ကိုဗစ်ကြားက စီးပွား​ရေး

ကိုဗစ်-၁၉ ​ရောဂါဘေး​​ကြောင့် စီးပွားရေး ကျဆင်းလို့ ​မြန်မာနိုင်​ငံမှာလည်း "ဆင်ပိန်ကျွဲ" ​တွေများလာ​​ကြောင်း မ​​နေ့က ရေး​ခဲ့ပြီးပါပြီ။ 

ဆင်ပိန်ကျွဲ https://www.facebook.com/106109390727345/posts/218064269531856/

ဒီ​​နေ့​​တော့ လုပ်ငန်းရှင် ဆင်ပိန်ကျွဲတွေကို ကိုဗစ်ကာလ​အတွက် အ​ကြံဉာဏ်​အချို့ ပေးပါရ​စေ။ အ​ကြံဉာဏ်​အားလုံးက​​တော့ ​အသုံး​တည့်ချင်မှ ​တည့်မှာပါ။ လုပ်ငန်း​ သ​ဘောသဘာဝ​နဲ့ ကာလ​ဒေသ​​ပေါ်မူတည်ပြီး ​ကိုယ့်​အတွက် အသုံး​တည့်တာလေး​တွေကိုယူပြီး ​အသုံးမ​တည့်တာ​တွေကို ပယ်ပါခင်ဗျာ။

▪️စီးပွားရေး​​အလား​အလာက ဘာမှ​ ​ရေ​ရေရာရာပြောလို့မရသေး​တဲ့​အ​ခြေ​အ​နေပါ။ ဒီ​​တော့ ကိုဗစ်မဖြစ်ခင်က တိုး​ချဲ့ဖို့ စီစဥ်ထား​တဲ့ ​အလုပ်​တွေကို မတိုး​ချဲ့ခင် ခဏ​​စောင့်ကြည့်ပါဦး။ ​ဖြစ်နိုင်ရင် ငွေထပ်​ထည့်တာမျိုးကို ဆိုင်း​ငံ့ထားပါဦး။

▪️အိမ်တို့ ကားတို့ဝယ်ဖို့ ​အစီ​အစဥ်ရှိပြီး မဝယ်ရသေးဘူးဆိုရင် မဝယ်ပဲ ​​စောင့်ကြည့်ပါဦး။ အိမ်ထဲ ကားထဲကို ​ငွေ​တွေမြုပ်သွားလို့ လုပ်ငန်း​အတွက် ​ငွေလို​တဲ့​အခါ ဒုက္ခဖြစ်တတ်တာမို့ပါ။ ​ငွေ​တွေ​အပုံလိုက်ကြီး သုံးလိုက်ရမယ့် ကိစ္စမျိုး​တွေ တတ်နိုင်သမျှ ​​ရှောင်ပါ။ လုပ်ငန်းလည်ပတ်ဖို့ လိုအပ်​တဲ့ ကုန်ကျစရိတ် (ဆိုင်ခန်းငှါးခ၊ ​အလုပ်သမားခ စသဖြင့်) ၆ လစာ ​ငွေသား လက်ထဲမှာ ရှိ​နေရင် ပို​​ကောင်းပါတယ်။

▪️လုပ်ငန်းမှာ လစဥ် ကုန်ကျ​နေ​တဲ့ ထွက်​ငွေ​တွေကို စိစစ်ပြီး ဘယ်​နေရာ​တွေမှာ လျှော့လို့ရမလဲ သုံးသပ်ပါ။ ​စီးပွားရေး မ​​ကောင်း​တဲ့ကာလမှာ ရုံးခန်း၊ ဆိုင်ခန်း၊ တိုက်ခန်း ငှါးရမ်းခ​တွေကို လျှော့​​ပေါ့ဆိုင်းငံ့ပေးဖို့ ညှိနှိုင်းကြည့်ပါ။ ဖြစ်နိုင်ရင် ​အနီး​အနားက ဈေးပိုသက်သာ​တဲ့ ​နေရာကို ​​ပြောင်းပါ။

▪️လုပ်ငန်း​နဲ့ပတ်သက်ပြီး ရဖို့​ကျန်​နေသေး​တဲ့ ​​ငွေတွေကို ​ရအောင် တောင်းပါ။ ​အ​ပြည့်မရရင်​​တောင် ရသလောက် ​​ခွဲပြီး ​​တောင်းပါ။

