နိုင်​ငံခြား​ငွေ ​အ​​ရောင်း​အဝယ် Forex Trading

Forex Trading ဆိုတာက​တော့ လိုင်း​ပေါ်မှာ နိုင်​ငံခြား​ငွေ ​အ​​ရောင်း​အဝယ်လုပ်တာပါပဲ။ ​အရှင်းဆုံး ဥပမာ ​​ပေးရရင် မနက်​​ဖြန်မှာ (သို့မဟုတ် သတ်မှတ်ထားတဲ့  ကာလ ​အပိုင်း​အခြားမှာ) အ​မေရိ​ကန်​ဒေါ်လာနဲ့ ယှဉ်ရင် ယူရို​ငွေ (သို့မဟုတ် ​အခြား နိုင်​ငံခြား​ငွေ တစ်ခုခု) ​ဈေး တက်မတက်​ ခန့်မှန်းရမှာပါ။ ​ခန့်မှန်းတာ ​မှန်ရင် မြတ်မယ်။ ခန့်မှန်းတာ မှားရင် ရှုံးမယ်​ပေါ့။ ဈေး​အတက်​​အကျ ပမာဏနဲ့  ယူထားတဲ့ ​​​လောင်း​ကြေး အဆ​ပေါ်မူတည်ပြီး ​အရှုံး​အမြတ် ​အနည်း​အများ ကွာပါတယ်။

အသက်​​မွေးဝမ်း​​ကြောင်း လုပ်ငန်းတစ်ခုပါပဲ။ ​အချိန်​ပေး​လေ့လာရမယ်။ ​ဈေးကွက်​​အ​​ကြောင်း နားမလည်ပဲ သွားလုပ်ရင် ​​လောင်းကစား ​ဆန်ပါတယ်။ ​​အမြတ်များနိုင်သလို ​အရှုံးလည်း ကြီးနိုင်ပါတယ်။ ​သူက Zero Sum Game လို့​ခေါ်တဲ့ ​အားလုံး​​ပေါင်းလိုက်ရင် ​အမြတ်မရှိတဲ့ ​​လောင်းကစား​​ဆန်တဲ့ လုပ်ငန်းပါ။ ကျွမ်းကျင်သူ​တွေမြတ်ပြီး မကျွမ်းသူ​တွေ ရှုံးပါတယ်။ ​​​အကွက်​​ရွှေ့မှားတဲ့သူ ​အစား​ခံရပါတယ်။

​မြန်မာနိုင်​ငံမှာ​​တော့ Forex Trading ကို ပုံ​မှန် ​အမြတ်​ကျန်​အောင် ​ဆော့နိုင်တဲ့သူရှားပြီး မအူမလည်နဲ့ ရှုံးတဲ့သူ များပါတယ်။ ဘယ်​လောက်ပဲ နည်းဗျူဟာ​တွေ​တွေ ​ဖော်မြူလာ​တွေ ​အယ်ဂိုရ​သမ် Algorithm ​တွေ ကောင်းတယ်​ပြော​ပြော ​အမြဲပုံ​မှန် မြတ်​နေဖို့ မလွယ်လှပါဘူး။ ကိုယ့်တွက်​နည်းတဲ့သာတဲ့ တွက်​နည်း​တွေ နိုင်​ငံတကာမှာ ​အမြဲတီထွင်​ကြံဆ​နေကြတာမို့ နိုင်​ငံတကာက Forex Trader ​ဖျံ​တွေနဲ့ ​ရေရှည်မှာ ယှဉ်နိုင်ဖို့ ခက်​ပါတယ်။

သင်တန်းတက်​လည်း ​အ​ခြေ​ခံပဲ သင်​ပေးမှာပါ။ တစ်လ ​ဂေါက်ရိုက်သင်တန်း​လေးတက်​ပြီး နိုင်​ငံတကာ ​ဂေါက်ရိုက်ပြိုင်ပွဲ​တွေမှာ ဝင်ပြိုင်ဖို့ မဖြစ်နိုင်​သေးသလို Forex Trading လက်​ပူတိုက် သင်တန်းတက်​ပြီး နိုင်​ငံတကာမှာ ဝင်​ဆော့ရင်​တော့ ရှုံးဖို့များပါတယ်။  ​အချိန်တိုတို ​အတွင်းမှာ ကျွမ်းကျင်ဖို့ မလွယ်ပါဘူး။ နှစ်​​ပေါင်းများစွာ ​ရှုံးလိုက်မြတ်လိုက်နဲ့ သင်ခန်းစာ​တွေယူပြီး ဝမ်းစာ​ဖြည့် ​လေ့ကျင့်ထားမှ မြတ်နိုင်တာပါ။ ​တော်​တော်ကြီးကို ကျွမ်းကျင်မှပါ။ ကျိန်း​သေမြတ်သွားတာက​တော့ Forex Trading သင်တန်းဖွင့်စားတဲ့ သူ​တွေနဲ့ ကြား​ခံ ပွဲစား​တွေပါပဲ။

ခု​မြန်မာနိုင်​ငံနဲ့ ချိတ်ဆက်​လုပ်​နေတဲ့ လိုင်း​​ပေါ်က ​ငွေ​ကြေး ​ဈေးကွက်​ ​အ​​ရောင်း​အဝယ် Forex Trading Platform နဲ့ Broker လမ်း​​ကြောင်း ​တွေဟာ တရား မဝင်တာ​တွေ များပါတယ်။ ​​အစိုးရက တရားဝင် ခွင့်မပြုထားပါဘူး။ ကိုယ်ရင်းထားတဲ့ ​ဒေါ်လာ​ငွေ​လေးကို အချိန်မ​ရွေး လိမ်​ပြေးနိုင်ပါတယ်။ လိမ်​ပြေး​နေကြတာ​တွေ ရှိပါတယ်။ ကမ္ဘာ တစ်လွှားမှာ လိမ်စား​နေတဲ့ Forex Trading Broker ကုမ္ပဏီ​တွေ ​အများကြီးပါ။ ​သတိထား​စေချင်ပါတယ်။ (​​အလိမ်မဟုတ်ပဲ ​အ​မှန်​အ​ကန်​တွေလည်း ရှိပါတယ်။)

ဒီလို ​အလိမ်​တွေ​​ကြောင့်၊ ​အရှုံး​အမြတ်ကြီးတာ​တွေ​​ကြောင့်လည်း ဒီလုပ်ငန်းကို လုပ်မစား​တော့ပဲ သင်တန်း​လေး​တွေ ​ပေး​နေတာကမှ သင်တန်း​ကြေးရလို့ တွက်​​ခြေပိုကိုက်တယ်ဆိုပြီး သင်တန်း​ပေးစား​နေတယ်လို့ ယူဆရပါတယ်။

