လခထုတ်ရက် ဝင်ငွေလေး ရလာပြီ။ ဝင်ငွေကို ဘယ်နှစ်ပုံ ပုံပြီး ဘယ်လောက်စုမယ်၊ ဘယ်လောက်သုံးမယ်ဆိုတာ ကြိုတင် စီမံ ဘတ်ဂျက် ဆွဲထားဖို့လိုပါတယ်။ ကြိုတင် ဘက်ဂျက် သတ်မှတ်ထားမှလည်း မကုန်သင့်တာ မကုန်၊ မဖြုန်းသင့်တာ မဖြုန်းမိအောင် သတိနဲ့ ထိန်းနိုင်မှာပါ။
—————————
(၁) ၅၀-၃၀-၂၀ နည်း
—————————
ဒီနည်းကတော့ နိုင်ငံတကာမှာ ရေပန်း အစားဆုံး နည်း ပါပဲ။
ဝင်ငွေရဲ့ ၅၀% ကို တစ်ကယ် လိုအပ်တာတွေ အတွက်သုံးရပါမယ် တဲ့။ စားဝတ်နေရေး၊ ကျန်းမာရေး၊ ယာဉ်စီးခ စတဲ့ မဖြစ် မနေသုံးရတဲ့ အသုံးတွေပဲ ဖြစ်ပါတယ်။ အတိုးတွေ ပေးနေရရင်လည်း ဒီထဲမှာ ထည့်တွက်ရပါမယ်။
ဝင်ငွေရဲ့ ၃၀% နှုန်းကိုတော့ လိုချင်တာတွေ အတွက် သုံးလို့ရပါတယ် တဲ့။ အဖြုန်းတွေလည်း ပါတယ်ပေါ့။ ခရီးထွက်တာ၊ အဝတ်အစား အကောင်းစား ဝယ်ဝတ်တာ၊ လက်ကိုင်အိတ် အသစ်ဝယ်တာ၊ ရုပ်ရှင်ကြည့်တာ၊ အပြင်မှာ ထွက်စားတာ၊ ဘောလုံးပွဲ သွားကြည့်တာ၊ ဆေးလိပ်သောက်တာ၊ ဘီယာသောက်တာ၊ ကွမ်းစားတာ၊ ဖုန်း အသစ်ဝယ်တာ စတာတွေ အတွက်ပါ တဲ့။ သာရေးနာရေးနဲ့ အလှူကိုလည်း ဒီထဲ ထည့်ရပါမယ်။
ဝင်ငွေရဲ့ ၂၀% ကိုတော့ မဖြစ်မနေ စုပါတဲ့။ ကြွေးတင်နေရင်တော့ ဒီထဲက ဆပ်ရမှာပါ။
—————————
(၂) ၁၀-၂၀-၇၀ နည်း
—————————
"ဘေဘီလုန်မှာ အချမ်းသာဆုံး ပုဂ္ဂိုလ်" စာအုပ်ထဲက နည်းပါ။
ဝင်ငွေရတာနဲ့ အရင်ဆုံး ကိုယ့်ကိုယ်ကိုယ် ၁၀% ကို ပေးပါတဲ့။ ပေးပါဆိုတာ ကိုယ်သုံးဖြုန်းဖို့ကိုပြောတာ မဟုတ်ပါဘူး။ အနာဂတ်အတွက် စုဆောင်းထားပြီး ရေရှည်အတွက် ရင်းနှီးမြှုပ်နှံဖို့ပါ။
အကြွေးတွေရှိနေရင်တော့ ၂၀% က အကြွေးဆပ်ဖို့ပါ တဲ့။ အကြွေးမရှိရင်လည်း စုဆောင်းထားရမှာပါ။
ကျန်တဲ့ ၇၀% ကတော့ အသုံးစရိတ်ပါ။ အခြေခံလိုအပ်ချက်တွေ အပြင် အဖြုန်း၊ သာရေးနာရေးနဲ့ အလှူအတန်းတွေ ပါ ထည့်တွက်ရပါမယ်။
—————————
(၃) ကျွန်တော့် အမြင်
—————————
လူတစ်ယောက်နဲ့ တစ်ယောက် လက်ရှိ အခြေအနေ မတူနိုင်တာကြောင့် အားလုံးအတွက် သင့်တော်တဲ့နည်း တစ်သမတ်ထဲတော့ မရှိနိုင်ပါဘူး။