▪️လုပ်ငန်း​အတွက် ​ငွေချေး​ထား​မိရင် ​အတိုးလျှော့ချပေးဖို့ ​အကြွေးရှင်​တွေ​နဲ့ ညှိနှိုင်းပါ။ ​ဘဏ်​တွေက​​တော့ ​အတိုးနှုန်း​တွေကို လျှော့ချပေး​နေပါပြီ။ လုပ်ငန်းရှင်​တွေ​အတွက် ​အစိုးရက ​အတိုးသက်သက်သာသာ​နဲ့ ချေးပေးမယ့် သတင်း​တွေကို နားစွင့်ထားပါ။ ​ဖြစ်နိုင်ရင် ​အတိုးသက်သာ​တဲ့ ​နေရာက​နေ ​ငွေချေးပြီး ​အတိုးကြီး ​အကြွေး​တွေကို ဆပ်ပါ။ ​ရှိ​တဲ့ပိုင်ဆိုင်မှု​တွေကို ​​ရောင်းပြီး ဆပ်ပါ။ ​အတိုးသတ်ဖို့ ​ငွေထပ်ချေးတာမျိုးကို လုံးဝ ​​ရှောင်ပါ။ အတိုးပေးစရာမလို​တဲ့ အကြွေး​တွေကိုလည်း တတ်နိုင်သမျှ ညှိနှိုင်းပြီး ဆိုင်း​ငံ့ထားပါ။ ငွေလိုရင် ​အတိုးကြီးကြီး​နဲ့ ထပ်ချေး​မဲ့​အစား ​​​ငွေ​ထည့်ဝင် ရင်းနှီးမြှုပ်​နှံချင်​တဲ့သူ​တွေကို ဖိတ်​​ခေါ်ပြီး လုပ်ငန်း​ရဲ့ ရှယ်ယာသ​ဘောမျိုး​နဲ့ ပူး​​ပေါင်းလုပ်ကိုင်ကြတာပို​​ကောင်းပါလိမ့်မယ်။ ​

▪️အိမ်သုံးစရိတ်​တွေကိုလည်း တတ်နိုင်သမျှ လျှော့ချပါ။ ​အသုံး​နဲ့ ​အဖြုန်း၊ လိုအပ်တာ​နဲ့ လိုချင်တာကို ​ခွဲခြားသိပါ။

▪️လက်ရှိလုပ်ငန်းက ဝင်​ငွေရပေါက်ရလမ်း နည်း​နေရင် ​​လက်ရှိ ရုံးခန်း၊ ​အလုပ်သမား​၊ စက်ပစ္စည်းစတာတွေ​နဲ့ ​ငွေသိပ်​အပိုမကုန်ပဲ လုပ်နိုင်မယ့် အခြား ဝင်​ငွေရပေါက်ရလမ်း​တွေကို မျက်​​စေ့ဖွင့် နားစွင့်ထားပါ။ သမာအာဇီဝ​​တော့ ဖြစ်ပါ​စေ။

▪️ဒီကာလမှာ ကိုယ်​သေချာ နားမလည်​တဲ့ လုပ်ငန်း​သစ်တွေမှာ ​မြေစမ်းခရမ်းပျိုး ရှိသမျှ​ငွေ ပုံ​အောလိုက်တာမျိုး ​​ရှောင်ပါ။

​▪️​အလုပ်မ​​ကောင်း​တဲ့ကာလမှာ ​ဝန်ထမ်းလျှော့ချသင့်ရင် လျှော့ချရပါမယ်။ ဒီကာလ​အတွင်း သူတို့​ဒုက္ခမရောက်ရအောင် နစ်နာကြေး​​တော့ ပေးသင့်ပါတယ်။ မလျှော့ပဲ ​ကျန်​ခဲ့​တဲ့ ​ဝန်ထမ်း​တွေကို လခ ​အ​ပြည့်ပေးနိုင်အောင် ကြိုးစားပါ။ ​သေချာတွက်ကြည့်ပြီး ​အဆင်မ​ပြေလို့ လခ​အ​ပြည့်မပေးနိုင်ရင်​​တောင် ​အနည်းဆုံး သူတို့​အတွက် ​​အ​ခြေ​ခံလိုအပ်ချက်​တွေဖြစ်​တဲ့ ​စားရေးသောက်ရေး ရိက္ခာ​တွေ​အတွက် ထောက်​ပံ့ပေးပါ။ ​​လူချင်းမ​​တွေ့နိုင်ရင်​​တောင် ဝန်ထမ်း​တွေကို ဖုန်း​​ဆက် ​အကျိုး​အ​​ကြောင်းမေးပြီး ကြင်နာဂရုစိုက်တတ်​တဲ့ ​အလုပ်ရှင်ဖြစ်​​ကြောင်း ပြပါ။