Forex Trading သင်တန်း​တွေ၊ ပွဲစား​တွေကို ချင့်ယုံကြ​စေလိုပါတယ်။

"Forex Trading ကျွမ်းကျင်ပါတယ်။ ​ငွေ​ထည့်ပါ။ ​အမြတ်ရ​အောင်လုပ်​ပေးမယ်" ဆိုတဲ့သူ​တွေကိုလည်း မယုံပါနဲ့။

Forex Trading ကို ကျွန်​တော်က ရင်းနှီးမြှုပ်​​နှံမှုလုပ်ငန်းလို့ မသတ်မှတ်ပါဘူး။ ​​ဈေးကစားပြီး ​အ​​ရောင်း​အဝယ်လုပ်တာပါပဲ။

ကျွမ်းကျင်​နေပြီးသား သူ​တွေကို ဘာမှ မ​ပြောလိုပါဘူး။ ကျွမ်းတယ်ထင်ရင်​တော့ ဆက်လုပ်ကြပါ။

မကျွမ်းကျင်သေးလို့ ခုမှ သင်တန်းတက်ကြည့်မယ်ဆို​တဲ့သူ​တွေကို​​တော့ ​အားမ​​ပေးပါဘူး။ ကျွန်​တော်က​တော့ Forex Trading ကို မကျွမ်းကျင်ပါဘူး၊ မလုပ်တတ်ပါဘူး။ ​​ရှောင်ပါတယ်။ ဟိုလူမြတ်ရင် ဒီလူရှုံး၊ လူ့​လောကကို ဘာမှ ​အကျိုးမပြုတဲ့ လုပ်ငန်းမို့ အားမ​ပေးပါဘူး ခင်ဗျာ။

အားလုံး ကိုယ်စိတ် နှစ်ဖြာ ကျန်းမာ ချမ်းသာကြပါ​စေ ခင်ဗျာ။

ဆက်​လက်​၍ ဖတ်​ရန်
ပိုးစုန်းကြူး ငွေးကြေးဆိုင်ရာ ဗဟုသုတ 

Credit: 
Firefly ပိုးစုန်ကြီး Personal Blog Page မှကူးယူထားသည်

ကွိုင်​တွေ​​ရောင်းရင် ဖမ်းမယ်

ဒီစ်ဂျစ်တယ် ​ငွေကြေး​တွေ (ကွိုင်​တွေ) ကို လိုင်း​​ပေါ်က​နေ ​​ရောင်းချ​​နေတာ​တွေဟာ တရားမဝင်​​ကြောင်း၊ ဥပ​ဒေကို ဖောက်ဖျက်ကျူးလွန်သူ​တွေကို ​​ထောင်​ဒဏ်​ငွေ​ဒဏ် ချမှတ်နိုင်​​ကြောင်း ဗဟို​ဘဏ်က သတင်းစာ​တွေက​​တစ်ဆင့် ​မေလ ၁၅ ရက် ၂၀၂၀ မှာ ​အမိန့်​​ကြော်ငြာစာ ထုတ်​ပြန်​ခဲ့ပါတယ်။

ဒစ်ဂျစ်တယ်​ငွေ​​ကြေး​တွေ​အ​​ကြောင်း ကျွန်​​တော်ရေး​ခဲ့ပြီးပါပြီ။

လျှို့ဝှက် ငွေကြေး Cryptocurrency https://www.facebook.com/fireflypsk/posts/133910021280615

ဒစ်ဂျစ်တယ် ​ငွေကြေးစနစ်ဟာ နည်းပညာ​နဲ့ ရည်ရွယ်ချက်​​ကောင်းတာ​မှန်​ပေ​မဲ့ ကွိုင်​လောကမှာ လူလိမ်​တွေ ကျက်စားပါတယ်။

ကွိုင်​အသစ်​တွေ တစ်မျိုးပြီး​​တစ်မျိုး တီထွင်ပြီး ​အမြတ်ထုတ် ဈေးကစား​နေ​တဲ့သူ​တွေ ရှိတယ်။

ကွိုင်​တွေကို ​အ​​ကြောင်းပြပြီး လိုင်း​​ပေါ်မှာ လိမ်စား​နေ​တဲ့လူ​တွေရှိပါတယ်။

လူလိမ်​တွေကလည်း လူလည်​တွေ ခင်ဗျ။ ​အ​မှန်​နဲ့ ​အမှားကို ​ရောချပြီး လူ​တွေကို ယုံကြည်လာအောင် လိမ်တတ်ကြပါတယ်။

ဥပမာ လူလိမ်​တွေက ​အရင်ဆုံး သကြားကို ပြတယ်။ "သကြားက ချိုပါတယ်၊ မယုံရင် စားကြည့်ပါ" ဆိုပြီး စားခိုင်းတယ်။ စားကြည့်​​တော့ သကြားပဲ ချိုတာ​​ပေါ့။ (ဆိုလိုချင်တာက ​အမြတ်​ကို အရင်ပေးပြီး မက်လုံးပေးတယ်​​ပေါ့။) ဒီလို​နဲ့ ​လောဘသား​တွေ လူလိမ်ကို ယုံမိပြီ။ ဒီ​အချိန်ကျမှ လူလိမ်က "ကျွန်​​တော့် မစင်လေးလည်း စားကြည့်ပါဦး။ ချိုတယ် ခင်ဗျ" လုပ်​​တော့တာ။ သကြားတုန်းကလည်း ချိုတာပဲ၊ မစင်လည်း ချိုမှာပဲဆိုပြီး စား​တဲ့သူ​တွေ ​အတွက်​​တော့ ရင်လေးမိပါတယ်။ လူလိမ်​တွေက ​​အလိမ်​တွေကို အ​မှန်တရားလေး နည်းနည်းအုပ်ပြီး လိမ်စား​နေကြတာ ခင်ဗျ။

​ကိုယ် ပင်ပင်ပန်းပန်းရှာထားရ​တဲ့ ငွေကို ရင်းနှီးမြှုပ်​နှံ​တဲ့​အခါ ​အလိမ်မဟုတ်တာ ၁၀၀% ​သေချာမှ ​ငွေ​ထည့်သင့်တာပါ။ သို့​လော သို့​လော ​သံသယနည်းနည်း ရှိ​နေရင်​​တောင် ​ငွေမ​ထည့်သင့်​​တော့ပါဘူး။ ​အထူးသဖြင့် လိုင်း​​ပေါ်က​နေ ​ငွေ​ထည့်ခိုင်း​တဲ့လူ​တွေကို မယုံသင့်ပါဘူး။

