ​အဆင်မ​ပြေပါဘူး။ ​အောက်သေး​အ​​​ပေါ်ကြီး ဖြစ်ပြီး မုန်တိုင်းကြားမှာ သင်္ဘောမှောက်တတ်ပါတယ်။ ရှိသမျှ​ ငွေ​အားလုံးကို ​ငွေသား လက်​ကျန်မထားပဲ စီးပွားရေးလုပ်ငန်း​တွေ၊ ရင်းနှီးမြှုပ်​နှံမှု​တွေထဲ ​အကုန်​ထည့်ထားမိ​​ခဲ့ရင် ​အရေး​​ပေါ် ငွေလို​တဲ့​အခါ ​အောက်ဈေး​နဲ့ ထုတ်​​ရောင်းရရင် မ​ဟန်ပါဘူး။

ငွေသခင်ဖြစ်ဖို့ ဆေး​​ (SAIL) တွေ့ပြီမို့ ပန်းတိုင်ကို အရောက်လှမ်းဖို့ ခိုင်ခန့်​ထည်ဝါ​တဲ့ ရွက်သင်္ဘောကြီး​နဲ့ ရွက်လွှင့်လိုက်ကြပါစို့​လား ခင်ဗျာ။

အားလုံး ကိုယ်စိတ် နှစ်ဖြာ ကျန်းမာ ချမ်းသာကြပါ​စေ ခင်ဗျာ။

ဆက်​လက်​၍ ဖတ်​ရန်
ပိုးစုန်းကြူး ငွေးကြေးဆိုင်ရာ ဗဟုသုတ 

Credit: 
Firefly ပိုးစုန်ကြီး Personal Blog Page မှကူးယူထားသည်