သူဌေးဖြစ်ဖွယ် နည်း (၅) သွယ်

ဒီ​​နေ့​​တော့ ​ငွေကြေး ကြွယ်ဝချမ်းသာဖို့ သူဌေးဖြစ်ဖွယ် နည်း (၅) သွယ်ကို မျှ​ဝေလိုက်ပါတယ်။

(၁) စီးပွားရေးလုပ်ငန်းရှင်

စီးပွား​ရေးလုပ်ငန်းတစ်ခုခုကို စွန့်စားပြီး လုပ်​တဲ့​အခါ သူဌေးဖြစ်နိုင်ပါတယ်။ သမားရိုးကျ စီးပွားရေးလုပ်ငန်းရှင်​တွေ​ရော၊ စွန့်ဦးတီထွင် လုပ်ငန်းရှင်​တွေပါ ​အကျုံးဝင်ပါတယ်။ ဒါ​ပေ​မဲ့ ​အရှုံးကြီးရှုံးလို့ ဘဝပျက်သွားသူ​တွေလည်း ရှိတတ်တာမို့ အထူးသတိထားဖို့​​တော့ လိုပါတယ်။

သေမြေကြီး ရှင်ရွှေထီး https://www.facebook.com/fireflypsk/posts/256579539013662/

(၂) ပြိုင်​စံရှား​တဲ့ ထူးချွန်သူ

နယ်ပယ်တစ်ခုခုမှာ ထူးချွန်သွားရင်လည်း သူဌေးဖြစ်နိုင်ပါတယ်။ ​အ​​တော်ဆုံး ​အားကစားသမား​တွေ၊ ​​အနုပညာသမား​တွေ၊ ​အသိပညာရှင်​တွေ၊ ​အတတ်ပညာရှင်​တွေဟာ ​အများ​အားဖြင့် ဝင်​ငွေ​​ကောင်းတတ်ကြပါတယ်။

ဒီလိုဖြစ်ဖို့ ​အချိန်​တွေ​အများကြီး ရင်းနှီးမြှုပ်​နှံကြရပါတယ်။ ​အ​​တွေ့​အကြုံ​တွေယူရပါတယ်။ ပညာ​တွေ ဆည်းပူးရပါတယ်။ ဇွဲ၊ လုံ့လ၊ ဝိရိယ ​အများကြီး စိုက်ထုတ်ရပါတယ်။ ရ​လာတဲ့​ငွေ​တွေ​အားလုံးကို မသုံးဖြုန်းပစ်ပဲ စု​​ဆောင်းထားနိုင်ဖို့၊ ရင်းနှီးမြှုပ်​နှံတတ်ဖို့လည်း လိုပါတယ်။

စီးပွားရေးလုပ်ငန်းရှင်ဖြစ်မှ ချမ်းသာမှာလား https://www.facebook.com/fireflypsk/posts/267112521293697/

(၃) ကုမ္ပဏီ ရာထူးကြီး ဝန်ထမ်း

​​ကုမ္ပဏီဝန်ထမ်း အလုပ်လုပ်ရင်း ရာထူး​​တစ်​ဖြည်း​ဖြည်းကြီးလာ​တဲ့​အခါ လစာ​တွေလည်း ​အများကြီး တိုးသွားတတ်ပါတယ်။ ​ဥပမာ​ပြောရရင် သာ​မန် အင်ဂျင်နီယာ​ဝန်ထမ်း ​အသစ်​​တစ်ယောက်​ရဲ့ လစာ​နဲ့ အင်ဂျင်နီယာချုပ်တစ်ယောက်​ရဲ့လစာဟာ ၅ ဆ၊ ၁၀ ဆ၊ ​အဆ ၂၀ ကွာသွားတတ်ပါတယ်။ ပြီး​​တော့ ရာထူးကြီး​ဝန်ထမ်း​တွေဟာ ​အကျိုး​အမြတ်ခွဲ​ဝေ​ခံစားခွင့်​တွေ​အပြင် ​အခြား ​အကျိုး​ခံစားခွင့်​တွေ ​ရတတ်ပါသေးတယ်။

လူတိုင်း​​တော့ ဒါမျိုး မဖြစ်နိုင်ပါဘူး။ နှစ်​​ပေါင်းများစွာ လုပ်ငန်း​အ​​တွေ့​အကြုံယူရပါမယ်။ ​လိုအပ်ရင် ဘွဲ့လွန် ပညာရေး​တွေ ဆက်တက်ရပါမယ်။ အထက်လူကြီး​တွေ​၊ လုပ်​​ဖော်ကိုင်ဖက်​တွေ၊ ကိုယ့်​အောက်ကလူ​တွေ​နဲ့ သင့်မြတ်အောင် ​နေတတ်ရပါမယ်။ သူများထက် နှာတစ်ဖျားသာ​နေအောင် ​အမြဲကြိုးစား​နေရပါမယ်။ ရ​လာတဲ့​ငွေ​တွေ​အားလုံးကို မသုံးဖြုန်းပစ်ပဲ စု​​ဆောင်းထားနိုင်ဖို့၊ ရင်းနှီးမြှုပ်​နှံတတ်ဖို့လည်း လိုပါတယ်။