ခု​​တော့ ဒစ်ဂျစ်တယ် ​ငွေကြေး​တွေ ကွိုင်​တွေကို တရားမဝင်​​ကြောင်း ​​ဗဟို​ဘဏ် ကြေညာလိုက်တာကို ကျွန်​​တော်က​​တော့ လှိုက်လှိုက်လှဲလှဲ ကြိုဆိုပါတယ်။ ​လောဘစိတ်​နဲ့ ကွိုင်နောက်လိုက်ရင်း ​ငွေ​တွေ ဆုံးရှုံးသွား​​ခဲ့ရတဲ့လူ​တွေ ကမ္ဘာ​အ​နှံ့မှာ ​​တော်​​တော်များ​ခဲ့ပြီကိုး။

အားလုံး ကိုယ်စိတ် နှစ်ဖြာ ကျန်းမာ ချမ်းသာကြပါ​စေ ခင်ဗျာ။

ဆက်​လက်​၍ ဖတ်​ရန်
ပိုးစုန်းကြူး ငွေးကြေးဆိုင်ရာ ဗဟုသုတ 

Credit: 
Firefly ပိုးစုန်ကြီး Personal Blog Page မှကူးယူထားသည်

လျှို့ဝှက် ​ငွေ​ကြေး Cryptocurrency

မ​နေ့က ဘိုး​​တော် ပိုးစုန်းကြူး ​အ​​ကြောင်း​ရေးတာ ​မြန်မာနိုင်​ငံမှာ လိမ်ခဲ့ကြတဲ့ လိမ်နည်း​တွေနဲ့ ခပ်ဆင်ဆင်ဖြစ်ရုံသာမက Cryptocurrency လို့​ခေါ်တဲ့ လျှို့ဝှက် ​ငွေ​ကြေး ​ဒစ်ဂျစ်တယ် ​ငွေ​ကြေး အ​​ကြောင်း ကိုပါ တစ်ချက်​ခုတ် နှစ်ချက်​ပြတ် ​ခြေဆင်းပျိုးထားတာပါ။

ဘိုး​​တော် ပိုးစုန်းကြူး https://facebook.com/fireflypsk/posts/133621664642784

လျှို့ဝှက် ​ငွေ​ကြေး ​အ​​ကြောင်းသိ​​ကောင်းစရာ ​ဗဟုသုတ အ​သေးစိတ်ကို​တော့ ​နောက်မှပဲ ​ရေးပါဦးမယ်။ ခု​တော့ ​အဓိက ​​​အလိမ်မ​ခံရ​အောင် ​အရင်​ရေးချင်တာပါ။

ဘစ်ကွိုင် Bitcoin၊ လိုက်ကွိုင် Litecoin၊ အီသာရီ​​ရမ် Ethereum၊ ရစ်ပယ် Ripple စသဖြင့် လျှို့ဝှက် ​ငွေ​ကြေး ဒစ်ဂျစ်တယ် ​ငွေ​ကြေး Cryptocurrency ​တွေ မှာ ရင်းနှီးမြှုပ်​နှံဖို့ ​ပြောလာရင် ​ငွေလုံးဝ မ​ထည့်မိပါ​စေနဲ့ ခင်ဗျာ။ ရဲရဲသာ ငြင်းလိုက်ပါ။

​မြန်မာနိုင်​ငံမှာ ဒီလိုလုပ်​ပေးတဲ့သူ​တွေဟာ လိမ်တာ​တွေ များပါတယ်။ Cryptocurrency, Bitcoin, Litecoin, Ethereum, Ripple စသဖြင့် လူနားမလည်တာ​တွေ ​​ပြောပြီး "အဲဒါကျွမ်းပါတယ်၊ ​ငွေနှစ်ဆမြတ်ပါမယ်" ဘာညာနဲ့ ရွှီးပြီး တစ်ကယ်လည်း ရင်းနှီးမြှုပ်​နှံ​ပေးတာ မဟုတ်ပဲ ​ငွေလိမ်​ပြေးတာမျိုး​တွေပါ။ ဥပမာ ​ပေးရရင် ဘိုး​တော်ပိုးစုန်းကြူးရဲ ့ ဓာတ်လုံး​တွေ​​ဝယ်ဖို့ ​ငွေ​ထည့်ကြပါဆိုပြီး ​ငွေ​တွေ ​လျှောက်​ကောက်ပြီး ​ငွေရတဲ့ ​အခါ ဓာတ်လုံး​​တောင် မဝယ်ပဲ ​ငွေလစ်​ပြေးတာမျိုးပါ။

"မလိမ်ပါဘူး၊ စိတ်ချရတယ်၊ လျှို့ဝှက် ​ငွေ​ကြေး ဒစ်ဂျစ်တယ် ​ငွေ​ကြေး မှာ တစ်ကယ် ရင်းနှီးမြှုပ်​နှံ​ပေးမှာပါ" ဆိုလည်း ​ငွေမ​ထည့်ပါနဲ့ ခင်ဗျာ။ ဘာလို့လဲဆို​တော့ လက်​ရှိ ဝယ်​​ရောင်းလုပ်​နေကြတဲ့ ဒစ်ဂျစ်တယ် ​ငွေ​ကြေး​တွေဟာ ဘိုး​တော် ဓာတ်လုံး​တွေလိုပဲ ​တန်ဖိုးရှိ သ​ယောင်​ယောင်နဲ့ နှစ်ပြား မ​တန်တာ​တွေမို့ပါ။

လျှို့ဝှက် ​ငွေ​ကြေး ဆက်​စပ် သွယ်မှတ် စနစ် Blockchain နည်းပညာဟာ ​အဖိုး​တန်ပါတယ်။ အဲဒီနည်းပညာဟာ ​အွန်လိုင်း ​ငွေ​ကြေး​ပေး​ချေမှု​တွေကို လုံခြုံစိတ်ချရ​အောင် လုပ်​ပေးနိုင်တာမို့ ​အကျိုးရှိ ​တန်ဖိုးရှိပါတယ်။ ဒါ​ပေမဲ့ နည်းပညာ တန်ဖိုးရှိတိုင်း ဒစ်ဂျစ်တယ် ​အ​ကြွေ​စေ့​တွေက ​တန်ဖိုးရှိလှတာ​တော့ မဟုတ်ပါဘူး။ ဥပမာ ​ပေးရရင် ကျားဘန်း ပရုတ်ဆီ ထုတ်လုပ်တဲ့ ​ဖော်မြူလာ နည်းပညာဟာ ​အဖိုး​တန်ပါတယ်။ ​ဒေါ်လာ ကုဋေ​​ပေါင်းများစွာ တန်ပါတယ်။ ဒါ​ပေမဲ့ ကျားဘန်းပရုတ်ဆီ တစ်ဘူးက ဘယ်​လောက်မှ မ​တန်ပါဘူး။ ဒီနှစ်ခုကို ​ရော​ထွေးပြီး ပရုတ်ဆီဘူးကို ​ဒေါ်လာ​​​ထောင်​​သောင်းချီ​ပေးပြီးဝယ်ချင်​နေရင် အဲဒါ ငပိန်းပဲ​ပေါ့။

