တိုက်ဆိုင်လိုက်တာများကွာ

အောက်တိုဘာ ၃၀ ရက် ၂၀၁၉ ​မြန်မာ​စံ​​တော်ချိန် ည ၁၀ နာရီလောက်မှာ လူငယ် နှစ်ယောက် ကျွန်​​တော့်ဆီကို ​​ရှေ့ဆင့်နောက်ဆင့် ဆက်သွယ်လာပါတယ်။

တိုက်တိုက်ဆိုင်ဆိုင် တစ်ရက်တည်း တစ်ချိန်တည်း မိနစ်ပိုင်းပဲ ခြားပြီး အဲဒီ​​နေ့မှ စပြီး ဆက်သွယ်လာ​တဲ့ ညီငယ် နှစ်ယောက် မှာ ​အခြား တိုက်ဆိုင်တာ​တွေ ရှိပါသေးတယ်။ ပဲခူးတိုင်းမှာ ​နေတာချင်းတူတယ်။ မြို့​​တော့ ကွဲပါတယ်။

ထူးခြားတာက တစ်လကို လခ သုံးသိန်း ရတာချင်းပါ သွားတူ​နေတာပါ။ မသိရင် လာနောက်​နေသလိုပဲ။

တူတာ​တွေ ဒီမှာ ဆုံးပြီး မတူတာ​တွေ စပါတယ်။ ပြဿနာချင်းမတူကြဘူး​​ပေါ့။

ပထမ တစ်ယောက်က တစ်လ သုံးသိန်းရတာထက်ကို ပိုသုံး​နေမိလို့ ကြွေးတင်​နေပါတယ်။ ကြွေးကျေချင်လို့ ​အ​ကြံ​​တောင်းတာပါ။

ဒုတိယ တစ်ယောက်က​​တော့ တစ်လ သုံးသိန်းမှာ သုံးပုံ နှစ်ပုံလောက် စုမိလို့ ဘာရင်းနှီးမြှုပ်​နှံမှု လုပ်ရင်​​ကောင်းမလဲ ​အ​ကြံ​​တောင်းတာပါ။

ညီငယ် နှစ်ယောက်လုံးကို ရိုးရိုးသားသားပဲ သိသလောက် ​အ​ကြံပေးဖြစ်ပါတယ်။

ကြွေးတင်​နေ​တဲ့ ပထမ ညီငယ်လည်း ကိုယ့်ပြဿနာ ကိုယ်သိလို့ ​အ​ဖြေရှာဖို့ ဆန္ဒရှိ​တဲ့သူမို့ စိတ်ဓာတ်ခိုင်ခိုင်​နဲ့ ပြင်ဆင်သွားရင် ကြွေး​တွေ​ကျေပြီး အဆင်​ပြေ ​ငွေစုလာနိုင်မှာပါ။ ​​​​ချောင်လည်လာမှာပါ။ ယုံကြည်ပါတယ်။

​ငွေစုနိုင်​တဲ့ ဒုတိယ ညီငယ်ကလည်း ​လမ်း​မှန်ပေါ် ရောက်​နေပါပြီ။

အဲဒီမှာ နောက်ထပ် တတိယ ညီငယ်လေး တစ်ယောက်ကို စိတ်ကူးထဲမှာ ထပ်တွေးမိပါတယ်။ အဲဒီ တစ်ယောက်လည်း တစ်လ သုံးသိန်း ရ​နေမှာပါ။ ဒါ​ပေ​မဲ့ သုံးဖြုန်းပြီး ကြွေး​သံသရာထဲမှာ လည်​နေတယ်။ ကမ်းမမြင် လမ်းမမြင်​နဲ့ ကြွေး​သံသရာထဲကဘယ်လို ရုန်းထွက်ရမလဲဆိုတာ မသိ​တဲ့သူပါ။ ​

အ​​ဖြေကို ဘယ်မှာရှာရမှန်း မသိ၊ ဘယ်စာ​တွေ ဖတ်ရမှန်းမသိ၊ ဘယ်သူ့ကို ​အကူ​အညီ ​​တောင်းရမှန်းမသိပဲ မသိခြင်း ​အ​​မှောင်ထဲမှာ ဘယ်လောက်များ နစ်​နေဦးမလဲ တွေးပြီး ရင်​​မောရပါတယ်။

ဒီလို လူငယ်လေး​တွေ​ရဲ့ ဘဝခရီးလမ်းမှာ ​အလင်းပြပေးမယ့် သူ​တွေ များများ ​​ပေါ်လာပါ​စေလို့ ဆု​​တောင်းပါတယ်။ ဒီလို လူမျိုး​တွေ​​ကို တွေ့ရင်လည်း သိသလောက် တတ်သလောက် ​သင်ပြလမ်းညွှန်ပေးကြဖို့ တိုက်တွန်းလိုက်ပါတယ်။ ​

သုံးသိန်း ဝင်​ငွေ ရတာချင်း ​အတူတူ ​အသုံး​အဖြုန်းကွာသွားလို့ ဘဝ​ ​​နောင်ရေး အကျိုးပေး ကွာသွားတတ်တာကိုလည်း သတိပြု​စေလိုပါတယ်။ ​

လမ်းမှား​နေတာကို သိလို့ ​ဂငယ်​​ကွေ့​ပြန်​​ကွေ့ပြီး အ​မှန်လမ်းကို ​ပြန်လျှောက်ရင် နဂို လမ်း​မှန်လျှောက်​နေသူ​တွေထက် နည်းနည်းနောက်ကျသွားတာ ​မှန်​ပေ​မဲ့ လမ်းမှားကို မထူးဇာတ်ခင်းပြီး ဆက်လျှောက်​နေတာထက်​​တော့ ​အများကြီး သာမှာပါ။ ဘဝ ​​ပြောင်းလဲ သာယာလာမှာပါ။ ကြိုးစားရင် ကြိုးစားသလောက် ​​ရှေ့ကလူ​တွေကို မီနိုင်လာမှာပါ။

ဒါ့​​ကြောင့် ​အမှားကိုသိရင် ဒီ​​နေ့ပဲ စပြင်ကြပါစို့။ နောင်တ​တွေကို ဘေးဖယ်ထားပြီး ဂငယ်​​ကွေ့ ​​ကွေ့ကြပါစို့ ခင်ဗျာ။

အားလုံး ကိုယ်စိတ် နှစ်ဖြာ ကျန်းမာ ချမ်းသာကြပါ​စေ ခင်ဗျာ။

ဆက်​လက်​၍ ဖတ်​ရန်
ပိုးစုန်းကြူး ငွေးကြေးဆိုင်ရာ ဗဟုသုတ 

Credit: 
Firefly ပိုးစုန်ကြီး Personal Blog Page မှကူးယူထားသည်