(၄) ​ချွေတာ၊ စု​​ဆောင်း၊ ရင်းနှီးမြှုပ်​နှံသူ

ဒီနည်းက​​တော့ အောင်မြင်​တဲ့ စီးပွားရေးလုပ်ငန်းရှင်၊ ပြိုင်​စံရှား​တဲ့ ထူးချွန်သူ၊ ရာထူးကြီး​ဝန်ထမ်း​တွေ မဟုတ်​ပေ​မဲ့ ဝင်​ငွေ ​အသင့်​အတင့်ရှိ​တဲ့ ဘယ်သူမဆို လုပ်လို့ရ​တဲ့နည်းပါ။ ဝင်​ငွေ​ရဲ့ ၃၀% ​နဲ့​အထက်ကို ပုံ​မှန် စု​​ဆောင်းထားနိုင်တယ်၊ စုမိ​တဲ့​ငွေကို သင့်တင့်​တဲ့ ရင်းနှီးမြှုပ်​နှံမှု​တွေလုပ်ထားတယ်ဆိုရင် ​ရေရှည်မှာ တင့်​​တောင့်တင့်တယ် သူဌေးဖြစ်နိုင်ပါတယ်။

ချက်ချင်း သူဌေးဖြစ်​တဲ့နည်း​​တော့ မဟုတ်ပါဘူး။ ကျိကျိတက်ချမ်းသာ​တဲ့ နည်းမဟုတ်ပါဘူး။ နှစ်​​ပေါင်း ၂၀၊ ၃၀ ကြာတတ်ပါတယ်။ ​ဒီနည်းကို သုံးပြီး ပုံ​မှန် စု​​ဆောင်းသွားရင် အသက်ကြီးလာ​တဲ့​အခါ ကိုယ့်​အတိုင်း​အတာ​နဲ့ ကိုယ် အိုစာမင်းစာ လုံလုံလောက်လောက်ရှိပြီး လှူနိုင်တန်းနိုင်​တဲ့ဘဝကို ရရှိနိုင်မှာပါ။ ​​

(၅) ​​အတိတ်ကံ​​ကောင်းသူ

​ထီပေါက်၊ ​ကံစမ်းမဲပေါက်၊ ​​လောင်းကစားလုပ်တိုင်းနိုင်၊ မွေးကတည်းက ချမ်းသာလာသူ​တွေ၊ မိဘ​ဆွေမျိုး​တွေဆီက ​အ​မွေရ​တဲ့သူ​တွေပါ။ ​အ​​ဟောင်းစားရ​တဲ့သူ​တွေပါ။ ​ကံကိုယုံပြီး ဆူးပုံမနင်းဖို့​​တော့ လိုပါတယ်။

လုံ့လလည်းထူ မိုးလည်းကူ https://www.facebook.com/fireflypsk/posts/290746195596996/

#ဒုစရိုက်သမားတွေ

ဒုစရိုက်လုပ်ငန်း​တွေ​၊ မသမာ​တဲ့ လုပ်ငန်း​​တွေလုပ်ပြီး၊ လာဘ်စားပြီး​ ကြီးပွားချမ်းသာလာ​တဲ့သူ​တွေကို​​တော့ ကျွန်​​တော်က ကြွယ်ဝချမ်းသာ​တဲ့ သူဌေး​တွေလို့ မသတ်မှတ်ပါဘူး။ ​အတိတ်​ကံ​​ကြောင့် ချမ်းသာလာတာလို့လည်း မသတ်မှတ်ပါဘူး။

ဆိုကြပါစို့။ လူတစ်ယောက်ဟာ ​ငွေ​တွေ​အများကြီးကို ​အတိုး​နဲ့ချေးပြီး သုံးပြဖြုန်းပြ​နေတယ်။ တိုက်​တွေဆောက်တယ်၊ ကား​တွေဝယ်တယ်။ သောက်စား​​ပျော်ပါးတယ်။ ဒီလူကို သူဌေးလို့ ​​ခေါ်လို့ရမလား။ မရပါဘူးခင်ဗျာ။ ​အတိုး​နဲ့ ချေးယူပြီး လျှောက်ဖြုန်း​နေတာ။ တစ်​​နေ့ အဲဒီ​အကြွေးကို ​အတိုး​ရော​အရင်းပါ ​ပြန်ဆပ်ရမှာပါ။ ဆင်းရဲတွင်း တူး​နေ​တဲ့သူပါ။

ဒုစရိုက်သမား​တွေလည်း ဒီလိုပါပဲ။ ​သံသရာက​နေ ချေးယူပြီး သုံးဖြုန်း​နေကြတာပါ။ ​ဒုစရိုက်လုပ်ငန်းလုပ်ပြီးမှ ရလာ​တဲ့​ငွေဟာ အတိတ်​ကံ​​ကောင်းလို့ ရလာတာမဟုတ်ပါဘူး။ ပစ္စုပ္ပန်​ကံကို စတေးပြီးမှရလာတာဖြစ်လို့ ​သံသရာ တစ်​​ကွေ့မှာ ​​အတိုးကြီးကြီး​နဲ့ ပြန်ပြီး ပေးဆပ်ရဦးမှာပါ။ ဒါမျိုးကို သွားပြီး ​အားမကျမိပါ​စေ​နဲ့ ခင်ဗျာ။

#ရောင့်ရဲခြင်း ဟာလည်း ချမ်းသာခြင်းတစ်မျိုးပါပဲ။ ဒါ​ပေ​မဲ့ တာ​ဝန်သိသိ​​ရောင့်ရဲတတ်ဖို့​​တော့ လိုပါတယ်။

​​ရောင့်ရဲတယ်ဆိုရာဝယ် https://www.facebook.com/fireflypsk/posts/246006016737681/

အားလုံး ကိုယ်စိတ် နှစ်ဖြာ ကျန်းမာ ချမ်းသာကြပါ​စေ ခင်ဗျာ။

ဆက်​လက်​၍ ဖတ်​ရန်
ပိုးစုန်းကြူး ငွေးကြေးဆိုင်ရာ ဗဟုသုတ 

Credit: 
Firefly ပိုးစုန်ကြီး Personal Blog Page မှကူးယူထားသည်