​နောက်ပိုင်းမှာ ​နိုင်​ငံတစ်ကာ ​ငွေ​ပေး​ချေရာမှာသုံးဖို့ ​ဒေါ်လာ ​အစားထိုး ဒစ်ဂျစ်တယ် ​ငွေ​ကြေး​တွေ ​ပေါ်လာ​တော့မှာပါ။ အဲဒီ ​ငွေ​ကြေး​​တွေရဲ ့​နောက်မှာ ​အ​​ပေါင်တင်ထားတဲ့ တစ်ကယ့် ​​ငွေ​တွေ၊ စာချုပ်​တွေ၊ ​အဖိုး​တန် ပစ္စည်း​တွေ အာမ​ခံ ရှိ​နေရပါမယ်။ ဒါမှပဲ အဲဒီ ဒစ်ဂျစ်တယ် ​ငွေ​ကြေးရဲ ့ ​တန်ဖိုး ​အတက်​​အကျ မကြမ်းပဲ တည်ငြိမ်မှာပါ။ ခုလက်​ရှိ ဒစ်ဂျစ်တယ် ကွိုင် ​အ​ကြွေ​စေ့​တွေက​တော့ ဘိုး​တော် ဓာတ်လုံး​တွေပါ။ ဘိုး​တော် ပိုးစုန်းကြူးက ထုတ်တဲ့ ဓာတ်လုံး​၊ ဘိုး​တော် ​​မျောက်ကြီးကထုတ်တဲ့ ဓာတ်လုံး​၊ ဘိုး​တော် ဆင်ကြီးကထုတ်တဲ့ ဓာတ်လုံး​ စတဲ့ ​အလိမ် ဓာတ်လုံး​​တွေလိုပဲ ဒစ်ဂျစ်တယ် ​ငွေ​ကြေး​တွေ မှိုလို​ပေါက်​နေပါတယ်။

နိုင်​ငံခြားမှာ ဘစ်ကွိုင်ကို ရင်းနှီးမြှုပ်​နှံပြီး တစ်ကယ်​ချမ်းသာသွားတဲ့သူ​တွေ ရှိတယ်လို့ ​​စောဒက တက်​ချင်သူ​တွေလည်း ရှိမှာပါ။ ဟုတ်ကဲ့ ရှိပါတယ်။ သူတို့​တွေဟာ ဘိုး​​တော် ဓာတ်လုံးကို သိန်း ၂၀ နဲ့ ဝယ်ပြီး သိန်း ၈၀၀ နဲ့ ​ပြန်​​ရောင်းလိုက်တဲ့ သူ​တွေနဲ့ ​အတူတူပါပဲ။ ​အဆ ၄၀ မြတ်ပါတယ်။ ဒါ​ပေမဲ့ သူတို့မြတ်တာ မသမာသူ​တွေ ​ဈေးကစားတာကို ​မျှောလိုက်ပြီး မြတ်တာပါ။ သူများ​တွေရဲ ့​ငွေ​တွေ ဘဝ​တွေကို စ​တေးပြီး မြတ်တာပါ။ ကိုယ့်ထက်​ ပိုပိန်းတဲ့သူ​တွေကို နှပ်ချပြီး မြတ်တာပါ။ သူတို့ကသာ ​အဆ ၄၀ မြတ်လို့ ​ပျော်​နေတာ၊ ဟိုမှာ သိန်း ၈၀၀ နဲ့ ဝယ်ထားတဲ့ ဓာတ်လုံးကို ဝယ်မဲ့ သူ​ဌေး​ပေါ်မလာလို့ ပိုက်​ဘောမိပြီး တစ်ငိုငို တစ်ရယ်ရယ် ဖြစ်​နေပြီ။ ပဋာ​မြေလူး ရူး​တော့မယ်။

ဒစ်ဂျစ်တယ် ​ငွေ​ကြေး​တွေဟာ ​အ​ရေ​အတွက်​ ​အကန့်​အသက်​ရှိလို့ ​နောက်ပိုင်း ​ဈေးတက်​ဦးမှာဆိုပဲ။ ဘိုး​တော် ဓာတ်လုံးလည်း ၉၉၉ လုံး ကန့်သတ် ထားတာ​လေ။

ကိုယ့်ကိုယ်ကို လည်လှပြီထင်လို့ ဒစ်ဂျစ်တယ် ​ငွေ​ကြေးမှာ ​ငွေ​ထည့်မယ်၊ မြတ်ရင် ရပ်မယ်ဆိုတဲ့ သူ​တွေကို ​ပြောချင်တာက နယူ​တန်​​​တောင် ​ခံလိုက်ရတယ် ဆိုတာပါပဲ။ လည်လွန်းတဲ့ဘီး ​ချေးသင့်တတ်ပါတယ်။

အလိမ်​ခံရတဲ့ နယူ​​​တန် https://www.facebook.com/fireflypsk/posts/133346308003653

ဒစ်ဂျစ်တယ် ​ငွေ​ကြေး​တွေရဲ ့ ​​ခေါင်း​ဆောင်ကြီး ဘစ်ကွိုင်ဟာ မသမာ ​ဈေးကစားသူ​တွေရဲ ့လက်​ချက်​နဲ့​ရော ​လောဘတက်​​နေတဲ့ လူ​တွေ​​ကြောင့်ပါ ​ဈေးက ​အတက်​ကြမ်း​အကျကြမ်း​နေပါတယ်။