ဝင်ငွေထက် ထွက်ငွေကများနေရင် အကြောင်း နှစ်မျိုး ထဲက တစ်မျိုးဖြစ်နိုင်ပါတယ်။
ဝင်ငွေနည်းလွန်းလို့ ဘယ်လိုပဲ ခြိုးခြံချွေတာပါစေ မလောက်တာမျိုးဆိုရင်တော့ ဝင်ငွေကို မြှင့်ရမှာပါ။ ဆင်းရဲ ပြီး အလုပ်အကိုင် ရှားပါးသေးတဲ့ ကျွန်တော်တို့ နိုင်ငံမှာတော့ ဝင်ငွေ မြှင့်ဖို့ အပြောလွယ်သလောက် အလုပ်ခက်ပါတယ်။ ဒါပေမဲ့ အားမလျှော့ပဲ ဝင်ငွေရလမ်းကို ရှာကြံနေရမှာက ကိုယ့်တာဝန်ပါ။
ဝင်ငွေတင့်တောင့် တင့်တယ် ရှိလျက်နဲ့ မလောက်တာဆိုရင်တော့ အဖြုန်းကို လျှော့ရမှာပါ။
လောလောဆယ်မှာ အကြွေးတွေဝိုင်းနေလို့ စုမိဖို့ မပြောနဲ့ အတိုးသတ်ဖို့တောင် မရှိတဲ့ သူတွေ ရှိပါတယ်။ သူတို့ကို စုဖို့သွားပြောနေလည်း မထူးပါဘူး။ ကြွေးကျေ အောင် အရင်လုပ်ရမှာပါ။
ငွေသခင် မဖြစ်သေးခင်မှာ အဖြုန်းကို တတ်နိုင်သမျှလျှော့။ အကြွေးကို ကျေအောင်ကြိုးစား၊ အရေးပေါ် ရန်ပုံငွေ အတွက်စု၊ ရေတို ရည်မှန်းချက်တွေ အတွက်စု၊ ရေရှည်အတွက် ရင်းနှီးမြှုပ်နှံတာတွေ လုပ်ရမှာပါ။
လူတိုင်းဟာ အနည်းဆုံး ၃၀% စုသင့်တယ်၊ ရတဲ့ငွေရဲ့ ၇၀% ထက်ပို မသုံးသင့်ဘူးလို့ ကျွန်တော်မြင်ပေမဲ့ လောလောဆယ် အကြောင်းကြောင်းကြောင့် လိုက်မလုပ်နိုင်တဲ့ သူတွေ ရှိပါတယ်။
ဒါ့ကြောင့် တစ်ဆင့်ချင်းစီ သွားဖို့ တိုက်တွန်းပါတယ်။ ထွက်ငွေက ဝင်ငွေထက်နည်း အောင် အရင်လုပ်ပါ။ အကြွေးတွေ ဆပ်ပါ။ ပြီးတော့မှ တစ်ဖြည်းဖြည်း စုနိုင်ဖို့ကြိုးစားပါ။ ၅% ဆိုလည်း ၅% ကနေ စ စုပါ။ ဒီလိုနဲ့ ဖြည်းဖြည်းချင်း စုတဲ့ ရာခိုင်နှုန်းကို တိုးသွားပါ။ ဝင်ငွေများတဲ့လူတွေက ပိုစုနိုင်အောင်ကြိုးစား သင့်ပါတယ်။ ဝင်ငွေများပြီး ချွေတာရင် ဝင်ငွေရဲ့ ၇၀% ၈၀% လောက်စုဖို့လည်း ဖြစ်နိုင်ပါတယ်။ ငွေသခင် မြန်မြန်ဖြစ်နိုင်တာပေါ့။
အားလုံး ကိုယ်စိတ် နှစ်ဖြာ ကျန်းမာ ချမ်းသာကြပါစေ ခင်ဗျာ။
ဆက်လက်၍ ဖတ်ရန်
ပိုးစုန်းကြူး ငွေးကြေးဆိုင်ရာ ဗဟုသုတ
Credit:
Firefly ပိုးစုန်ကြီး Personal Blog Page မှကူးယူထားသည်
No comments:
Post a Comment