▪️ကိုယ့်​ရဲ့ ဖောက်သည်​တွေကိုလည်း ​​မေ့မထားပါ​နဲ့။ ဒီကာလမှာ ကိုယ့်ဖောက်သည်​တွေ​အတွက် ဘာလုပ်ပေးနိုင်မလဲ တွေးပါ။ စီးပွားရေး​ပြန်​​ကောင်းလာ​တဲ့​အခါ ကိုယ့်ဖောက်သည်​တွေ ကိုယ့်ဆီ​ပြန်လာအောင် ​အခုကတည်းက ​​ကြိုတင်တွေး​​တော စီစဥ်ထားရမှာပါ။

▪️လက်ထဲမှာ ​ငွေ​လုံလုံလောက်လောက် ကိုင်ထား​တဲ့ စီးပွားရေးလုပ်ငန်းရှင်​တွေ​အတွက်​​တော့ ဒီ​အချိန်ဟာ ​အခွင့်​အရေး​ပါပဲ။ ​အခြားလုပ်ငန်းရှင်​တွေ ​ငွေများများ မရှိလို့ မလုပ်ရဲ၊ မကိုင်ရဲ​နဲ့ ကြပ်တည်း​နေချိန်မှာ ကိုယ်ကျွမ်းကျင်​တဲ့ နယ်ပယ်မှာ ဝယ်စရာ၊ ရင်းနှီးမြှုပ်​နှံစရာ အခွင့်​အလမ်း​တွေကို ​​တွေ့ရတတ်ပါတယ်။

▪️စီးပွား​ရေးလုပ်​တဲ့​အခါ အ​ခြေ​အ​နေ​အမျိုးမျိုး​​ကြောင့် စီးပွားရေးမ​​ကောင်း​တဲ့ ကာလ​တွေရှိတတ်ပါတယ်။ လက်ရှိ ကိုဗစ် ဖြစ်ရပ်ကို သင်ခန်းစာယူပြီး ​အနာဂတ်မှာ ဒီလိုဖြစ်ရပ်​တွေ​​ဖြစ်လာ​တဲ့​အခါ ကိုယ့်လုပ်ငန်း ကြာကြာ ရပ်တည်နိုင်အောင် ဘာ​တွေပြင်ဆင် ​​ပြောင်းလဲဖို့လိုလဲဆိုတာ တွေးထားပြီး စီးပွားရေး​​ကောင်း​တဲ့ကာလမှာ ကြိုတင်ပြင်ဆင်ထားရမှာပါ။ ဥပမာ စီးပွားရေး​​ကောင်း​တဲ့ကာလမှာ ရ​တဲ့​အမြတ်ကို ကုန်အောင် မသုံးပစ်ပဲ ​လုပ်ငန်းလည်ပတ်ဖို့ လိုအပ်​တဲ့ ကုန်ကျစရိတ်​ရဲ့ ၆ လစာလောက် ​ရန်ပုံ​ငွေ စု​​ဆောင်းထားတာမျိုးပါ။

▪️​အလုပ်ရှုပ်​နေ​တဲ့ ကာလ​တွေတုန်းက မလုပ်ဖြစ်​တဲ့ ကိစ္စ​တွေကို ​အခု ​အားလပ်​တဲ့​အချိန်မှာ ​အချိန်ပေးပြီးလုပ်ပါ။ လုပ်ငန်း​ရဲ့ ဝင်​ငွေထွက်​ငွေ စာရင်း​တွေကို ​ပြန်စစ်တာ၊ ​ငွေယိုပေါက်​တွေကို ရှာပြီးပိတ်တာ၊ ​လုပ်ငန်း လည်ပတ်မှု စနစ်​တွေကို ပို​​ကောင်းအောင်လုပ်တာ၊ အနာဂတ်မှာ ဝင်​ငွေ ပိုရနိုင်မယ့် နည်းလမ်း​တွေကို ကြိုတင်​ကြံစည် စိတ်ကူးထားတာ၊ ကိုယ်နားမလည်သေး​တဲ့ လုပ်ငန်းပိုင်း​တွေကို ​သေချာ​ပြန်​​လေ့လာတာ၊ ဝမ်းစာ​ဖြည့်ဖို့ စာဖတ်တာ စသဖြင့်ပါ။

အားလုံး ကိုယ်စိတ် နှစ်ဖြာ ကျန်းမာ ချမ်းသာကြပါ​စေ ခင်ဗျာ။

ဆက်​လက်​၍ ဖတ်​ရန်
ပိုးစုန်းကြူး ငွေးကြေးဆိုင်ရာ ဗဟုသုတ 

Credit: 
Firefly ပိုးစုန်ကြီး Personal Blog Page မှကူးယူထားသည်