၂၀၁ရ နှစ်စ မှာ တစ်ခုကို ဒေါ်လာ​​တစ်​​ထောင်တောင် မ​တန်ခဲ့တဲ့ ဘစ်ကွိုင် Bitcoin ဟာ ၂၀၁ရ နှစ်ကုန်ပိုင်း တစ်နှစ်​အတွင်းမှာ ​ဒေါ်လာ နှစ်​​သောင်းနီးပါးထိ ​ဈေးတက်​ခဲ့ပါတယ်။ (၂၀၀၉ ခုနှစ် စ ​ပေါ်တုန်းက ပြားဂဏန်းပဲ တန်ပါတယ်။) အဲဒီက​နေ ပူ​​ဖောင်း​ပေါက်ပြီး ၂၀၁၈ ​အကုန်မှာ ​ဒေါ်လာ သုံး​​ထောင်​ကျော်ထိ ထိုးကျသွားရာက​​နေ ခုဆို ​ဒေါ်လာ ရှစ်​​ထောင်​ဈေး​လောက်​ ​ပြန်ပေါက်​နေပါတယ်။ ​နောက်ကွယ်က လက်​မည်းကြီး​တွေ ရှို​နေပါတယ်။ အဲဒါကို သွားစမ်းမိတဲ့သူ​တွေ ​ခံရမှာ မြင်​ယောင်ပါ​သေးတယ်။ မလုပ်ကြပါနဲ့။

ဒီလို​ပြောတတ်လွန်းလို့ ​အချို ့ကလည်း ကျွန်​တော့်ကို ​အပြုသ​ဘောမမြင်ပဲ ​အပျက်​သ​ဘောပဲမြင်တဲ့ ​အဆိုးမြင်ဝါဒီသမားလို့ ​ဝေ​ဖန်ကြပါတယ်။ ကျွန်​တော်က တစ်ဖက်​သတ်ကြီး ​အဆိုးမြင်တာမဟုတ်ပဲ နှစ်ဖက်​လုံးကို ခြုံငုံ ကြည့်လိုက်​တော့ ​အ​​ကောင်း​တွေထက်​ ​အဆိုး​တွေ ပိုများ​နေတာ​​တွေ ့တဲ့​အခါ ​ဝေ​ဖန်​ထောက်ပြတာပါ။ ​​ကောင်းရင် ​​ကောင်းတယ်လို့ ​ပြောမှာပါ။

ဪ ​မေ့​နေလိုက်တာ။ ဘိုး​တော် ပိုးစုန်းကြူး ကိစ္စ။ ဒီလိုနဲ့ နိုင်​ငံခြားက သူ​ဌေးက သုံးလလည်း ​ပေါ်မလာ၊ ​လေးလလည်း ​ပေါ်မလာဆို​တော့ ဝယ်ထားတဲ့သူ​တွေ စိုးရိမ်ပြီး ဘိုး​တော်ဆီသွားကြပါတယ်။

ဝိုင်းရိုက်မလို့ လို့ထင်လို့လား။ ​မဟုတ်ဘူးဗျ။ အဟဲ။

​အလိမ်​ခံရတဲ့လူ​တွေခမြာ ခုချိန်ထိ ဘိုး​တော်နဲ့ သူ​ဌေး​တွေ ပူး​​ပေါင်းပြီး ​ကြံကြတယ်ဆိုတာ မရိပ်မိ​သေးဘူး။ ဘိုး​တော်က ဓာတ်လုံးတွ ​အလကား​ပေးထားတာ​လေ။ ကြည်ညို​နေဆဲ​ပေါ့။ "ဘိုး​တော်ပိုးစုန်းကြူး" စာ​အောက်မှာ မှတ်ချက်​လာ​ရေးတဲ့ သူ​တွေလို ဗဟုသုတ မကြွယ်ကြဘူး​လေ။ ​

ဘိုး​တော်ကို ​အပူကပ်တယ်။ ဘယ်လို လုပ်ရမလဲ​ ​ပေါ့။ ကူပါ ကယ်ပါ ​ပေါ့။ ဘိုး​တော်က ဒီကိစ္စကို ရှန်ဂရီလာမှာ ​အထက်​ပုဂ္ဂိုလ်​တွေနဲ့ တိုင်ပင်ဖို့ သွားရမယ်ဆိုပြီး ခရီးစရိတ် ​အလှူထပ်​ခံပါသတဲ့။ သိန်း ၈၀၀ ​​တောင်ရင်းထားပြီးပြီ။ ​နောက်ထပ် ၁၀ သိန်း​လောက်ထပ်လှူရတာ ဘာ ​အ​ရေးလဲ​ပေါ့ ဆိုပြီး ထပ်လှုကြ​ပြန်​ရော။ ဘိုး​တော်က နိုင်​ငံခြားက ​ကြယ် ၅ ပွင့် ရှန်ဂရီလာ ​ဟော်တယ်မှာ နှပ်ပြီ​လေ။

ဘိုး​တော်နဲ့ ​အ​​ပေါင်း​အပါ​တွေ ​ရှန်ဂရီလာက ​အ​ပြန်ကို ပြည်သူ​တွေ ​မျှော်​ပေမဲ့ ​​ပေါ်မလာ။ ​နောက်​တော့ ​ရွှေထူးရဲ ့"​ပြန်မလာတာ လမ်းမသိလို့" ဆိုတဲ့ သီချင်း​ပေါ်လာ​ရော။ ဘိုး​တော် ​အဆင်​ပြေပါ​စေလို့ ခုချိန်ထိ ဆု​​တောင်း​ပေး​နေကြတဲ့သူ​တွေကလည်း ဒုနဲ့​ဒေး။

​နောက် သုံးလ​ကျော် ​အကြာမှာ​တော့ ​မြန်မာနိုင်​ငံ ​အနှံ့မှာ ဓား​ဒဏ်ရာ၊ ​သေနတ်​ဒဏ်ရာ​တွေနဲ့ ​ဆေးရုံ​ရောက်လာတဲ့သူ​တွေ များလာသတဲ့။ စုံစမ်းကြည့်​တော့ ၉၉ ရက်​ကြာ ၉ ပါး သီလ ​​စောင့်ပြီး ဓာတ်လုံး စွမ်းမစွမ်းကို စမ်းကြည့်ကြတာဆိုပဲ။ တိန်။ ​အေးပါကွာ။ ယုံရက်​လိုက်ကြတာ။

အားလုံး ကိုယ်စိတ် နှစ်ဖြာ ကျန်းမာ ချမ်းသာကြပါ​စေ ခင်ဗျာ။

ဆက်​လက်​၍ ဖတ်​ရန်
ပိုးစုန်းကြူး ငွေးကြေးဆိုင်ရာ ဗဟုသုတ 

Credit: 
Firefly ပိုးစုန်ကြီး Personal Blog Page မှကူးယူထားသည်

ရင်းမြှုပ်မလား ဈေးကစားမလား

ရင်းနှီးမြှုပ်​နှံတာ​နဲ့ ဈေးကစားဝယ်​​ရောင်းလုပ်တာ နှစ်ခု မတူကွဲပြားပုံကို ရှင်းပြပါရ​စေ။

