ဒီနေ့တော့ ဂျပန်လူမျိုးတွေ တီထွင်ခဲ့တဲ့ ဘက်ဂျက်ဆွဲနည်း နဲ့ ဝင်ငွေထွက်ငွေ စာရင်း မှတ်နည်းလေးကို မျှဝေချင်ပါတယ်။ ကာခေးဘိုး လို့ ခေါ်ပါတယ်။
၂၀ ရာစု အစောပိုင်းမှာ ဂျပန်အစိုးရက ပြည်သူတွေမှာ ငွေစုတတ်တဲ့ အလေ့အထကောင်းလေး ရလာအောင် ဒီနည်းစနစ်ကို သုံးကြဖို့ ပညာပေး လှုံ့ဆော်ရေးတွေ လုပ်ခဲ့ပါတယ်။
ကာခေးဘိုးကို တိုက်ရိုက်ဘာသာပြန်ရရင်တော့ "အိမ်ထောင်စု ငွေစာရင်း စာအုပ်" ပါ။
ကာခေးဘိုး နည်းလမ်း အဆင့်ဆင့်ကို ဖော်ပြပေးလိုက်ပါတယ်။ ဗလာစာအုပ်အလွတ်တစ်အုပ်ရှိရင် လိုက်လုပ်လို့ ရပါပြီ။
#အဆင့်_၁
ဒီ အဆင့်မှာတော့ တစ်နှစ်စာ အကြမ်းဖျင်း ကြိုတင် စာရင်းလုပ်ရမှာပါ။
ဒီနှစ်မှာ ဝင်နိုင်တဲ့ တစ်နှစ်စာ ဝင်ငွေ ခန့်မှန်းခြေကို ချရေးရပါမယ်။ ပုံမှန် ဝင်ငွေရှိတဲ့ ဝန်ထမ်းတွေအတွက် တွက်ရတာ လွယ်ကူပေမဲ့ အချို့တွေအတွက်တော့ တွက်ရခက်ပါလိမ့်မယ်။ အရင်နှစ်တွေက ဝင်ငွေအခြေအနေပေါ် မူတည်ပြီး အနီးစပ်ဆုံး အကြမ်းဖျင်း ခန့်မှန်းပါ။
ထွက်ငွေ တွေကို ခန့်မှန်းရပါမယ်။ လစဥ် ကုန်တတ်တာတွေရော၊ တစ်နှစ် တစ်ခါကုန်တတ်တာတွေပါ ထည့်ရေးရမှာပါ။ လစဥ်မကုန်ပဲ တစ်နှစ်တစ်ခါ (သို့) တစ်ခါတစ်လေမှ ကုန်တတ်တာတွေက ဝင်ငွေခွန်၊ ခရီးသွားစရိတ်၊ အလှူ၊ မင်္ဂလာဆောင် လက်ဖွဲ့ စတာတွေပါ။
ပြီးရင် ဒီနှစ်မှာ ငွေဘယ်လောက် စုချင်တယ် ဆိုတာ ချရေးပြီး ငွေစုဖြစ်အောင် ဘာတွေ ပြုပြင်မယ်ဆိုတာကို ပါ ချရေးရပါမယ်။ ဥပမာ ဝင်ငွေပိုကောင်းတဲ့ အလုပ်ကို ရှာမယ်၊ ကွမ်းယာ လျှော့စားမယ်၊ လောင်းကစား လျှော့လုပ်မယ်၊ အပြင်စာတွေ ဝယ်စားတာ လျှော့မယ် စသဖြင့်ပေါ့။
#အဆင့်_၂
ဒီလအတွက် လစဥ် စာရင်းလုပ်ရမှာပါ။ ဒီလ ငွေဘယ်လောက်ဝင်မယ်၊ ငွေဘယ်လောက် ထွက်မယ် ဆိုတာကို ခန့်မှန်းပြီးချရေးပါ။ ထွက်ငွေကို ခန့်မှန်းတဲ့ အခါ မသုံးမဖြစ်တဲ့ အခြေခံကုန်ကျစရိတ်တွေကိုပဲ ထည့်တွက်ပါဦး။ ဥပမာ အိမ်လခ၊ မီတာခ၊ ဒီလအတွက် ပေးစရာ အခွန်အခ၊ အကြွေး စတာတွေပါ။ အခြား သုံးစရာ ဖြုန်းစရာတွေကို ထည့်မတွက်ပါနဲ့ဦး။