ရင်းနှီးမြှုပ်​နှံတာကို "ရင်းမြှုပ်​"၊ ဈေးကစား ဝယ်​​ရောင်းလုပ်တာကို "ဈေးကစား" လို့ ​အတိုကောက်သုံးထားပါတယ်။

(၁) ရင်းမြှုပ်တဲ့​အခါ ​ငွေကို ​ရေရှည်​ ထည့်မြှုပ်ထားပြီး ​ရေရှည်​ အကျိုး​အမြတ်ကို ကြည့်ပါတယ်။ ဈေးကစား​တဲ့​အခါ ​ရေတို​အကျိုး​အမြတ်ကို ကြည့်ပါတယ်။

(၂) ရင်းမြှုပ်​တဲ့​အခါ ​​အရှုံး​အမြတ် မကြမ်းပါဘူး။ ပုံ​မှန်ပဲ သွားပါတယ်။ ငွေဆုံးရှုံးနိုင်​ခြေ နည်းပါတယ်။ ပျင်းစရာ​​ကောင်းပါတယ်။ ဈေးကစား​တဲ့ ​အခါ ​အရှုံး​အမြတ်ကြမ်းပြီး ရင်ခုန်ရင်တုန်ဖို့ ​​ကောင်းပါတယ်။ ​ငွေဆုံးရှုံးနိုင်​​ခြေ များပါတယ်။

ပျင်းလိုက်တာ www.facebook.com/fireflypsk/posts/279321786739437/

(၃) ရင်းမြှုပ်​တဲ့​အခါ ​အများ​အားဖြင့် ကိုယ့်​ငွေ​နဲ့ကိုယ် ရင်းမြှုပ်ကြပါတယ်။ ဈေးကစား​တဲ့​အခါ ​အများ​အားဖြင့် ​ကိုယ့်​ငွေ​နဲ့​ရော ငွေချေးပြီးပါ ကစားကြပါတယ်။

(၄) ရင်းမြှုပ်​တဲ့သူ​တွေဟာ ​ငွေမ​ထည့်ခင် သတိရှိရှိ​နဲ့ ​​​အချက်​အလက်​တွေကို သေချာ စူးစမ်း​​လေ့လာပြီးမှ ဆုံးဖြတ်ချက် ချတတ်ပါတယ်။ ဈေးကစားသူ​တွေက​​တော့ ချဲတွက်နည်း​ဆန်​ဆန် ​​ဖော်မြူလာ​တွေ သုံးတတ်တာ​တွေရှိသလို စိတ်​ခံစားမှု​၊ လောဘ​နဲ့ စိတ်ထင်ရာ​တွေကို ဦးစားပေးပြီး မဆင်မခြင် ​ငွေ​ထည့်တတ်တာ​တွေ ရှိပါတယ်။

(၅) ရင်းမြှုပ်​​တဲ့​အခါ ဈေးကွက်​အ​ခြေ​အ​နေ​​ကြောင့် ယာယီ​အရှုံး​​ပေါ်​နေတာကို မမှုပဲ ​ငွေကို ဆက်​ထည့်ထားနိုင်ပါတယ်။ ​​​​​သေချာနားလည်တွက်ချက်ထားပြီးပြီဖြစ်လို့ ရေရှည်မှာ မြတ်မယ်ဆိုတာကို ယုံကြည်မှုရှိသလို ရှုံး​နေ​တဲ့​အချိန် ထုတ်​​ရောင်းရလောက်အောင် ​ငွေမလို​ပြန်ပါဘူး။ ဈေးကစား​တဲ့​သူ​တွေက​​တော့ ကြာရှည်​​တောင့်မ​ခံနိုင်ပါဘူး။ ရှုံး​နေ​တဲ့​အခါ ရေရှည်​ငွေမြုပ်​နေတာမျိုးကို လက်မ​ခံနိုင်တာမို့ ​အရှုံး​ခံ ​​ရောင်းထုတ်ရတတ်ပါတယ်။

(၆) ရင်းမြှုပ်​တဲ့​အခါ ဝယ်​တဲ့ဈေးဟာ ပကတိ တန်ဖိုးထက် နည်း​နေတတ်ပါတယ်။ ​ဝယ်လိုက်ကတည်းက ​အမြတ်ထွက်​နေပါပြီ။ ဈေးကစား​တဲ့​အခါ ဝယ်ဈေးဟာ ပကတိ တန်ဖိုးထက် များ​နေလည်း နောက်လည်း ဈေးတက်ဦးမှာပဲဆို​တဲ့ မျှော်လင့်ချက်​နဲ့ ဈေးကစားပြီး ဝယ်ပါတယ်။

(၇) ပကတိ​တန်ဖိုးဟာ ပေါက်ဈေး​နဲ့ မတူ​ပြန်ပါဘူး။ ​(တူ​တဲ့​အခါလည်း တူပါတယ်။) ဝယ်လို​အား​နဲ့ ​​ရောင်းလို​အား ​အ​ခြေ​အ​နေ​တွေ​​ကြောင့် အချို့​အချိန်​တွေမှာ ပေါက်ဈေးဟာ ပကတိ​တန်ဖိုးထက်များ​နေတတ်ပါတယ်။ အဲဒီ​အချိန်မျိုးမှာ ရင်းမြှုပ်​တဲ့သူ​တွေ လက်​​ရှောင်တတ်ပြီး ဈေးကစား​တဲ့သူ​တွေ ​ကြိုက်ကြပါတယ်။ အချို့​အချိန်​တွေမှာ ပေါက်ဈေးဟာ ပကတိ​တန်ဖိုး​အောက် နည်း​နေတတ်ပါတယ်။ ဈေး​အကျပိုင်း​​ပေါ့။ အဲဒီ​အချိန်မျိုးမှာ ရင်းမြှုပ်​တွေ ဝယ်တတ်ကြပါတယ်။ (ပစ္စည်းတစ်ခု၊ စ​​​​တော့ရှယ်ယာလက်မှတ် တစ်​​စောင်၊ ​ခြံတစ်ကွက်၊ စပါး၊ ပဲ စတာ​တွေ​ရဲ့ ပကတိ​တန်ဖိုးကို သိအောင်​​လေ့လာတတ်တာ ရင်းမြှုပ်​တွေ​ရဲ့ ပညာပါပဲ။)

ငပိန်းဖမ်း သီအိုရီ https://www.facebook.com/fireflypsk/posts/140133673991583

အားလုံး ကိုယ်စိတ် နှစ်ဖြာ ကျန်းမာ ချမ်းသာကြပါ​စေ ခင်ဗျာ။

ဆက်​လက်​၍ ဖတ်​ရန်
ပိုးစုန်းကြူး ငွေးကြေးဆိုင်ရာ ဗဟုသုတ 

Credit: 
Firefly ပိုးစုန်ကြီး Personal Blog Page မှကူးယူထားသည်

မိုနိုပိုလီ သင်ခန်းစာ

မိုနိုပိုလီ ကစားနည်းကို ငယ်ငယ်က ကစားဖူးကြမယ် ထင်ပါတယ်။ ​ဝေပုံရ​တဲ့ ​ငွေ​တွေ​နဲ့ ​အံစာတုံးကျရာ​မှာ ခြံ​တွေဝယ်၊ အိမ်​တွေ ဟိုတယ်​တွေ ဆောက်။ ကိုယ် ပိုင်​ဆိုင်ထားတဲ့ ​နေရာကို လူ​တွေရောက်လာရင် ​တည်းခိုခ ငွေ​တွေရ​လို့ ​​ပျော်စရာ ​​ကောင်းပါတယ်။ ​​ကံ​မ​​ကောင်း အ​​ကြောင်းမလှ​တဲ့​အခါ ငွေ​ကုန်ပေါက်​တွေ​နဲ့ ဆက်တိုက်တိုးလို့ ရှုံး​နေရင်​​တော့ စိတ်ညစ်ဖို့ ​​ကောင်းသ​​ပေါ့။

အဲဒီ ကစားနည်းထဲက သင်ခန်းစာလေးတစ်ခုကို ဆွဲထုတ်ပြချင်ပါတယ်။

​ကစားသူ အချို့က ​​​အန်စာတုံး ကျရာ​နေရာမှာ ရ​တဲ့ ​အခွင့်​အရေး​မှန်သမျှကို ​အသုံးချပြီး မျက်စိစုံမှိတ် ​ခြံ​တွေဝယ်၊ အိမ်​တွေဆောက်၊ ဟိုတယ်​တွေ ဆောက်ပါတယ်။ ​လက်ထဲမှာ ​ငွေမ​ချန်ပဲ ​အကုန်လုံးကို ရင်းနှီး မြှုပ်​နှံလိုက်တာ​​ပေါ့။

သူတို့​ရဲ့ ​အတွေးက ငွေကိုင်ထားရင် အကျိုး​အမြတ်မရှိပဲ ​ဝပ်နေတယ်။ အိမ်​ခြံ​မြေ ဟိုတယ်​တွေဝယ်ထားလို့ လာတည်း​တဲ့ သူ​တွေရှိရင် ​ငွေ​ပြန်ဝင်မှာပဲ​လို့ တွေးပါတယ်။

​ကံ​​ကောင်း ထောက်မ​တဲ့ ​အခါ လာတည်း​တဲ့သူ​တွေဆီက ​ငွေ​တွေ ဝင်ပါတယ်။ ​​​ငွေရွှင်ပါတယ်။

ကံမ​​ကောင်း​တဲ့ ​အခါ ကိုယ့်ဆီလာတည်း​တဲ့သူ​​ မရှိလို့ ​ငွေက မဝင်။ လက်ထဲမှာ ​ငွေမရှိ​တဲ့​အချိန် ​​ထောင်ကျပြီး ​ဒဏ်​ငွေ​ဆောင်ရတာ​နဲ့ တိုးပါတယ်။ ​အခွန်ပေးရမယ့် ​အချိန်​နဲ့ တိုးပါတယ်။ သူများ ဟိုတယ် မှာ သွားတည်းမိလို့ ​ငွေပေးရမယ့် ​အချိန်​နဲ့တိုးပါတယ်။ ​ငွေကုန်ပေါက်​ ​အမျိုးမျိုး​နဲ့ ​​တွေ့ပါတယ်။

အဲဒီ ​အချိန်​တွေမှာ လက်ထဲမှာ ​ငွေပို မရှိတဲ့သူ​တွေ ဒုက္ခရောက်ရပါတယ်။ ​ရှိ​တဲ့ အိမ်​ခြံ​မြေဟိုတယ်​တွေကို လျှော့ဈေး​နဲ့ ​​ရောင်း​ပြီး ပေးစရာရှိတာ​တွေ ပေးရပါ​​တော့တယ်။ ​ဗိုက်နာဈေး​နဲ့ ​​ရောင်းတာဆို​​တော့ အရှုံး​​ပေါ်ပါတယ်။

ဒါ့​အပြင် လက်ထဲ ​ငွေမရှိ​​တော့ ဈေး​ပေါ​ပေါ​နဲ့ ရနိုင်​တဲ့ ​လေ​လံ ​မြေကွက်​တွေကို မဝယ်နိုင်ပဲ ​အခွင့်​အရေး​တွေကို လက်လွှတ်ရတာမျိုး​တွေ ဖြစ်တတ်ပါသေးတယ်။

​အပြင်​လောကမှာလည်း ဒီလို​တွေ ဖြစ်တတ်ပါတယ် ခင်ဗျ။ ​အချို့လူ​တွေဟာ လက်ထဲမှာ ​ငွေမထားပဲ ​ငွေ​တွေ​အားလုံးကို အိမ်ခြံမြေ ​နဲ့ ​အခြား စီးပွားရေးလုပ်ငန်း​တွေထဲမှာ ​​ထည့်ထားတတ်ကြပါတယ်။ ​​ငွေ​တွေ မြုပ်​နေတယ်​​ပေါ့။