ဝင်ငွေထဲက ထွက်ငွေခန့်မှန်းခြေကို နှုတ်လိုက်ရင် ပိုငွေထွက်လာပါပြီ။ (ပိုငွေက အနှုတ်ပြနေရင်တော့ ဝင်ငွေတိုးအောင် လုပ်ဖို့ လိုနေပါပြီ။) ထွက်လာတဲ့ ပိုငွေထဲက ဘယ်လောက်စုမယ်၊ ဘာအတွက် ငွေစုမယ်ဆိုတာကို ချရေးပါ။
ပိုငွေထဲက စုငွေကို နှုတ်လိုက်လို့ ကျန်တဲ့ငွေကိုတော့ အထွေထွေ အသုံးစရိတ် အဖြစ် သုံးနိုင်ပါပြီ။ အဲဒီ ကျန်ငွေကို ဘယ်လိုသုံးမလဲဆိုတာ #အဆင့်_၃ မှာ ဆက်ကြည့်ပါ။
#အဆင့်_၃
ကျန်ငွေပမာဏကို ကြည့်ပြီး တစ်ရက်မှာဘယ်လောက်သုံးနိုင်မယ်၊ တစ်ပတ်မှာ ဘယ်လောက်သုံးနိုင်မယ်ဆိုတာ တွက်ကြည့်လို့ရပါပြီ။ သုံးသမျှကိုလည်း ဘာအတွက် ဘယ်လောက်သုံးတယ် ဆိုတာကို နေ့စဥ် ချရေးရမှာပါ။ သုံးလိုက်တာဟာ တကယ် လိုအပ်လို့လား၊ လိုချင်လို့လား၊ လူမှုရေးလား၊ မမျှော်လင့်ပဲ ကုန်တာလား စသဖြင့် အုပ်စုခွဲပြီး စာအုပ်ထဲမှာ မှတ်ထားပေးပါ။
ဝင်ငွေတွေကိုလည်း ဒီလိုပဲ ချမှတ်ရမှာပါ။
#အဆင့်_၄
လကုန်တဲ့ အခါ ဝင်ငွေနဲ့ ထွက်ငွေကို စာရင်းပေါင်းပြီး ကိုယ်စု ချင်သလောက် စုမိရဲ့လား၊ ဘယ်နေရာတွေမှာ ငွေယိုပေါက်တွေ ဖြစ်နေလဲ၊ နောက်လမှာ ဘယ်နေရာတွေမှာ အသုံးစရိတ်ကို လျှော့ရမလဲ၊ ဘယ်နေရာတွေမှာ ပြုပြင်ရမလဲဆိုတာကို ဆန်းစစ်ပါ။ ပြီးရင်တော့ အဲဒီ ပြုပြင်စရာတွေကို နောက်လမှာ ပြုပြင်ဖို့ စိတ်ထဲထည့်ထားပါ။ နောက်လအတွက် ဘက်ဂျက်ဆွဲဖို့ #အဆင့်_၂ ကိုပြန်သွားပါ။
နှစ်ကုန်ရင်တော့ ဝင်ငွေထွက်ငွေ စာရင်းချုပ်ကြည့်ပြီးတော့ #အဆင့်_၁ မှာ ခန့်မှန်းထားတာနဲ့ ကိုက်မကိုက်၊ ဘာတွေ ပြုပြင်ချွေတာဖို့ လိုတယ်ဆိုတာကို သုံးသပ်ရမှာပါ။
အသုံးစရိတ်တွေကို ခန့်မှန်းရတာ၊ တစ်ခုချင်းစီ လိုက်မှတ်ပြီး မှတ်ချက်ပေးရတာ မလွယ်ပေမဲ့ ဒီနည်းကို သုံးရင် ကိုယ့်ရဲ့ သတိမထားမိတဲ့ ငွေယိုစီးပေါက်တွေကို တွေ့ရမှာ အမှန်ပါပဲ ခင်ဗျာ။ ငွေကြေး သင်္ဘောကြီး မမြုပ်ခင် ငွေယိုပေါက်တွေ ရှာတွေ့ပြီး ပြုပြင်ဖာထေးနိုင်ပါစေ။
အားလုံး ကိုယ်စိတ် နှစ်ဖြာ ကျန်းမာ ချမ်းသာကြပါစေ ခင်ဗျာ။
ဆက်လက်၍ ဖတ်ရန်
ပိုးစုန်းကြူး ငွေးကြေးဆိုင်ရာ ဗဟုသုတ
Credit:
Firefly ပိုးစုန်ကြီး Personal Blog Page မှကူးယူထားသည်
No comments:
Post a Comment