​ငွေ​တွေ​အများကြီး လက်ထဲမှာ ကိုင်ထားမိရင် ​ငွေကြေး​​ဖောင်းပွမှု​​ကြောင့် ရှုံးတတ်တာ​မှန်​ပေ​မဲ့ ​ငွေကို လက်ထဲမှာ လုံးဝမထားရင်လည်း ကံမ​​ကောင်း ​အ​​ကြောင်းမလှ​တဲ့ တစ်ချိန်မှာ ​သောကရောက်ရတတ်ပါတယ်။ ဥပမာ မိသားစုဝင် တစ်ယောက်ယောက် ဆေးရုံတက်ရပြီး ကျန်းမာရေး အာမ​ခံလည်း မလုပ်ထား​​တော့ ငွေလိုတာမျိုး၊ လုပ်ငန်း​တွေ ဆက်လက်လည်ပတ်ဖို့ ​ငွေလိုတာမျိုး၊ ရုတ်တရက် ​အလုပ်ပြုတ်သွားလို့ နောက်​အလုပ် ရှာ​​နေတုန်းမှာ စားသောက်ဖို့ ​ငွေလိုတာမျိုး၊ ​အစိုးရက ​အခွန်​တွေ ​သေချာကြပ်မတ်ပြီး ကောက်လို့ ​ငွေလိုတာမျိုး စသဖြင့် မမျှော်လင့်ထား​တဲ့ ​အ​​ကြောင်းတစ်ခုခု​​ကြောင့် ​ငွေလိုတာမျိုး​တွေပါ။

အဲဒီ ​အခါမျိုးမှာ ​သောကရောက်ရပါပြီ။ စီးပွားရေးလုပ်​ငန်း​တွေထဲ ​ထည့်ထား​တဲ့ ​ငွေ​တွေက ​ပြန်ထုတ်လို့မရ။ အိမ်​ခြံ​​မြေ​တွေကလည်း ချက်ချင်း​​ရောင်းမထွက်​နဲ့ ဘေးကြပ်​နံကြပ် ဖြစ်တတ်ပါတယ်။ ဗိုက်နာ ဈေး​နဲ့ ​​ရောင်း​​တော့လည်း ​အရှုံး​များတတ်ပြီး ဘေးက ​ငွေချေး​​တော့လည်း ​အတိုးများတတ်ပါတယ်။

ဒါ့​​ကြောင့် ​ငွေကိုင်ထားဖို့ လိုအပ်ပါတယ်။ ​အရေး​​ပေါ် ​ရန်ပုံ​ငွေ​အ​နေ​နဲ့ ​အသုံးစရိတ်​ရဲ့ ၃ လစာ က​နေ ၆ လစာလောက် ​ငွေသား ကိုင်ထားသင့်ပါတယ်။

​အရေး​​ပေါ် ​ရန်ပုံ​ငွေဟာ စီးပွား​ရေးလုပ်ငန်း လုပ်​တဲ့သူ​တွေ​အတွက် ပို​အရေးကြီးပါတယ်။ ဝင်​ငွေ ရပေါက်ရလမ်း​တွေ​​ နှောင့်နှေး​နေ​တဲ့​အခါမျိုး​တွေမှာ ​ငွေပိုဆောင်ထားတာ မရှိရင် ​အလုပ်သမားခ၊  မီတာခ၊ ​အခွန်​အခ၊ စက်ပြင်ခ စသဖြင့် ကုန်ကျစရိတ်​တွေကို ပေးဖို့​​တောင် ​အခက်​အ​ခဲ ရှိတတ်ပါတယ်။ မကြာခဏ ဦးနှောက်ခြောက်ရတတ်ပါတယ်။

အချို့စီးပွားရေးလုပ်ငန်း​​တွေက တစ်နှစ်လုံး ​ငွေမြုပ်​နေပြီး တစ်နှစ်ကြာမှ ​အရင်း​ရော ​အမြတ်​ရော​ပြန်ရတာမျိုး ရှိတတ်ပါတယ်။ ဒါမျိုးဆိုရင် တစ်နှစ်စာ ကုန်ကျစရိတ်​ငွေ လက်ထဲ ရှိထားဖို့ လိုပါတယ်။ ​

​အချို့စီးပွားရေး​ လုပ်ငန်း​တွေက​​တော့ ​အကြွေး​နဲ့ ​​ရောင်းထားတာ​တွေရှိလို့ ​ငွေမလည်ပဲ ကုန်ပစ္စည်း​အသစ်ဝယ်ဖို့​​တောင် ​ငွေမရှိလို့ ​အခက်ကြုံရတာ​တွေလည်း ရှိပါတယ်။ ဒီလို ​အ​ခြေ​အ​နေမျိုး​တွေ​အတွက်လည်း ​လုပ်​ငန်း ဆက်လက်လည်ပတ်နိုင်အောင် ငွေပို ရှိ​နေဖို့ လိုပါတယ်။

ရုတ်တရက် ​ငွေလိုလာမှ ​စီးပွားရေးလုပ်ငန်းကို ရပ်လိုက်ရတာမျိုး၊ အတိုးကြီးပေးပြီး ​ငွေချေးရတာမျိုး၊ ရှိ​တဲ့ ပစ္စည်းဥစ္စာ​တွေကို ဗိုက်နာဈေး​နဲ့ ထိုး​​ရောင်းရတာမျိုး မဖြစ်ရ​အောင် သေချာ တွက်ချက်ပြင်ဆင်ထားရမှာပါ။ ​​မတွက်ချက်ပဲ နောင်ခါလာ ​​နောင်ခါဈေး လျှောက်လုပ်ရင် ​​ငွေကြပ်တည်းတာ​တွေ ဖြစ်လာနိုင်ပါတယ်။

​ငွေပိုရှိရင် ​ဈေးကွက်ထဲမှာ ဗိုက်နာဈေး​နဲ့​​ပေါ်လာ​တဲ့ ​အိမ်​ခြံ​မြေ စီးပွား​​ရေးလုပ်ငန်း စ​တဲ့ အခွင့်​အရေး​တွေကို ​​လက်မလွှတ်ပဲ မိမိရရ ဖမ်းဆုပ်ထားနိုင်ပါသေးတယ်။

​​ချွေတာပါ။ ငွေကို စုပါ။ ​အရေး​​ပေါ် ​ရန်ပုံ​ငွေကို ​ဆောင်ထားပါ။

ရင်းနှီးမြှုပ်နှံမှုမလုပ်ခင် ဒါ အရင်လုပ်ပါ https://www.facebook.com/fireflypsk/posts/120329299305354

မိုနိုပိုလီ ကစားနည်းက​နေ ယူလို့ရ​တဲ့ ​အခြားသင်​ခန်းစာ​တွေ ​အများကြီးရှိပါတယ်။ နောက်မှ ရေးပါ​ဦးမယ်။

အားလုံး ကိုယ်စိတ် နှစ်ဖြာ ကျန်းမာ ချမ်းသာကြပါ​စေ ခင်ဗျာ။

ဆက်​လက်​၍ ဖတ်​ရန်
ပိုးစုန်းကြူး ငွေးကြေးဆိုင်ရာ ဗဟုသုတ 

Credit: 
Firefly ပိုးစုန်ကြီး Personal Blog Page မှကူးယူထားသည်